ރާޝިދު ބައި އިލެކްޝަން ކާމިޔާބުކުރެއްވުމުން ރައީސް ޞާލިހު މަރުޙަބާ ވިދާޅުވެއްޖެ
5 ފެބުރުއަރީ 2022 | ހޮނިހިރު 15:57ރައީސް ކުރެއްވި ޓްވީޓެއްގައި ވަނީ ކޮމަންޑޫ ދާއިރާގެ ހުރިހާ ރައްޔިތުންނަށް މަރުޙަބާ ވިދާޅުވެ ކެމްޕޭނުގައި ބައިވެރިވި ހުރިހާ ބޭފުޅުންނަށް ޝުކުރު އަދާކުރައްވާފައި
ރާޝިދުގެ ކެމްޕެއިން ލޯންޗްކުރުމުގެ ޖަލްސާގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކޮމަންޑޫއަށް ވަޑައިގަތުމުގެކުރިން
ހޮނިހިރު ދުވަހު ކުރިޔަށްދިޔަ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަން އެމްޑީޕީ ކެންޑިޑޭޓް މުހައްމަދު ރާޝިދު ކާމިޔާބު ކުރެއްވުމުން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ރާޝިދު އަށާއި ދާއިރާގެ ރައްޔިތުންނަށް މަރުޚަބާ ވިދާޅުވެއްޖެއެވެ.
ގޮނޑި ކާމިޔާބުވުމުން ރައީސް ކުރެއްވި ޓްވީޓެއްގައި ވަނީ ކޮމަންޑޫ ދާއިރާގެ ހުރިހާ ރައްޔިތުންނަށް މަރުޙަބާ ވިދާޅުވެ ކެމްޕޭނުގައި ބައިވެރިވި ހުރިހާ ބޭފުޅުންނަށް ޝުކުރު އަދާކުރައްވާފައެވެ.
ކޮމަންޑޫ ދާއިރާއަށް ރާޝިދުގެ އިތުރުން ޕީޕީއެމް އިން މޫސާ ފަތުހީ އަދި އެމްއެންޕީން އަބްދުލް ހަންނާން ވާދަކުރެއްވިއެވެ. އިންތިޚާބުގެ ވަގުތީ ނަތީޖާ ދައްކާގޮތުން ރާޝިދަށް ވަނީ 1398 ވޯޓު ލިބިވަޑައިގަންނަވާފައެވެ. މޫސާ ފަތުހީއަށް ލިބިވަޑައިގަތީ 1160 ވޯޓެވެ. ދެން މިއިންތިޚާބުގައި ވާދަކުރެއްވީ އެމްއެންޕީ ކެންޑިޑޭޓް އަބްދުލްހަންނާން އިދުރީސެވެ. އަބްދުލްހަންނާނަށް ލިބިވަޑައިގަތީ 324 ވޯޓެވެ.
މިއިންތިޚާބުގެ ކެމްޕެއިން ފޯރިއައާއެކު ކުރިޔަށް ގެންގޮސްފައިވާއިރު ކެމްޕެއިންގެ ހަރަކާތްތަކަށް ރައީސް ޞާލިހު ކޮމަންޑޫ ދާއިރާއަށް ދެ ފަހަރަކު ވަޑައިގެންނެވިއެވެ. އަދި އެންމެ ފަހުން ވަޑައިގެން ދާއިރާގައި ހިމެނޭ ކޮމަންޑޫ، ފޯކައިދޫ އަދި މަރޮއްޓަށް ވަޑައިގެން ރައްޔިތުންނާ މުޚާތަބު ކުރައްވާ ވާހަކަދައްކަވާފައިވެއެވެ. ކެމްޕެއިން ލޯންޗުކުރުމަށް ބޭއްވި ރަސްމިއްޔާތަށްވެސް ރައީސް ވަޑައިގެންނެވިއެވެ. އަދި އެޖަލްސާގައި ދެ ކޮމަންޑޫ ގުޅާލުމުގެ މަޝްރޫޢު އިއުލާންކުރެއްވިއެވެ.
ކޮމަންޑޫ ދާއިރާއަށް އެމްޑީޕީން ވާދަކުރައްވި ކެންޑިޑޭޓް މުހައްމަދު ރާޝިދަށް ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީ އާއި އަދާލަތު ޕާޓީން ވަނީ ތާއީދުކޮށްފައެވެ. އަދި ކެމްޕެއިންގައި ޖޭޕީގެ ލީޑަރ ގާސިމް އިބްރާހީމް އާއި އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ ބައިވެރިވެވަޑައިގެންނަވާފައިވެއެވެ.
