ގދ. ތިނަދޫއަށް ސިޓީއެއްގެ ދަރަޖަ ދިނުމަށް އެދި ލޯކަލް ގަވަރަމަންޓް އޮތޯރިޓީ (އެލްޖީއޭ) އިން ރައްޔިތުންގެ މަޖިލީހަށް ހުށައަޅައިފިއެވެ.

އެލްޖީއޭގެ ސީއީއޯ އަފްޝަން ލަތީފް ސޮއިކުރައްވައި މިމަހުގެ 9 ވަނަ ދުވަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަށް ފޮނުއްވި ސިޓީގައި ވަނީ އެލްޖީއޭގެ ބޯޑު ބައްދަލުވުމެއްގައި ތިނަދޫ ކައުންސިލުން ތިނަދޫ ރަށުު ކައުންސިލް ސިޓީ ކައުންސިލަކަށް ބަދަލުކުރުމަށް ބޭނުންވާ ލިޔުންތައް ހުށަހަޅާފައިވާ ކަމަށެވެ. އަދި އެލިޔުންތަކާއި ގުޅިގެން މަޝްވަރާ ކުރުމަށް ފަހު، މަޖިލީހުގެ ލާމަރުކަޒީ ކޮމެޓީއާއި މަޝްވަރާ ކޮށްގެން މައްސަލައަށް ހައްލެއް ހޯދުމަށް މަސައްކަތް ކުރުމަށް ނިންމާފައިވާ ކަމަށް އެސިޓީގައިވެއެވެ.

އެހެންކަމުން މިމައްސަލައާއި ގުޅޭ ގޮތުން މަޖިލީހުގެ ލާމަރުކަޒީ ކޮމެޓީއާއި މަޝްވަރާ ކުރުމަށް ބައްދަލުވުމެއް ބާއްވައި ދިނުމުގެ އިންތިޒާމް ހަަމަޖައްސަވާދެއްވުމަށް އެލްޖީއޭއިން ވަނީ މަޖިލީހުގައި އެދިފައެވެ.

ތިނަދޫ އަށް ސިޓީއެއްގެ ދަރަށް ދިނުމަށް އެރަށު ކައުންސިލުން މީގެ ކުރިން ވެސް ވަނީ އެދިފައެވެ . ތިނަދޫ ކައުންސިލުން ބުނީ އެކަމާއި ގުޅޭ ގޮތުން ކައުންސިލުން ކުރަން ޖެހޭ ކަންކަން ހުއްޓުމެއް ނެތި ކުރަމުން އަންނަ ކަމަށެވެ. ސިޓީއެއްގެ ދަރަޖަ ދިނުމުގައި އެންމެ މައިގަނޑު އެއް ކަމަކަށް ބަލަނީ އާބާދީ 10،000 އަށް ވުރެ ގިނަވުމެވެ.

މިހާރު ސިޓީގެ ދަރަޖަ ލިބިފައިވަނީ ހަތަރު ތަނަކަށެވެ. އެއީ ވެރިރަށް މާލެ ސިޓީ، އައްޑޫ ސިޓީ، ފުވައްމުލަކުސިޓީ އަދި ކުލުދުއްފުށީސިޓީ އެވެ.