މިދިޔަ މަހު ރާއްޖޭގެ 55 އިންސައްތަ ކޯޓުގައި ޖިނާއީ އެއްވެސް މައްސަލައެއް ތާވަލެއް ނުކުރޭ
ކޯޓުގެ ބަޔާންތައް ލިޔަނީ ހަމައެކަނި ޓައިޕިންގ ޕޫލްގައި ކްރިމިނަލް ކޯޓުގެ ފަރާތުން ރަޖިސްޓަރ ވި 4 މުވައްޒަފުން
ކްރިމިނަލް ކޯޓް- އެކި ސަބަބުތަކާހުރެ 540 އަޑުއެހުން ކެންސަލްވެފައިވާއިރު، އެންމެ ގިނަ އަޑުއެހުން ކެންސަލްވެފައިވަނީ ކްރިމިނަލް ކޯޓުގައި
މިދިޔަ މަހު 107 ކޯޓެއްގައި ޖިނާއީ އެއްވެސް މައްސަލައެއް ތާވަލުކޮށްފައިނުވާކަން ހާމަވެއްޖެއެވެ.
އެކަން ހާމަ ކުރައްވާފައިވަނީ ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް އޭނާގެ ބްލޮގްގައި ޝާއިއު ކުރައްވާފައިވާ މައުލޫމާތުގައެވެ. ޝަމީމް ހާމަ ކުރައްވާފައިވާ މައުލޫމާތުތަކަށް ބަލާއިރު، ނިމިދިޔަ ޖެނުއަރީ 2022 ގައި، ޖިނާއީ މައްސަލައެއްގެ އަޑުއެހުމެއް ޝެޑިއުލް ކޮށްފައިވަނީ ޖުމްލަ 87 ކޯޓުގައެވެ. އެއީ 1001 އަޑުއެހުންކަމަށް ޝަމީމް ވިދާޅުވިއެވެ. ރާއްޖޭގައި 194 ކޯޓު ހުންނައިރު، 55 އިންސައްތަ ކޯޓުގައި އެއްވެސް ޖިނާއީ މައްސަލައެއް ތާވަލުކޮށްފައެއް ނުވެއެވެ.
ޕީޖީ އޮފީހުން މައުލޫމާތު ދޭ ގޮތުގައި އޭގެ ތެރެއިން ކޮންމެ އަޑުއެހުމަކަށްވެސް ޕީޖީ އޮފީހުގެ ވަކީލަކު ޢައްޔަނު ކުރެވިފައިވެއެވެ. އޭގެ ތެރެއިން ކުރިއަށް ގެންދެވިފައިވަނީ 461 އަޑުއެހުންކަމަށް ޕީޖީ ވިދާޅުވިއެވެ. އެކި ސަބަބުތަކާހުރެ 540 އަޑުއެހުން ކެންސަލްވެފައިވާއިރު، އެންމެ ގިނަ އަޑުއެހުން ކެންސަލްވެފައިވަނީ ކްރިމިނަލް ކޯޓުގައިކަމަށް ޝަމީމް ވިދާޅުވިއެވެ. އަދި އެންމެ ގިނަ ކޯޓުގައި އެއްދުވަހާ މަސައްކަތް ހިނގީ 24 ޖަނަވަރީ ގައި ކަމަށްވެސް ޝަމީމް ހިއްސާ ކުރެއްވި ތަފާސްހިސާބުތަކުގައި ބަޔާންކޮށްފައިވެއެވެ. އެގޮތުން އެ ދުވަހު ތަފާތު 20 ކޯޓެއްގައި، 49 އަޑުއެހުން ތާވަލުކޮށްފައިވީ ނަމަވެސް، އެ ދުވަހުވެސް ބޭއްވުނީ 15 އަޑުއެހުން ކަމަށް ޝަމީމް ވިދާޅުވިއެވެ. އެ ދުވަހުގެ 34 އަޑުއެހުން ވަނީ ކެންސަލްވެފައެވެ.
