ބޮޑެތި ޑިސްކައުންޓްތަކަކާއެކު އެސްޓީއޯ ރަމަޒާން ބާޒާރު 2022 ފަށައިފިއެވެ.
އެސްޓީއޯ ރަމަޒާން ބާޒާރު 2022 އިފްތިތާހުކޮށްދެއްވީ ކުންފުނީގެ މެނޭޖިން ޑިރެކްޓަރ ހުސައިން އަމްރެވެ. އެސްޓީއޯގެ ކަސްޓަމަރުންގެ މެދުގައި ބޮޑު މަގުބޫލުކަމެއް ހޯދާފައިވާ މި ސޭލް ކުރިއަށްދާނީ 10 ފެބްރުއަރީން 30 އޭޕްރީލްގެ ނިޔަލަށެވެ. މި ސޭލަކީ އެސްޓީއޯ ހޯމް އިމްޕްރޫވްމަންޓު އަދި އެސްޓީއޯ ރީޖަނަލް ފިހާރަތަކުގެ ހޯމް އިމްޕްރޫވްމަންޓް މުދަލަށް ޚާއްސަ ސޭލްއެކެވެ.
އެހެން އަހަރު ތަކެކޭވެސް އެއްގޮތަށް މި އަހަރުގެ އެސްޓީއޯ ރަމަޒާން ބަޒާރުގައިވެސް ހިތްގައިމު ޑިސްކައުންޓްތަކެއް އެކުލެވިގެންވެއެވެ. މި ސޭލް ކުރިއަށްދަނީ އެސްޓީއޯ ހޯމް އިމްޕްރޫވްމަންޓް އާއި އެސްޓީއޯގެ ރީޖަނަލް ފިހާރަތަކުގައެވެ.
އެސްޓީއޯއިން ބުނީ އެސްޓީއޯ ހޯމް އިމްޕްރޫވްމަންޓު އަދި އެސްޓީއޯ ރީޖަނަލް ފިހާރަތަކުގެ ހޯމް އިމްޕްރޫވްމަންޓް މުދަލުން 40 އިންސައްތައާއި ހަމައަށް ޑިސްކައުންޓް ލިބިގެންދާނެ ކަމަށެވެ. އަދި 1000ރ. އިން މަތީގެ ކޮންމެ ވިޔަފާރިޔަކަށް ކޫޕަނެއް ލިބޭނެ ކަމަށާއި، މި ޕްރޮމޯޝަންގައި ހުރިހާ އައުޓްލެޓްތަކުން ކޮންމެ ހަފްތާއަކު ނަސީބުވެރިއަކު ހޮވަން ހަމަޖެހިފައިވެއެވެ.
މި ޕްރޮމޯޝަންއާ ގުޅޭގޮތުން މައުލޫމާތުދެއްވަމުން އެސްޓީއޯގެ ޕީއާރު މެނޭޖަރ އަބްދުﷲ މުހައްމަދު (އަބޯ) ވިދާޅުވީ މިފަހަރުގެ ޕްރޮމޯޝަންގައި އެސްޓީއޯއިން ބޭނުންކުރާނީ ޑިޖިޓަލް ކޫޕަން ކަމަށެވެ. މިގޮތުން 1،000 ރުފިޔާއިން މަތީގެ ވިޔަފާރި ކުރާ ފަރާތްތަކަށް ކޫޕަންއެއް ލިބިގެންދާނެ ކަމަށް އަބޯ ވިދާޅުވިއެވެ.
މި މުއްދަތުގެ ތެރޭގައި އެސްޓީއޯއިން ބާޒާރުކުރާ ފަރާތްތަކަށް މި ކޫޕަން ދެވިގެންދާނެ. ލަކީޑްރޯގައި ބައިވެރިވެވޭ ފަރާތެއްގެ ނަންބަރު އެންޓަރ ކުރުމަށްފަހު އެ ބޭފުޅަކަށް އެސްއެމްއެސްގެ ޒަރިއްޔާއިން ކޯޑެއް ލިބިވަޑައިގެންދާނެ. ކޯޑު ލިބޭ ހިސާބުން ނަމާއި އައިޑީކާޑު ނުވަތަ ޕާސްޕޯޓް ނަންބަރު ޖައްސަވާ ހިސާބުން އެ ބޭފުޅަކަށް އެއޮތީ ލަކީޑްރޯގައި ބައިވެރިވެވިފައި.އެސްޓީއޯގެ ޕީއާރު މެނޭޖަރ އަބްދުﷲ މުހައްމަދު (އަބޯ)
މި ޕްރޮމޯޝަންގެ ތެރެއިން ނަސީބުވެރި އެއް ފަރާތަށް ތުރުކީ ދެކޮޅު ޓިކެޓް ދެމީހަކަށް ލިބުމުގެ ފުރުސަތު ލިބިގެންދެއެވެ. އަދި ދަތުރުގެ އެލަވެންސްގެ ގޮތުގައި 1،000 ޑޮލަރު ދިނުމަށް އެސްޓީއޯއިން ވަނީ ނިންމާފައެވެ. މީގެ އިތުރުން މުޅި ޕްރޮމޯޝަންގެ ތެރެއިން ނަސީބުވެރި 10 ފަރާތެއް ހޮވައި، އެފަރާތްތަކަށް އަގުހުރި އިނާމުތަކެއް ދިނުމަށް އެސްޓީއޯއިން ވަނީ ނިންމާފައެވެ.
2022 ވަނަ އަހަރުގެ ރަމަޒާން ބަޒާރަށް އެސްޓީއޯއިން މުޅިން އަލަށް ޑިޖިޓަލް ކޫޕަން ތައާރަފް ކޮށްފައިވާއިރު އެކުންފުނީގެ އަމާޒަކީ ކުންފުނީގެ އޮޕަރޭޝަން ތަކުގައި ކަރުދާސް ބޭނުން ކުރުން ވީހާވެސް މަދުކޮށް ތިމާވެއްޓާއި ރައްޓެހި ގޮތްގޮތަށް ކުންފުނީގެ އޮޕަރޭޝަންސް ބައްޓަން ކުރުމެވެ.
އެސްޓީއޯ ހޯމް އިމްޕްރޫވްމަންޓު އަދި އެސްޓީއޯ ރީޖަނަލް ފިހާރަތަކުގެ ހޯމް އިމްޕްރޫވްމަންޓް މުދަލުން ރަމަޒާން ބާޒާރު ފަށާފައިވާއިރު، އެސްޓީއޯ ސުޕަރމާޓްގައި ރަމަޒާން ބާޒާރު ސޭލް މާޗް މަހުގައި ފަށަން އެކުންފުނިން ވަނީ ނިންމާފައެވެ.
