ހުށަހެޅޭ މައްސަލަތަކުގައި އެންމެ ބޮޑު މަޤުސަދަކީ ދެ ފަރާތް ސުލްޙަކުރުން: ޖިހާދާ
މައްސަލަތައް ތަހުޤީޤުކުރާއިރު މައްސަލަ ހުށަހަޅާ ފަރާތަށް ދެވޭނެ އެންމެ ރަނގަޅު ހައްލަކީ ކޮބައިތޯ ބަލާނެ
ޖިހާދާ އަނީސް/ އޮމްބަޑްސްޕަރސަން
އިންތިޤާލީ އިންސާފުގެ އޮމްބަޑްސްޕަރސަންގެ އޮފީހަށް ހުށަހެޅޭ ހުރިހާ މައްސަލަތައް ބަލާއިރު އެންމެ ބޮޑު އިސްކަމެއްދެނީ މައްސަލަ ހުށަހަޅާ ފަރާތާއި މައްސަލަ ރައްދުވާ ފަރާތް ސުލްޙަކުރުމަށްކަމަށް އޮމްބަޑްސްޕަރސަން ޖިހާދާ އަނީސް ވިދާޅުވެއްޖެއެވެ.
އެއޮފީހުން ބަލަމުންދާ މައްސަލަތަކާއި ބާއްވާ ޕަބްލިކް ހިޔަރިންގތަކާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅުދައްކަވަމުން ޖިހާދާ ވިދާޅުވީ އިންތިޤާލީ އިންސާފުގެ އޮމްބަޑްސްޕަރސަން އޮފީހުގެ ޤާނޫނުގައި އަނިޔާ ލިބޭ ފަރާތްތަކަށް ބަދަލު ދިނުމާއެކު ދެން ދެވޭނެ ފަރުވާތައްވެސް ހިމަނާފައިވާކަމަށެވެ. އެހެންކަމުން މައްސަލަތައް ތަހުޤީޤުކުރާއިރު މައްސަލަ ހުށަހަޅާ ފަރާތަށް ދެވޭނެ އެންމެ ރަނގަޅު ހައްލަކީ ކޮބައިތޯ ބައްލަވާކަމަށް ޖިހާދާ ވިދާޅުވިއެވެ.
ކަމުގެ ބާވަތަށް ބަލާއިރު ބައެއް ފަރާތްތަކުން ދައުލަތުގެ ފަރާތުން މަޢާފަށް އެދުމަށް ހުށަހަޅާކަމަށާއި މާލީ ގޮތުން ބަދަލު ނަގައިދޭންވެސް ހުށަހަޅާކަމަށެވެ. އަދި މައްސަލަތައް ތަހުޤީޤު ކުރަމުންދާއިރު އެއީ ކުރެވިދާނެ ކަމެއްތޯ ބަލާނެކަމަށް ޖިހާދާ ވިދާޅުވިއެވެ.
ޖިހާދާ ވިދާޅުވީ ޕަބްލިކް ހިޔަރިންގ ތަކަކީވެސް ޤާނޫނުން ފޯރުކޮށްދޭ ފަރުވާއެއްކަމަށެވެ. އެގޮތުން އެމީހުންގެ ވާހަކަތައް އާންމުންނަށް ހަމައަށް ގެނެސްދީ އެމީހުންގެ ހިތަށް ތަސައްލީއެއް އޭގެ ސަބަބުން ލިބޭނެކަމަށް ޖިހާދާ ވިދާޅުވިއެވެ. އަދި ޕަބްލިކް ހިޔަރިންގ ގެ ޒަރީއާއިން ތަހުޤީޤަށް މައުލޫމާތު އެއްކުރެވިގެންދާނެ ކަމަށް ޖިހާދާ ވިދާޅުވިއެވެ.
ތިނަދޫގެ މައްސަލައަށް އަލިއަޅުވާލައްވާ ޖިހާދާ ވިދާޅުވީ 1962 ވަނަ އަހަރު ގދ. ތިނަދޫއިން މީހުން ބޭލި ހާދިސާއާއި ގުޅިގެން އޮމްބަޑްސްޕަރސަން އޮފީހަށް ތިނަދޫގެ ވަކިވަކި ފަރުދުންގެ އިތުރުން ކައުންސިލުންވެސް މައްސަލަތައް ހުށަހަޅާފައިވާކަމަށެވެ. މިމައްސަލަތައް ބެލުމަށްފަހު މިއީ އޮމްބަޑްސްޕަރސަން އޮފީހަށް ބެލޭނެކަމަކަށްވާތީ މައްސަލަ ބެލުމަށް ނިންމީ ކަމަށާއި ޕަބްލިކް ހިޔަރިންގ އަށް ދާން ނިންމީ މައްސަލައިގެ ބާވަތުން ކަމަށް ޖިހާދާ ވިދާޅުވިއެވެ.
މިމައްސަލައިގެ ޕަބްލިކް ހިޔަރިންގ ބޭއްވުމަށް މުއައްސަސާތަކާއި ވާހަކަދައްކަމުންދާ ކަަމަށް ޖިހާދާ ވިދާޅުވިއެވެ. އެކަމަށްވާންޖެހޭ ތައްޔާރީތައް ވަމުންދާކަމަށާއި މިމައްސަލައިގައި ބަޔާން ނަގަންޖެހޭ ފަރާތްތަކުގެ ބަޔާންތައް މިހާރުވެސް ނަގަމުންދާކަމަށް ޖިހާދާ ވިދާޅުވިއެވެ. މިދިޔަ މަހު އޮމްބަޑްސްޕަރސަން އޮފީހުގެ ފަރާތުން ތިނަދޫއަށް ދަތުރެއްގޮސް މިކަމުގައި އަނިޔާ ލިބިފައިވާ ފަރާތްތަކާއި ވާހަކަދައްކާ ބަޔާންތައް ނަގާފައިވާކަމަށްވެސް ޖިހާދާ ވިދާޅުވިއެވެ.
އަދި ޕަބްލިކް ހިޔަރިންގ އާއި ގުޅޭގޮތުން މައުލޫމާތުދީ ހޭލުންތެރިކަން އިތުރުކުރުމަށްވެސް ތިނަދޫއަށް ދަތުރުކުރުމަށް ހަމަޖެހިފައިވާކަމަށް ޖިހާދާ ވިދާޅުވިއެވެ.
މައްސަލަތަކުގެ އަޑުއެހުންތައް މާރޗު މަހުގެ 03 އިން 05 އަށް ގދ. ތިނަދޫގައި ބޭއްވުމަށް ވަނީ ނިންމާފައެވެ. އަދި މި މައްސަލައިގެ އިތުރު އަޑުއެހުންތަކެއް މާރޗު މަހުގެ 18 އަދި 19 ވަނަ ދުވަހު މާލޭ ސިޓީގައިވެސް ބޭއްވުމަށް ވަނީ ނިންމާފައެވެ. މި ޕަބްލިކް ހިއަރިންގތަކުގައި ބަޔާން ދިނުމަށް އެދޭ ފަރާތްތަކުން 01 ފެބުރުވަރީ އިން ފެށިގެން 15 ފެބުރުވަރީ އާއި ދެމެދު ނަންނޯޓުކުރުމުގެ ފުރުސަތު ވަނީ ހުޅުވާލާފައެވެ.