ރާއްޖޭގެ 107 ކޯޓެއްގައި އެއްވެސް ޖިނާއީ މައްސަލައެއް ތާވަލުކޮށްފައި ނުވި ނަމަވެސް، އެ ކޯޓުތަކަށްވެސް ދައުލަތުން ބޮޑު ޚަރަދުތައް ކުރާއިރު، އެ ކޯޓުތައް ނިސްބަތްވާ ރަށްރަށުގައިވެސް ޖިނާއީ މައްސަލަތައް ފެންމަތިވެއެވެ. އަދި އެފަދަ ކޯޓުތަކުގައި ތިބޭ މުވައްޒަފުން އެހެން ކޯޓުތަކުގެ މަސައްކަތްތަކަށް ބޭނުން ކުރެވިދާނެކަމަށް ގިނަ ބަޔަކު ބުނެއެވެ. މިސާލެއްގެ ގޮތުން ބަލާއިރު، 2021 ވަނަ އަހަރު ކްރިމިނަލް ކޯޓުގެ ޝަރީއަތްތައް ކުރާ ސެކްޝަންތަކުން 2787 އަޑުއެހުން ރެކޯޑު ކޮށްފައިވެއެވެ. އެ އަޑުއެހުންތަކުގެ ދިގުމިން 1597 ގަޑިއިރަށް އަރައެވެ. އަދި 2036 ބަޔާން ލިޔެފައިވާއިރު، އެ ބަޔާންތަކާއި ގުޅޭ ރެކޯޑިންގ ތަކުގެ ދިގުމިން 1132 ގަޑިއިރަށް އަރައެވެ. މި މަސައްކަތް ކުރުމަށް އަތޮޅުތެރޭގައި މަސައްކަތްތައް ނުހިނގާ ކޯޓުތަކުގެ މުވައްޒަފުން ބޭނުން ކުރެވިދާނެކަމަށް ބައެއް ފަރާތްތަކުން ދެކެއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން 2021 ވަނަ އަހަރު ވަނީ އެ މަގުން މަސައްކަތް ކުރެވޭނެ އުސޫލެއް ޤާއިމު ކޮށްފައެވެ. އެ އުސޫލުގެ ދަށުން ރަށްރަށުގެ ކޯޓުތަކުގައި ތިބޭ މުވައްޒަފުން މަތީ މަރުޙަލާގެ ބައެއް ކޯޓުތަކުގެ ބަޔާންތައް ލިޔުންފަދަ ކަންކަމަށް އެކުލަވާލާފައިވާ "ޓައިޕިންގ ޕޫލް" ގައި ރަޖިސްޓަރުވުމަށް ވަނީ ދަފްތަރެއް އެކުލަވާލާފައެވެ. އެ ދަފްތަރުގައި ރަޖިސްޓްރީވާ ފަރާތްތައް ކޯޓުތަކަށް ކަނޑައަޅަނީ ޑީޖޭއޭއިންނެވެ. އެގޮތުން ކްރިމިނަލް ކޯޓަށްވެސް 10 މުވައްޒަފުން ކަނޑައަޅާފައިވާއިރު، އޭގެ ތެރޭގައި އަތޮޅުތެރޭގެ ކޯޓުތަކަށް ނިސްބަތްވާ 6 މުވައްޒަފުން ހިމެނެއެވެ.
އެހެންނަމަވެސް، ކްރިމިނަލް ކޯޓަށް ރަށްރަށުން ކަނޑައަޅާފައިވާ މުވައްޒަފުން މިހާތަނަށްވެސް އެއްވެސް ބަޔާނެއް ލިޔެފައިނުވާކަމަށް ރާއްޖެއެމްވީއަށް ވަނީ މައުލޫމާތު ލިބިފައެވެ. އެކަން ކްރިމިނަލް ކޯޓުން ވަނީ ޑީޖޭއޭގެ ސަމާލުކަމަށްވެސް ގެނެސްފައެވެ. ކޯޓުގެ ބަޔާންތައް ލިޔަނީ ހަމައެކަނި ޓައިޕިންގ ޕޫލްގައި ކްރިމިނަލް ކޯޓުގެ ފަރާތުން ރަޖިސްޓަރުވި 4 މުވައްޒަފުން އެކަނިކަމަށް ރާއްޖެއެމްވީއަށް ވަނީ މައުލޫމާތު ލިބިފައެވެ.
ކޯޓުގެ އެއްވެސް ބަޔާނެއް ނުލިޔުނު ނަމަވެސް، އެ ފަރާތްތައް މިހާރުވެސް ޑީޖޭއޭގެ ޓައިޕިންގ ޕޫލްގެ ދަފްތަރުގައި ވަނީ ރަޖިސްޓަރުވެފައެވެ.
