ގދ. ތިނަދޫން މީހުން ބޭލި ހާދިސާގެ ބަޔާން ދިނުމަށް ނަންނޯޓު ކުރުމަށް ހުޅުވާލައިފި

1962 ވަނަ އަހަރު ގދ. ތިނަދޫއިން މީހުން ބޭލި ހާދިސާގައި ނިޒާމީ ސިފައެއްގައި ރާވައިގެން ދައުލަތުގެ އިދާރާއަކުން ނުވަތަ ދައުލަތުގެ އިދާރާއެއްގެ އިސް ހިންގުންތެރިއަކު ހިންގި ކަމަށް ބުނެ އިންތިޤާލީ އިންސާފުގެ އޮމްބަޑްސްޕަރސަންގެ އޮފީހަށް ހުށަހަޅާފައިވާ މައްސަލަތަކުގައި ހިނގާފައިވާ އިންސާނީ ޙައްޤުތަކާއި އަސާސީ މިނިވަންކަމާ ޚިލާފު ޢަމަލުތަކުގެ ސަބަބުން އަނިޔާ ލިބިފައިވާ ފަރާތްތަކުގެ ވާހަކަތައް އާންމުކޮށް ހިއްސާކުރުމުގެ ފުރުޞަތު ފަހިކޮށްދިނުމުގެ ގޮތުން  ޕަބްލިކް ހިއަރިންގތަކެއް ބޭއްވުމަށް ނިންމައިފިއެވެ.

އެކަމާއި ގުޅިގެން އިންތިގާލީ އިންސާފުގެ އޮމްބަޑްސްޕާސަން އޮފީހުން ބުނީ މި މައްސަލައާއި ގުޅޭ އިތުރު މަޢުލޫމާތު ހޯދުމުގެ ގޮތުން، އިންތިޤާލީ އިންސާފުގެ އޮމްބަޑްސްޕަރސަންގެ އޮފީހުން މައްސަލަތައް ބެލުމުގައި ޢަމަލުކުރާނެ އިޖުރާޢަތުގެ ގަވާއިދުގެ 43 ވަނަ މާއްދާގެ (ހ) ގެ ދަށުން އާންމުކޮށް ހުޅުވާލައިގެން އަދި އާންމުކޮށް ހުޅުވާނުލައި ޕަބްލިކް ހިއަރިންގތަކެއް ބޭއްވުމަށް ނިންމާފައިވާކަމަށެވެ. މައްސަލަތަކުގެ އަޑުއެހުންތައް މާރޗު މަހުގެ 03 އިން 05 ވަނަ ދުވަހު ގދ. ތިނަދޫގައި ބޭއްވުމަށް ވަނީ ނިންމާފައެވެ.

އަދި މި މައްސަލައިގެ އިތުރު އަޑުއެހުންތަކެއް މާރޗު މަހުގެ 18 އަދި 19 ވަނަ ދުވަހު މާލޭ ސިޓީގައިވެސް ބޭއްވުމަށް ވަނީ ނިންމާފައެވެ. މި ޕަބްލިކް ހިއަރިންގތަކުގައި ބަޔާންދިނުމަށް އެދޭ ފަރާތްތަކުން 01 ފެބުރުވަރީ އިން ފެށިގެން 15 ފެބުރުވަރީ އާއި ދެމެދު ނަންނޯޓުކުރުމުގެ ފުރުސަތު ހުޅުވާލާފައިވާކަމަށް އިންތިގާލީ އިންސާފުގެ އޮމްބަޑްސްޕާސަން އޮފީހުން ބުނެއެވެ.

