އިނގިރޭސި ޕްރިމިއާ ލީގުގެ ތާވަލުގެ ފުލުގައި އޮތް ބާންލީ އިން މެންޗެސްޓާ ޔުނައިޓެޑާއި އެއްވަރުކޮށްފިއެވެ.

އަންގާރަ ދުވަހުގެރޭ ބާންލީ ދަނޑުގައި ކުޅުނު މި މެޗު އެއްވަރުވީ 1-1 ގެ ނަތީޖާއަކުންނެވެ.

މެޗު ފަށައިގެން ޔުނައިޓެޑުން ބާންލީގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލިއިރު، މެޗުގެ ވަރަށް ކުރީކޮޅު ޔުނައިޓެޑުގެ ރަފައެލް ވަރާން ލަނޑު ޖެހި ނަމަވެސް ވީޑިއޯ އެސިސްޓެންޓް ރެފްރީ (ވީއޭއާރް) ބެލުމަށްފަހު ރެފްރީ ނިންމީ އެ ލަނޑު ޖެހުމުގެ ކުރިން ޔުނައިޓެޑުގެ ކެޕްޓަން ހެރީ މެގުއާ ފައުލެއް ކޮށްފައިވާ ކަމަށެވެ.

މެޗުގެ ލީޑު ޔުނައިޓެޑުން ނެގީ 18 ވަނަ މިނެޓުގައެވެ. ލޫކް ޝޯގެ އެހީތެރިކަމާއެކު މި ލަނޑު ޔުނައިޓެޑަށް ކާމިޔާބު ކޮށްދިނީ ޕައުލް ޕޮގްބާއެވެ. އަދި އޭގެ އިރުކޮޅެއް ފަހުން ބާންލީގެ ޖޯޝް ބްރައުންހިލް އަތުން ބައިކޮޅަށް ލަނޑު ވަން ނަމަވެސް ރެފްރީ ނިންމީ އެ އެޓޭކުގައި ޕޮގްބާ ބޮލުން ޖަހަން އެރުމުގެ ތެރޭގައި ބާންލީ ކުޅުންތެރިއަކަށް ފައުލް ކޮށްފައިވާ ކަމަށެވެ.

އޭގެ ފަހުން ޔުނައިޓެޑުގެ އެޑިސަން ކަވާނީއަށް ވަނީ ލަނޑު ޖަހަން ރަނުގެ ފުރުސަތެއް ލިބިފައެވެ. އޭރިއާ ތެރެއިން ހުހަށްހުރެ ކަވާނީ ބޮލުން ފޮނުވާލި ހަމަލާގެ ހުރަހަކަށްވީ ބާންލީގެ ކީޕަރު ނިކް ޕޯޕްއެވެ.

މެޗުގެ ދެވަނަ ހާފުގައި ބާންލީން ކުޅުން ރަނގަޅުކޮށް ޔުނައިޓެޑްގެ ގޯލަށް ނުރައްކާކުރިއިރު، މެޗުގެ 47 ވަނަ މިނެޓުގައި ބާންލީން ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ޖޭ ރޮޑްރިގޭޒްއެވެ.

ޔުނައިޓެޑް މޮޅުނުވެވުމުގެ ފައިދާ ނަގާ ވެސްޓު ހޭމް ޔުނައިޓެޑުން ވަނީ ވަޓްފޯޑް އަތުން 1-0 ގެ ނަތީޖާއަކުން މޮޅުވެ ލީގު ތާވަލުގެ ހަތަރުވަނައަށް ޖެހިލައިފައެވެ. އެއީ 24 މެޗުން 40 ޕޮއިންޓް ހޯދައިގެންނެވެ. ފަސްވަނައިގައި އޮތް ޔުނައިޓެޑަށް 23 މެޗުން ލިބިފައިވަނީ 39 ޕޮއިންޓެވެ.