ތިނަދޫ ހޮސްޕިޓަލުގެ މަސައްކަތް ނިމުމަކާގާތަށް

ގދ. ތިނަދޫ ޑރ. އަބްދުއްސަމަދު މެމޯރިއަލް ހޮސްޕިޓަލްގެ މަޝްރޫއުގެ މަސައްކަތް ނިމުމަކާ ގާތަށް ގޮސްފައިވާކަމަށް މަސައްކަތުގެ ކޮންޓެކްޓަރ އެމްޓީސީސީން ބުނެފިއެވެ.

އެމްޓީސީސީން މައުލޫމާތުދޭގޮތުގައި މަޝްރޫއުގެ 82 އިންސައްތަ މަސައްކަތް ވަނީ މިހާރު ނިމިފައެވެ. އޭގެއިތުރުން އޯޕީޑީ އިމާރާތާއި ވިއްސާ ކޮޓަރި ހުންނަ އިމާރާތުގެ 99 އިންސައްތަ މަސައްކަތްވެސް ވަނީ ނިމިފައެވެ.

އެ މަޝްރޫއުގެ ދަށުން، އޯޕީޑީ އިމާރާތެއް އެޅުމާއި، ވިއްސާ ކޮޓަރި ހުންނަ އިމާރާތް އެޅުމާއި، އިމަރޖެންސީ ރޫމް އިމާރާތް ރެނޮވޭޓް ކުރުމުގެ މަސައްކަތް ހިމެނެއެވެ.

ހެލްތު މިނިސްޓްރީގެ ފަރާތުން އެ ހޮސްޕިޓަލުގެ ޖާގަ އިތުރުކުރުމުގެ މަސައްކަތް އެމްޓީސީސީއާ ހަވާލުކުރީ އޮގަސްޓް 2019ގަ އެވެ. އެ މަސައްކަތް އެ ކުންފުނިން ފެށީ 2020 ވަނަ އަހަރުގެ އޮގަސްޓު މަހުގެ ތެރޭގައެވެ.

ތިނަދޫ ހޮސްޕިޓަލަކީ ހުވަދުއަތޮޅުގައި ހުންނަ ހޮސްޕިޓަލުތަކުގެ ތެރެއިން ސިއްހީ ޚިދުމަތް ދޭ އެންމެ ބޮޑު އެއް ހޮސްޕިޓަލެވެ. އަދި މި ސަރުކާރުން ވަނީ ރާއްޖޭގެ ފަސް ސަރަހައްދުގައި ޓާޝަރީ ފެންވަރަށް ތަރައްގީކުރާ ހޮސްޕިޓަލުތަކުގެ ލިސްޓުގައި އެ ހޮސްޕިޓަލު ހިމަނާފައެވެ.

ޑރ. އަބްދުއްސަމަދު މެމޯރިއަލް ހޮސްޕިޓަލްގެ މަޝްރޫއަކީ 33.5 މިލިއަން ރުފިޔާގެ މަޝްރޫއެކެވެ.