މިއީ އެޖެންޑާ 19 އާއި ޖަޒީރާ ރާއްޖޭގެ ސިޔާސަތުތަކަށް ލިބުނު ކާމިޔާބީއެއް: އެމްޑީޕީ
ޖުމްހޫރީ ޕާޓީގެ ލީޑަރ ގާސިމް އިބްރާހީމާއި އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ ކުރެއްވި މަސައްކަތްތައް ފާހަގަކޮށް ޝުކުރު އަދާކުރި
އެމްޑީޕީން ބޭއްވި ނޫސްވެރިންގެ ބައްދަލުވުމުގެ ތެރެއިން
ކޮމަންޑޫ ދާއިރާގެ ބައި އިލެކްޝަން އެމްޑީޕީގެ ކެންޑިޑޭޓް މުހައްމަދު ރާޝިދު ކާމިޔާބުކުރުމަކީ އެމްޑީޕީ އަށާއި އެޖެންޑާ 19ގެ ސިޔާސަތުތަކަށް އަދި ޖަޒީރާ ރާއްޖެ މެނިފެސްޓޯގެ ސިޔާސަތުތަކަށް ލިބުނު ވަރަށް ބޮޑު ކުރިއެރުމެއްކަމަށް އެމްޑީޕީގެ ޗެއަރޕާސަން ހަސަން ލަތީފް ވިދާޅުވެއްޖެއެވެ.
ކޮމަންޑޫ ދާއިރާގެ އިންތިޚާބު ކާމިޔާބުކުރެވުމާއެކު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ހަސަން ލަތީފް ވިދާޅުވީ މިނަތީޖާއާއެކު އެމްޑީޕީން ރައްޔިތުންގެ މަޖިލީހުގައި ކުރަމުންދާ މަސައްކަތްތާއި ސަރުކާރުގައި އަދި ކުންފުނިތަކާއި ކައުންސިލްތަކުގައި ކުރަމުންދާ މަސައްކަތްތަކުން ދިވެހި ރައްޔިތުންނަށް މިހާރަށްވުރެ ފާގަތި މުސްތަގުބަލެއް ހޯދައިދެވޭނެކަމަށެވެ. އިންތިޚާބު ކާމިޔާބުކުރުމަށް އެމްޑީޕީގެ އެކި ގުނަވަންތަކުން ގިނަ ބުރަ މަސައްކަތްތަކެއް ކޮށްފައިވާކަން ފާހަގަކޮށް ހަސަން ލަތީފް ވަނީ އިންތިޚާބު އެމްޑީޕީއަށް ކާމިޔާބުކުރުމަށް މަސައްކަތްކޮށްދިން ހުރިހާ ފަރާތްތަކަށް ޝުކުރު އަދާކުރައްވާފައެވެ.
އަދި އިންތިޚާބުގައި އެމްޑީޕީ ކެންޑިޑޭޓަށް ކާމިޔާބު ހޯދައިދިނުމަށް ޖުމްހޫރީ ޕާޓީގެ ލީޑަރ ގާސިމް އިބްރާހިމް ކުރެއްވި މަސައްކަތާއި އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ ކުރެއްވި މަސައްކަތްތައް ފާހަގަކުރައްވާ ޝުކުރު އަދާކުރައްވާފައެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން އެމްޑީޕީގެ ނައިބު ރައީސް މުހައްމަދު ޝިފާޒު ވިދާޅުވީ މިއީ އެމްޑީޕީ އުފެދި މިހިސާބަށް އައިއިރު ގިނަ ޕާޓީއެކުލެވޭ ސިޔާސީ ނިޒާމަކަށް އެމްޑީޕީން ކުރަމުންދާ މަސައްކަތުގައި ސުލްހަވެރި ސިޔާސީ ހަރަކާތަށް ލިބުނު ވަރަށް ބޮޑު ކާމިޔާބީއެއްކަމަށެވެ. ކޮމަންޑޫ ދާއިރާގެ ކެމްޕެއިނުން ފާހަގަކުރެވުނު އެއް ކަމަކީ އެކުވެރިކަމާއި އެއްބައިވަންތަކަން ހުރިހާ ޕާޓީއެއްގެ ތެރޭގައިވެސް އޮތްކަންކަމަށް ޝިފާޒު