ޑީޖޭއޭއާއި، އަތޮޅުތެރޭގެ ހުރިހާ މެޖިސްޓްރޭޓް ކޯޓްތަކަށް އައިޓީ ސަޕޯޓް ފޯރުކޮށްދިނުމަށް އެންމެ 3 އޮފިސަރުން
މިވަގުތު ކޯޓުގެ އައިޓީ ކަންކަން ބެލުމަށް ވަގުތީ ގޮތުން އެހީ ހޯދަނީ ޑީޖޭއޭގެ އައިޓީ އޮފިސަރެއްގެ ފަރާތުން
ކްރިމިނަލް ކޯޓް- ކްރިމިނަލް ކޯޓުގައިވެސް އައިޓީ އޮފިސަރެއް ނެތި 4 މަސް ވަނީ ވޭތުވެގެން ގޮސްފައި
ކްރިމިނަލް ކޯޓުގެ, ހުސްވެފައިވާ އައިޓީ މުވައްޒަފުންގެ މަގާމަށް މީހުން ހޯދުން އަވަސްކުރުމަށްޓަކައި ކޯޓާ ގުޅިގެން ކުރަންޖެހޭ އެންމެހައި މަސައްކަތްތައް ކުރިއަށްދާކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)އިން ބުނެފިއެވެ.
ކްރިމިނަލް ކޯޓުގައި ޝަރީއަތްތައް ލައިވް ނުކުރެވެނީ އެކަމަށް ބޭނުންވާ އިންސާނީ ވަސީލަތްތައް އެކަށީގެންވާ ގޮތެއްގައި ނެތުމުންކަމަށް އެ ކޯޓުން ބުނެފައިވާއިރު، އެކަމާ ގުޅޭގޮތުން ރާއްޖެއެމްވީން ސުވާލު ކޮށްލުމުން ޑީޖޭއޭއިން ބުނީ، މިވަގުތު ކްރިމިނަލް ކޯޓުގައި އައިޓީ މުވައްޒަފުން ނެތުމުގެ ސަބަބުން ކޯޓަށް ބޭނުންވާ އެންމެހައި އައިޓީ ސަޕޯޓް ފޯރުކޮށްދެމުންދަނީ ޑީޖޭއޭގެ އައިޓީ މުވައްޒަފުން ކަމަށެވެ.
އެ އިދާރާއިން މައުލޫމާތު ދޭ ގޮތުގައި ޑީޖޭއޭއާއި، އަތޮޅުތަކުގައި ގާއިމުވެފައިވާ މެޖިސްޓްރޭޓް ކޯޓުތަކަށް ވެސް ބޭނުންވާ އައިޓީ ސަޕޯޓް ފޯރުކޮށްދެނީ އެ އިދާރާގެ 3 އައިޓީ މުވައްޒަފުންނެވެ.
އޭގެ އިތުރުން، ކެޕޭސިޓީ އެ މިންވަރުގައި ހުރި ނަމަވެސް ކްރިމިނަލް ކޯޓަށް ބޭނުންވާ އައިޓީ ސަޕޯޓް ބޭނުންވާ ވަގުތެއްގައި، ބޭނުންވާ މިންވަރަކަށް އެ ޑިޕާޓްމަންޓުން ފޯރުކޮށްދެމުންދާނެކަން ފާހަގަ ކޮށްފައިވެއެވެ. އަދި އެކޯޓުން ހުސްވެފައިވާ އައިޓީ މުވައްޒަފުންގެ މަގާމަށް މީހުން ހޯދުން އަވަސްކުރުމަށްޓަކައި ކޯޓާ ގުޅިގެން ކުރަންޖެހޭ އެންމެހައި މަސައްކަތްތައް ކުރިއަށްދާކަމަށްވެސް ޑީޖޭއޭއިން ވަނީ ބުނެފައެވެ.
ކްރިމިނަލް ކޯޓުގައި ކުރިއަށް ދިޔަ އަޑުއެހުމެއްގައި ކޯޓުގެ އިސްގާޒީ އަހުމަދު ޝަކީލް ވަނީ ކޯޓުގައި އެކަށީގެންވާ ވަސީލަތްތައް ނެތްކަމަށް ވިދާޅުވެ، ޝަރީއަތް މިވަގުތު ލައިވް ކުރެވެން ނެތްކަމަށް ވިދާޅުވެފައެވެ. އަދި ވަސީލަތްތައް ހަމަޖެހުނުހާ އަވަހަށް ޝަރީއަތް ލައިވް ކޮށްގެން ކުރިއަށް ގެންދިއުމަށް ހުރަހެއް ނެތްކަމަށް ގާޒީ ޝަކީލް އެ ދުވަހުގެ އަޑުއެހުމުގައި ވިދާޅުވިއެވެ.
