އިންތިޚާބަށް ނުފޫޒު ފޯރުވާކަމަށް ބުނެ ވާހަކަތައް ދައްކަނީ ބަލިވުމުން: ރޮޒެއިނާ

ކޮމަންޑޫ ދާއިރާގައި ކުރިއަށް ގެންދިޔަ އިންތިޚާބަށް ނުފޫޒު ފޯރުވާކަމަށް ބުނެ ވާހަކަތައް ދައްކަނީ ބަލިވުމުން ކޮންމެވެސް ވާހަކައެއް ދެއްކުމުގެ ގޮތުންކަމަށް އައްޑޫ މީދޫ ދާއިރާގެ މަޖިލިސް މެމްބަރު ރޮޒެއިނާ އާދަމް ވިދާލުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ވާކަހަދައްކަވަމުން ރޮޒެއިނާ ވިދާޅުވީ, އިދިކޮޅު ޕީޕީއެމްގެ އަމަލުތައް ފެނިގެން ގޮސްފައިވަނީ މީގެ ކުރިންވެސް އެޕާޓީގެ އަމަލުތައް ހުންނަ ގޮތަށް ކަމަށެވެ. އެގޮތުން 2013ގެ ރިޔާސީ އިންތިޚާބުގައިވެސް ތިންބުރަށް ނަތީޖާ ގުނިގެން ދިޔައިރުވެސް އިދިކޮޅު ޕީޕީއެމްއަށް ނަތީޖާ ގަބޫލުނުކުރެވިގެން އުޅުނު ކަމަށެވެ. ހަމައެހެންމެ މީގެ ކުރިން ބާއްވާފައިވާ އެހެން އިންތިޚާބުތަކުގައިވެސް ޕީޕީއެމްއިން ހިތްހަމަ ނުޖެހޭގޮތަކަށް ނުވަތަ ބަލިވާހެން ހީވާނަމަ މިފަދަ ތުހުމަތުތައް ކުރާކަމަށެވެެ.

ރޮޒެއިނާ ވިދާޅުވީ އިންތިޚާބެއްގައި ބަލިވަމުންދާއިރު މިފަދަ ޝުއޫރުތައް ފާޅުކޮށް ތުހުމަތުތައް ކުރުމަކީ ޕީޕީއެމްއިން އާންމުކޮށްވެސް ކުރާކަމެއް ކަމަށެވެ.

ކޮމަންޑޫ ދާއިރާގެ ބައި-އިލެކްޝަންގެ ވަގުތީ ނަތީޖާ އިއުލާނުކޮށްފައި ވާއިރު، އެމްޑީޕީން މި ގޮނޑިއަށް ވާދަކުރި މުހައްމަދު ރާޝިދު ވަނީ މި މަގާމަށް އިންތިޚާބުވެފައެވެ. ނަމަވެސް ބައެއް ފޮށިތަކުން އިދިކޮޅު ޕީޕީއެމްގެ މެމްބަރު ވަނީ ކުރިހޯދާފައެވެ. ރޮޒައިނާ ވިދާޅުވީ އެފޮށިތަކަކީ މީގެ ކުރިންވެސް އިދިކޮޅުން ކުރިހޯދަމުން އަންނަ ފޮށިތަކެއް ކަމަށެވެ. ނަމަވެސް މީގެ ކުރިން ބޮޑު ފަރަގަކާއެކު މި ފޮށިތަކުގެ ނަތީޖާ އިދިކޮޅަށް ބުރަވި ނަމަވެސް މިހާރު އެފަރަގު ވަރަށް ބޮޑަށް ކުޑަވެފައިވާ ކަމަށެވެ. މީގެ ކުރިން ތިރީހަކަށް ވޯޓުގެ ފަރަގުން ޕީޕީއެމްއިން ކުރިހޯދާފައިވާ ފޮށިތަކުގެ ނަތީޖާތަކުން މިފަހަރު ޕީޕީއެމްއަށް ކުރިލިބުނީ ފަސްވަރަކަށް ވޯޓުގެ ތަފާތުންނެވެ.

އިދިކޮޅުން މީގެ ކުރިން ބޮޑު ތަފާތަކާއެކު ކުރިހޯދަމުންއައި ފޮށިތަކުގެ ފަރަގު މިހާބޮޑަށް ކުޑަވުމުން އެނގިގެންދަނީ ރައްޔިތުން މިއަދުގެ ސަރުކާރުގެ ސިޔާސަތުތައް ބަލައިގަންނަ މިންވަރުކަމުގައި ރޮޒެއިނާ ސިފަކުރެއްވިއެވެ. ރޮޒެއިނާ ވިދާޅުވީ އެއިން އެނގިގެންދަނީ މީގެ ކުރިން އެމްޑީޕީގެ ސިޔާސަތުތައް ބަލައިނުގަންނަ ފަރާތްތަކުންވެސް މިހާރު އެސިޔާސަތުތައް ބަލައިގަންނަކަން ކަމަށެވެ.

ކޮމަންޑޫ ދާއިރާގެ ގޮނޑި އެމްޑީޕީގެ ކެންޑިޑޭޓް ކާމިޔާބުކޮށްފައިވާއިރު، މި ގޮނޑި ކާމިޔާބުކުރުމުގައި ކޯލިޝަންގައި ހިމެނޭ އެހެން ޕާޓީތަކުން ކުރި މަސައްކަތް ފާހަގަކުރައްވައި ރޮޒެއިނާ ވަނީ އެމަސައްކަތްތައް ބަލައިގެންފައެވެ. ރޮޒެއިނާ ވިދާޅުވީ ލިބުނު ކާމިޔާބީގެ ހިއްސާ ކޯލިޝަނުން އެމްޑީޕީގެ ކެންޑިޑޭޓަށް ތާއީދުކުރި ޕާޓީތަކަށްވެސް އެބައޮތް ކަމަށެވެ.