ވިދާޅުވިއެވެ. އެހެންކަމުން ގިނަ ޕާޓީ އެކުލެވޭ ނިޒާމަށް ފަރިތަވަމުން އަންނަ މިންވަރު މިހާރު ބޮޑުވެފައިވާކަމަށް ޝިފާޒު ވިދާޅުވިއެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ޗެއަރޕާސަން ނައިބުގެ އިދާރީ އަދި ހުޅުމާލެ ދާއިރާގެ މެމްބަރ އަލީ ނިޔާޒު ވިދާޅުވީ އިންތިޚާބުގެ ކުރިން އެމްޑީޕީން ޖެހި އަދަދުތައް އަކުރުން އަކުރަށް ދިމާވެފައިވާކަމަށެވެ. އެމްޑީޕީއަކީ އަބަދުވެސް ވަރަށް ކަންކަން ތަރުތީބުގެ މަގުން ކުރަމުންދާ ބައެއްކަމަށާއި އެމްޑީޕީއަކީ އަބަދުވެސް ކުރާ ކެމްޕެއިނެއް މާކުރިން މާބޮޑެތި ހިސާބު ޖަހައިގެން އުޅޭ ބައެއް ނޫންކަމަށެވެ. އެހެންނަމަވެސް ޖަހާ ހިސާބު ދިމާވަމުންދާކަމަށް އަލީ ނިޔާޒު ވިދާޅުވިއެވެ. ކުރިޔަށް އޮތްތަނުގައިވެސް އެމްޑީޕީން މަސައްކަތްކުރާނީ އިންތިޒާމުވެގެން ނަތީޖާ ނެރޭ ބައެއްގެ ގޮތުގައި ތިބުމަށްކަމަށް ނިޔާޒު ވިދާޅުވިއެވެ.
އިންތިޚާބަށް އެމްޑީޕީންނާއި ސަރުކާރުން ނުފޫޒު ފޯރުވާކަމަށް ދެކެވޭ ވާހަކަތަކާއި ގުޅޭގޮތުން ނޫސްވެރިއަކު ކުރި ސުވާލަށް ޖަވާބު ދެއްވަމުން ހަސަން ލަތީފު ވިދާޅުވީ ރާއްޖޭގައި ފައްކާވަމުން އަންނަނީ ޑިމޮކްރަޓިކް ނިޒާމެއްކަމަށެވެ. މިނިޒާމުގައި މިނިވަން މުއައްސަސާތައް ހުރިއިރު އިލެކްޝަން ކޮމިޝަނަކީ މިނިވަން މުއައްސަސާއެއްކަމަށް ހަސަން ލަތީފް ވިދާޅުވިއެވެ. ތުހުމަތުތަކެއް ހުރިނަމަ އެކަންކަން ހުށަހެޅުމުގެ ފުރުސަތު އޮންނާނެކަމަށް ހަސަން ލަތީފް ވިދާޅުވިއެވެ.
އިންތިޚާބާ ދިމާކޮށް ކޮމަންޑޫ ދާއިރާއަށް އިއުލާންކުރި މަޝްރޫޢުތަކާއި ގުޅޭގޮތުން ނޫސްވެރިއަކު ކުރި ސުވާލަށް ޖަވާބުދެއްވަމުން ހަސަން ލަތީފް ވިދާޅުވީ މިސަރުކާރުން މުޅި ރާއްޖޭގައި މަޝްރޫއުތައް ހިނގަމުންގެންދާ ކަމަށެވެ. އެހެންވީމާ ހަމައެކަނި ކޮމަންޑޫ ދާއިރާއަށް ވަކިކަންތައްތަކެއް ކޮށްދޭކަމަށް ބުނަން ދަތިކަމަށެވެ.
ހަސަން ލަތީފް ވިދާޅުވީ އިންތިޚާބުން އެމްޑީޕީއަށް ލިބުނު ވޯޓުގެ އަދަދު މަދުނޫންކަމަށެވެ. ގިނަ ކެންޑިޑޭޓުން ވާދަކުރާއިރު ލިބޭ ވޯޓު މަދުވާނެކަމަށް ހަސަން ލަތީފް ވިދާޅުވިއެވެ.
މިއިންތިޚާބުގެ ނަތީޖާއިން ރަނގަޅުކުރަން ހުރި ކަންކަން އެމްޑީޕީން ބަލާނެކަމަށާއި އެއަށްފަހު އެމްޑީޕީން ކުރިޔަށް އޮތް ރިޔާސީ އިންތިޚާބަށް ތައްޔާރުވާނެކަަމަށް ހަސަން ލަތީފް ވިދާޅުވިއެވެ.
