ނިމިގެންދިޔަ ކޮމަނޑޫ ދާއިރާގެ ބައި އިލެކްޝަނާއި ގުޅޭ 9 ޝަކުވާއެއް ހުށަހަޅާފައިވާ ކަމަށާއި ނަމަވެސް އެއިން އެއްވެސް މައްސަލައެއްގައި ހެއްކެއް ނެތްކަމަށް އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީޤު ވިދާޅުވެއްޖެއެވެ.
ނިމިގެންދިޔަ އިންތިޚާބާއި ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން ފުއާދު ވިދާޅުވި އެއިންތިޚާބާއި ގުޅޭގޮތުން ޖުމްލަ 10 މައްސަލައެއް އީސީއަށް ހުށަހެޅިފައިވާ ކަމަށެވެ. ނަމަވެސް އޭގެ ތެރެއިން އެއް މައްސަލައެއް ރިޕީޓުވެފައިވާތީ ޖުމްލަ ހުށަހެޅުނީ ނުވަ މައްސަލަކަމަށެވެ.
ފުއާދު ވިދާޅުވީ ހުށަހެޅިފައިވާ މައްސަލަތައް ބެއްލެވީ ޤާނޫނީ ހަތަރު ވަކީލަކާއި ތަޖުރިބާކާރު އެހެން އިދާރީ ބޭފުޅަކު ހިމެނޭ ޓީމަކުން ކަމަށެވެ. ނަމަވެސް ހުށަހެޅު އެއްވެސް މައްސަލައެއްގައި ސާބިތުވާވަރަށް ހެކި ހުށަހަޅާފައި ނުވާކަމަށެވެ. ފުއާދު ވިދާޅުވީ އެމައްސަލަތައް އިތުރަށް ނުބެއްލެވީ ސާބިތުވާވަރަށް ހެކި ނެތުމުން ކަމަށެވެ. އެވަރަށް ހެކި ހުރިނަމަ ޕްރޮސެކިއުޓަރ ޖެނެރަލް އޮފީހަށް ފޮނުވައިގެން މައްސަލަ ބައްލަވާނެކަމަށްވެސް ފުއާދު ވިދާޅުވިއެވެ.
ފުއާދު ވިދާޅުވީ ދައުވާ ކުރެވޭ ވަރަށް ސާބިތު ހެއްކާއެކު މައްސަލައެއް ހުށަހެޅިއްޖެނަމަ އެމައްސަލަ ބައްލަވާނެކަމަށެވެ. އަދި އެކަމަކާއި ގުޅިގެން އަޅަންޖެހޭ ފިޔަފަޅުތައް އަޅުއްވާނެ ކަމަށެވެ.
މިފަދަ ވާދަވެރި އިންތިޚާބެއް ނިމިގެން ދިޔައިރު، އެކޮމިޝަނަށް ހުށަހެޅިފައިވާ މައްސަލަތައް ވަރަށް މަދުކަމަށްވެސް ފުއާދު ވިދާޅުވިއެވެ. އަދި މިހާ ވާދަވެރި އިންތިޚާބެއްގައިވެސް ޤަވައިދުތަކާއި ޤާނޫނުތަކަށް ހުރުމަތްތެރިކޮށް ހިތާފައިވާކަން ފުއާދު ފާހަގަކުރެއްވިއެވެ.
