މަތީ ތައުލީމު އުނގަންނައިދޭ މަރުކަޒުތަކުގެ އެންމެ މުހިންމު އަމާޒަކީ ވަށާޖެހޭ ތައުލީމެއް ކަށަވަރު ކޮށްދިނުން: ޝަރީފް
5 ފެބުރުއަރީ 2022 | ހޮނިހިރު 16:10ކިލާހުގައި ކިޔެވުމުގެ އިތުރުން، އިތުރު ހަރަކާތްތެރިތަކުގައި ބައިވެރިވެ އުޅުމަކީ ވަރަށް ބޭނުންތެރިކަމެއް
އެމްއެންޔޫގެ ވައިސް ޗާންސެލަރ ޑރ. މުހައްމަދު ޝަރީފް
މަތީ ތައުލީމު އުނގަންނައިދޭ މަރުކަޒުތަކުގެ އެންމެ މުހިންމު އަމާޒަކީ ވަށާ ޖެހޭ ތައުލީމެއް ކަށަވަރު ކޮށްދިނުން ކަމަށް ގައުމީ ޔުނިވަރސިޓީ (އެމްއެންޔޫ)ގެ ވައިސް ޗާންސެލަރ ޑރ. މުހައްމަދު ޝަރީފް ވިދާޅުވެއްޖެއެވެ.
އެމްއެންޔޫގެ ދުރުމީ މަޖައްލާގައި ޝަރީފް ވިދާޅުވީ, ތައުލީމުގެ އިތުރުން މަސައްކަތުގެ މައިދާނުން ކުރިއަރައި ދިއުމަށް ކިލާހުގައި ލިބިގަންނަ ފިލާވަޅަކުން އެކަނި ފުރިހަމަ ނުކުރެވޭނެ ކަމަށެވެ. އެގޮތުން ކިލާހުން ބޭރުގައި، އެކިއެކި ހަރަކާތްތައް ރާވައި އިންތިޒާމުކޮށް، އިލްމީ ބަހުސްތަކުގައި ބައިވެރިވެ، އަދި ތަފާތު ޚިޔާލުތައް ތަރައްގީކުރުމަކީ މަތީ ތައުލީމުގެ ތަޖުރިބާއަށް ލިބޭ ކުރިއެރުމެއް ކަމަށެވެ. އެހެންކަމުން ކިލާހުގައި ކިޔެވުމުގެ އިތުރުން އިތުރު ހަރަކާތްތަކުގައި ބައިވެރިވެ އުޅުމަކީ ވަރަށް ބޭނުންތެރި ކަމެއް ކަމަށް ޝަރީފް ވިދާޅުވިއެވެ.
މީގެ އިތުރުން ޝަރީފް ވިދާޅުވީ, އެމްއެންޔޫގައި ވެސް އިތުރު ހަރަކާތްތައް ކުރިއަށް ގެންދިއުމަށް ބާރުއަޅާ ކަމަށާއި، އިތުރު ހަރަކާތްތަކުން ދަރިވަރުންގެ ކެރުންތެރިކަމަަށް ކުރިއެރުން ލިބޭ ކަމަށެވެ. އެގޮތުން ދޭދޭ މީހުންނާ މުއާމަލާތުކުރުމާއި، ހިންގުންތެރިވުމާއި، މައުލޫމާތު ހޯދައި ދިރާސާ ކުރުމާއި، މީހުންނާ އެކުގައި މަސައްކަތްކުރަން ދަސްވުމާއި، އަމިއްލައަށް އިސްނެގުމާއި، ކެރުންތެރިކަމުގެ އިތުރުން, އުފެއްދުންތެރި ބިނާކުރަނިވި ވިސްނުން ފުޅާވެ ދަރިވަރުންގެ ސިކުނޑި އެތައް ގުނައަކުން ކުރިއަރައި ނަފްސު ތަރައްގީވާކަމަށް ޝަރީފް ވިދާޅުވިއެވެ.
ވަޒީފާގެ ބާޒާރަށް އިޝާރާތް ކުރައްވައި ޝަރީފް ވިދާޅުވީ, މީހާއަށް ލިބިފައިވާ ސަނަދުގެ އިތުރުން އެމީހަކަށް ލިބިފައިވާ ހުނަރުވެރިކަމާ ތަޖުރިބާއަށް ވަރަށް ބޮޑަށް ބަލާ ކަމަށާއި، މިއަދު, ސަނަދުގެ އިތުރުން ތަޖުރިބާ ވަރަށް މުހިންމު ކަމަށެވެ. އަދި މަތީ ތައުލީމަކީ ހަމައެކަނި ފޮތަކުން، ކިލާހަކުން، އެދުރަކުން، ސެޓިފިކެޓަކުން ނިންމާލެވޭނޭ ތަޖުރިބާއެއް ނޫން ކަމަށާއި، ތަޖުރިބާގެ މަންފާކުރާނީ, އަދި ފުރިހަމަ ބޭނުން ކުރެވޭނީ ދަރިވަރުން އަމިއްލައަށް މިތަޖުރިބާ ފުޅާކުރަން މަސައްކަތްކުރި ވަރަކުން ކަމަށެވެ.
ޝަރީފް ވިދާޅުވީ ކުރިއަށް އޮތްތަނުގައި ދަރިވަރުންގެ ނަފްސު ތަރައްގީކޮށް އެކިއެކި ހަރަކާތްތަކުގައި ބައިވެރިވުން އިތުރުކުރަން ޖެހޭ ކަމަށެވެ. އެއީ މުޖުތަމައާ އޮންނަ ގުޅުން ބަދަހިކުރުމަށް ލިބޭ ފަހިފުރުސަތެއް ކަމަށް އޭނާ ވިދާޅުވިއެވެ.
