ކޮމަންޑޫ ދާއިރާގެ ބައި އިލެކްޝަންގައި ބެހެއްޓި 7 ފޮށީގެ ދާއިމީ ނަތީޖާ އިއުލާންކޮށްފިއެވެ.

އިލެކްޝަންސް ކޮމިޝަނުން ހޯމަ ދުވަހު ވަނީ އިންތިޚާބުގެ ދާއިމީ ނަތިޖާ ދައްކާ ގޮތުންވެސް އިންތިޚާބު ކާމިޔާބު ކުރައްވާފައިވަނީ އެމްޑީޕީގެ ކެނޑިޑޭޓް މުޙައްމަދު ރާޝިދުއެވެ.

އިންތިޚާބުގެ ވަގުތީ ނަތީޖާ ދައްކާގޮތުން ރާޝިދަށް ވަނީ 1398 ވޯޓު ލިބިވަޑައިގެންފައެވެ. މޫސާ ފަތުހީއަށް ލިބިވަޑައިގަތީ 1160 ވޯޓެވެ. ދެން މިއިންތިޚާބުގައި ވާދަކުރެއްވީ އެމްއެންޕީ ކެންޑިޑޭޓް އަބްދުލް ހަންނާން އިދުރީސެވެ. އަބްދުލް ހަންނާނަށް ލިބިވަޑައިގަތީ 324 ވޯޓެވެ.

ވަގުތީ ނަތީޖާތަކަށް ބަލާއިރު، މިއިންތިޚާބުގައި ށ މަރޮށީގައި ބަހައްޓާފައިވާ ފޮށިން ރާޝިދަށް ލިބިވަޑައިގަތީ 161 ވޯޓެވެ. އެފޮށިން މޫސާ ފަތުހީއަށް 95 ވޯޓު ލިބިވަޑައިގެންނެވިއިރު އަބްދުލް ހަންނާނަށް ލިބިވަޑައިގަތީ 41 ވޯޓެވެ.

ށ ފޯކައިދޫގައި ބަހައްޓާފައިވާ 1 ނަންބަރު ވޯޓު ފޮށިން ރާޝިދަށް 225 ވޯޓު ލިބިވަޑައިގެންނެވިއިރު މޫސާ ފަތުހީއަށް 200 ވޯޓު އަދި އަބްދުލް ހަންނާނަށް 12 ވޯޓު ލިބިވަޑައިގެންނެވިއެވެ. ފޯކައިދޫގައި ބަހައްޓާފައިވާ 2 ނަންބަރު ވޯޓު ފޮށިން ރާޝިދަށް 195، މޫސާ ފަތުހީއަށް 201 ވޯޓު އަދި އަބްދުލްހަންނާނަށް 13 ވޯޓު ލިބިވަޑައިގެންނެވިއެވެ.

ކޮމަންޑޫ ގައި ބަހައްޓާފައިވާ 1 ނަންބަރު ވޯޓު ފޮށީގެ ނަތީޖާއަށް ބަލާއިރު ރާޝިދަށް 144 ވޯޓު ލިބިވަޑައިގެންނެވިއިރު މޫސާ ފަތުހީ އަށް 152 ވޯޓު ލިބިވަޑައިގެންނެވިއެވެ. އަބްދުލްހަންނާނަށް އެފޮށިން ލިބިވަޑައިގަތީ 37 ވޯޓެވެ. ކޮމަންޑޫގައި ބަހައްޓާފައިވާ 2 ނަންބަރު ފޮށިން ރާޝިދަށް 159 ވޯޓު ލިބިވަޑައިގެންނެވިއިރު މޫސާ ފަތުހީއަށް 92 ވޯޓު އަދި އަބްދުލްހަންނާނަށް 64 ވޯޓު ލިބިވަޑައިގެންނެވިއެވެ.

މާލޭގައި ބަހައްޓާފައިވާ 1 ނަންބަރު ވޯޓު ފޮށިން މުހައްމަދު ރާޝިދަށް 280 ވޯޓު، މޫސާ ފަތުހީއަށް 242 ވޯޓު އަދި އަބްދުލް ހަންނާނަށް 88 ވޯޓު ލިބިވަޑައިގެންނެވިއެވެ. މާލޭގައި ބަހައްޓާފައިވާ 2 ނަންބަރު ވޯޓު ފޮށިން މުހައްމަދު ރާޝިދަށް 234 ވޯޓު ، މޫސާ ފަތުހީ އަށް 178 ވޯޓު އަދި އަބްދުލްހަންނާނަށް 69 ވޯޓު ލިބިވަޑައިގެންނެވިއެވެ.

ކޮމަންޑޫ ދާއިރާގެ ބައި އިލެކްޝަން ބާއްވާފައިމިވަނީ އެދާއިރާގެ މެމްބަަރަކަށް ހުންނެވި ހުސައިން ވަހީދު އަވަހާރަވުމުންނެވެ. މީގެ ކުރީގެ އިންތިހާބުތަކުގައި ވެސް ކޮމަންޑޫ ދާއިރާގެ ގޮނޑި ފުރުއްވާފައިވަނީ އެމްޑީޕީގެ ކެންޑިޑޭޓުންނެވެ. ހުސައިން ވަހީދުގެ ކުރިން އެ ދާއިރާގެ މެމްބަރަކަށް ހުންނެވީ އަހުމަދު ނާޝިދު (އޭޑީކޭ ނާޝިދު) އެވެ.