ށ. ކޮމަންޑޫގައި ވޯޓުލުން ފެށިގެން ކުރިއަށް
ހޮނިހިރު ދުވަހުގެ ހެނދުނު 8:00ގައި، ދެ ސްކޫލްގައި ވަނީ ވޯޓުލުން ފަށާފައި
ށ. އަތޮޅު ތައުލީމީ މަރުކަޒުގައި ވޯޓުލުން ފެށިގެން ކުރިއަށް ދަނީ
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގެ ވޯޓުލުން ށ. ކޮމަންޑޫގައި ފަށައިފިއެވެ.
ހޮނިހިރު ދުވަހުގެ ހެނދުނު 8:00ގައި ވޯޓުލުން ފަށާފައިވަނީ ށ. އަތޮޅު ތައުލީމީ މަރުކަޒާއި ށ. ކޮމަންޑޫ ޕްރީ ސްކޫލްގައެވެ. ށ. އަތޮޅު ތައުލީމީ މަރުކަޒުގައި ބަހައްޓާފައިވާ ވޯޓު ފޮއްޓަށް ވޯޓުލުމުގެ ހައްގު ލިބިފައިވަނީ 365 މީހުންނަށެވެ. އަދި ށ. ކޮމަންޑޫ ޕްރީ ސްކޫލުގައި ބަހައްޓާފައިވާ ވޯޓު ފޮއްޓަށް ވޯޓުލުމުގެ ހައްގު ލިބިފައިވަނީ 347 މީހުންނަށެވެ.
ވޯޓުލުމުގެ ކަންތައްތައް ކޮަމަންޑޫގައި ވަރަށް އަމާންކަމާއެކު ކުރިއަށްދާއިރު, ދެ ސްކޫލްގައި ވެސް އަދި ކިޔޫ ހަދާފައެއް ނުވެއެވެ. އެހެންނަމަވެސް ވޯޓު ލުމަށްޓަކައި މަދުމަދުން މީހުން ދަނީ އަންނަމުންނެވެ.
ވޯޓުލުން ށ. ކޮމަންޑޫގައި ފަށާފައިވާއިރު, އިލެކްޝަންގެ ކަންތައްތައް އިންތިޒާމުކުރުމަށް ށ. ފޯކައިދޫއަށް ފޮނުވާފައިވާ އިލެކްޝަންސް ކޮމިޝަން (އީސީ)ގެ އޮފިޝަލުން އިންތިޚާބަށް ނުފޫޒު ފޯރުވާކަމުގެ ވާހަކަތައް ވަނީ ފެންމަތިވެފައެވެ. އެހެންނަމަވެސް އީސީން ވަނީ މިކަން ދޮގު ކޮށްފައެވެ. އީސީގެ ރައީސް ފުއާދު ތައުފީގު ވިދާޅުވީ, އޮފިޝަލުން ތިބީ (އިދިކޮޅު ޕީޕީއެމްވެސް ހިމެނޭގޮތަށް) ހުރިހާ ފަރާތްތަކާ މަޝްވަރާކުރުމަށްފަހު، އެފަރާތްތަކުގެ އެއްވެސް މައްސަލައެއް ނެތުމުން ކަމަށެވެ.
މި އިންތިޚާބަކީ 100 އިންސައްތަ އިންސާފުވެރި އިންތިޚާބެއްކަމަށް ގަބޫލުކުރައްވާ ކަމަށާއި، އިދިކޮޅުން ފާހަގަކުރާފަދަ އަމަލެއް އީސީގެ މެމްބަރުންގެ ފަރާތުން ނުފެންނާނެކަމުގެ އިތުބާރު އޮތްކަމަށް ފުއާދު ވިދާޅުވިއެވެ.