އެގޮތުން ބަޔާންދޭން ބޭނުންވާ ފަރާތަތްކަގެ ފުރިހަމަ ނަމާއި ،އައިޑީ ކާޑު ނަންބަރު، ގުޅޭނެ ނަންބަރު، ދާއިމީ އެޑްރެސް، މިހާރު ދިރިއުޅޭ އެޑްރެސް، މި ހާދިސާއާ ގުޅޭގޮތް ނުވަތަ މަޢުލޫމާތު އެނގޭ ގޮތް، ބަޔާންދޭން ބޭނުންވަނީ ލިޔުމުންތޯ ނުވަތަ ހާޒިރުވެގެންތޯ އަދި ބަޔާންދޭން ބޭނުންވަނީ ގދ. ތިނަދޫގައިތޯ ނުވަތަ މާލޭ ސިޓީގައިތޯ ބަޔާންކުރުމަށްފަހު 7223473 އަށް ފޯނުން ގުޅައި، ނުވަތަ އެސް.އެމް.އެސް މެދުވެރިކޮށް އަދިhearings@otj.gov.mv އަށް އީމެއިލް ކޮށްގެން މި މަޢުލޫމާތުތައް ހިއްސާކުރުމަށް ވަނީ އެދިފައެވެ.

އިންތިގާލީ އިންސާފުގެ އޮމްބަޑްސްޕާސަން އޮފީހުން ވަނީ ޕަބްލިކް ހިއަރިންގައި ހާޒިރުވެ ނުވަތަ ލިޔުމުން ބަޔާންދޭން ފުރުޞަތުދެވޭނެ ފަރާތްތައް ކަނޑައަޅާނެ ގޮތް އާންމުކޮށްފައެވެ. އެގޮތުން ޕަބްލިކް ހިއަރިންގައި ބަޔާން ދިނުމަށް ފުރުޞަތު ދޭ ފަރާތްތައް ކަނޑައަޅާނެ ވަކި ތަރުތީބެއް ވަނީ ކަނޑައަޅާފައެވެ. ތަރުތީބު ކަނޑައަޅާނީ ނަންނޯޓުކުރާ ފަރާތްތަކުން ދޭ މަޢުލޫމާތާއި ޕަބްލިކް ހިއަރިންގ ބާއްވާ މައްސަލައާއި ގުޅުން އޮތް މިންވަރު ދެނެގަތުމަށްފަހުކަމަށް އެއޮފީހުން ބުނެއެވެ.

މައްސަލައިގައި އަނިޔާ ލިބިފައިވާ ފަރާތްތައް ކަމަށް ބަލަނީ ސީދާގޮތުންނާއި ޖިސްމާނީ އަދި ނަފްސާނީ އަނިޔާ ލިބުނު ފަރާތްތަކާއި ނުސީދާ ގޮތުން ނަފްސާނީ އަނިޔާ ލިބުނު ފަރާތްތަކާއި އެއިރުގައި ރަށުގައި ދިރިއުޅުނު ފަރާތްތަކުގެ ތެރެއިން އެ ހާދިސާ ފެނި ތަޖުރިބާކުރެވުނު ފަރާތްތަކެވެ.

މައްސަލަ ރައްދުވާ ފަރާތްތައްކަމަށް ބަލަނީ ހާދިސާ ގައި ދައުލަތުގެ ފަރާތުން ހަރަކާތްތެރިވި މީހުންނަށެވެ. މައްސަލައިގައި މަޢުލޫމާތު އެނގޭ ފަރާތްތައް ކަމަށް ބަލަނީ ހާދިސާ ތަހައްމަލްކުރި ފަރާތްތަކާއި ހާދިސާ ތަޙައްމަލްކުރި ފަރާތްތަކުގެ އާއިލާގައި ހިމެނޭ ފަރާތްތަކާއި ހާދިސާ ތަޙައްމަލްކުރި ފަރާތްތަކުން ހާދިސާގެ ކަންކަން ހިނގައި ދިޔަ ގޮތް ކިޔައިދީފައިވާ ފަރާތްތައް އަދި ހާދިސާ އާއި ގުޅޭގޮތުން ދިރާސާކޮށްފައިވާ ފަރާތްތަކެވެ.

މައްސަލައާއި ގުޅުންހުރި މުއައްސަސާތަކުގައި މަސައްކަތްކުރި ނުވަތަ މިހާރު މަސައްކަތްކުރަމުންދާ ފަރާތްތައްވެސް ހިމަނާފައިވެއެވެ.