ފްރާންސް ލީގުގައި ރެނެސް އަތުން ފަހު ވަގުތު ޕީއެސްޖީ މޮޅުވެއްޖެއެވެ.

ރަށުން ބޭރުގައި ޕީއެސްޖީން ކުޅުނު މި މެޗު އެ ޓީމުން ކާމިޔާބުކުރީ 1-0 ގެ ނަތީޖާއަކުންނެވެ،

މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މެޗުގެ ކުރީކޮޅު ރެނެސްގެ ބެންޖަމިން ބޯރެޖޯ ފޮނުވާލި ނުރައްކާތެރި ހަމަލާގެ ހުރަހަކަށްވީ ޕީއެސްޖީގެ ކީޕަރު ކޭލޯ ނަވާސްއެވެ. މީގެ އިތުރުން ޕީއެސްޖީގެ ޒަވީ ސިމޯންސް ފޮނުވާލި ހަމަލާތައް ގޯލާ އަމާޒުނުވެ ދިޔައީ ބޭރަށެވެ. ފުރަތަމަ ހާފު ނިމުމުގެ ކުރިން ޕީއެސްޖީގެ ޒުވާން ތަރި ކީލިއަން އެމްބާޕޭ ފޮނުވާލި ހަމަލާ އަމާޒުވީ ގޯލުގެ ދަނޑިއަށެވެ. މީގެ އިތުރުން މި ހާފުގައި ލިއޮނަލް މެސީއަށްވެސް ލަނޑު ޖަހަން ފުރުސަތުތަކެއް ލިބި ވަނީ ބޭކާރުވެފައެވެ.

މެޗުގެ ދެވަނަ ހާފު ފަށައިގެން މާގިނަ އިރުތަކެއް ނުވަނީސް އެމްބާޕޭ ވަނީ ލަނޑު ޖަހައިފައެވެ. އެކަމަކު ވީޑިއޯ އެސިސްޓެންޓް ރެފްރީ (ވީއޭއާރް) ބެލުމަށްފަހު އެއީ އޮފްސައިޑް ލަނޑެއް ކަމަށް ވަނީ ނިންމާފައެވެ.

މެޗުގައި ޕީއެސްޖީ މޮޅުކޮށްދިން ލަނޑު އެމްބާޕޭ ޖެހީ އިތުރު ވަގުތުގައެވެ. މިއީ މެސީގެ އެހީތެރިކަމާއެކު އެމްބާޕޭ ކާމިޔާބުކޮށްދިން ލަނޑެކެވެ.

މި ނަތީޖާއާއެކު ލީގު ތާވަލުގެ އެއްވަނައިގައި ޕީއެސްޖީން ވަނީ 16 ޕޮއިންޓްގެ ލީޑެއް ނަގައިފައެވެ. އެއީ 24 މެޗުން 59 ޕޮއިންޓް ހޯދައިގެންނެވެ. ދެވަނައިގައި އޮތް މާސޭއަށް 23 މެޗުން 43 ޕޮއިންޓް ލިބިފައިވާއިރު، ތިންވަނައިގައި ނީސް އޮތީ 23 މެޗުން 42 ޕޮއިންޓް ހޯދައިގެންނެވެ.