އެކަމާގުޅޭގޮތުން ރާއްޖެއެމްވީން ސުވާލު ކުރުމުން ކްރިމިނަލް ކޯޓުގެ މީޑިއާ އޮފިޝަލު އަމާން މުހައްމަދު ނަޖީބު ވިދާޅުވީ، އިސްގާޒީ ވިދާޅުވި ފަދައިން ކޯޓުގައި ވަސީލަތެއް ނެތް ކަމަށެވެ. އެގޮތުން ޝަރީއަތް ކުރިއަށް ގެންދިއުމަށް ބޭނުންވާ ވަސީލަތްތަކަށް ބަލާއިރު، އެކަމަށް ބޭނުންވާ އިކުއިޕްމަންޓްސް ކޯޓުގައި ހުރި ނަމަވެސް، އެކަމަށް ބޭނުންވާ އިންސާނީ ވަސީލަތްތައް ނެތްކަން އޭނާ ފާހަގަ ކުރެއްވިއެވެ.
އަމާން ވިދާޅުވީ، ފާއިތުވި ދުވަސްތަކުގައި ކޮމްޕިއުޓަރ ޓެކްނީޝަނެއް ހޯދުމަށް ކްރިމިނަލް ކޯޓުން 3 ފަހަރު އިއުލާނު ކޮށްފައިވާ ކަމަށެވެ. އަދި ސީނިއަރ ކޮމްޕިއުޓަރ ޓެކްނީޝަނެއް ހޯދުމަށް އެއް ފަހަރު އިއުލާނު ކޮށްފައިވާއިރު، އެންމެ ފަހުން ކޮށްފައިވާ އިއުލާނުގެ މުއްދަތު ހަމަވެފައިވަނީ 2022 ޖަނަވަރީ 23އަށް ކަމަށެވެ. އަމާން ވިދާޅުވި ގޮތުގައި އެކަށީގެންވާ ފަރާތެއް ނެތުމުގެ ސަބަބުން އެ މަގާމު ހުންނަނީ ހުސްކޮށް ކަމަށެވެ. އަދި މިވަގުތު ކޯޓުގެ އައިޓީ ކަންކަން ބެލުމަށް ވަގުތީ ގޮތުން އެހީ ހޯދަނީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ގެ އައިޓީ އޮފިސަރެއްގެ ފަރާތުންނެވެ.
އަމާން ވިދާޅުވި ގޮތުގައި ޝަރީއަތް ލައިވް ކޮށްގެން ކުރިއަށް ގެންދިއުމަށް ޑީޖޭއޭގެ އައިޓީ އޮފިސަރު މުޅި އަޑުއެހުމުގައި ކްރިމިނަލް ކޯޓުގެ މަސައްކަތަށް ބޭނުން ކުރުމުން ޑީޖޭއޭގެ މަސައްކަތްތަކަށް އެކަމުގެ ގޮންޖެހުމާއި ކުރިމަތިލާންޖެހޭކަމަށެވެ. ސަބަބަކީ ޑީޖޭއޭއަކީ ޖުމުލަކޮށް ހުރިހާ ކޯޓެއްގެ އިދާރީ ކަންކަމާއި ހަވާލުވެ އޮންނަ އިދާރާކަމަށްވާތީކަމުގައި އަމާން ވިދާޅުވިއެވެ.
ކްރިމިނަލް ކޯޓުން އެކި ފަހަރުމަތިން އެ މަގާމަށް މީހަކު ހޯދުމަށް މަސައްކަތް ކޮށްފައިވެއެވެ. އެގޮތުން އެންމެ ފަހުން ކޮށްފައިވާ އިއުލާނަށް ބަލާއިރު، ސީނިއަރ ކޮމްޕިއުޓަރ ޓެކްނީޝަނެއް ހޯދުމަށް ކޮށްފައިވާ އިއުލާނުގެ މުއްދަތު ހަމަވެފައިވަނީ ޖަނަވަރީ 23 ވަނަ ދުވަހުގެ 13:00 އަށެވެ. އެ މަގާމަށް އަސާސީ މުސާރައިގެ ގޮތުގައި 7035 ރުފިޔާ ލިބޭއިރު، އެލަވަންސްތަކާއެކު 15000އަށްވުރެ ބޮޑު މުސާރައެއް ހުށަހަޅާފައިވެއެވެ.
