އިންތިޚާބުގެ ދާއިމީ ނަތީޖާ އިއުލާންކުރުން ހޯމަ ދުވަހު
ހޮނިހިރު ދުވަހު ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަނާއި ތ. ވިލުފުށި, އަދި ގއ. ގެމަނަފުށީ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި-އިލެކްޝަން ކުރިޔަށް ގެންދިޔަ
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގައި ވޯޓުލަނީ
ހޮނިހިރު ދުވަހު ބޭއްވި ބައި އިލެކްޝަންތަކުގެ ދާއިމީ ނަތީޖާ ހޯމަ ދުވަހު އިއުލާންކުރާނެކަމަށް އިލެކްޝަން ކޮމިޝަން (އީސީ)ން ބުނެފިއެވެ.
އީސީން ބުނީ ދާއިމީ ނަތީޖާ އިއުލާންކުރުން އޮންނާނީ އީސީގެ އިންތިޚާބާބެހޭ މަރުކަޒު ބާ ޖަމާލުއްދީންގައި ހޯމަ ދުވަހުގެ ހެނދުނު 11:30 ގައި ކަމަށެވެ. މީޑިޔާތަކަށް ހުޅުވާލައިގެން ބާއްވާ މިރަސްމިއްޔާތު ނިމުމުން ބައި އިލެކްޝަންތަކާއި ބެހޭ ގޮތުން ސުވާލުކުރުމުގެ ފުރުސަތު ހުޅުވާލާފައިވާކަމަށްވެސް އީސީން ބުނެއެވެ.
ހޮނިހިރު ދުވަހު ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަނާއި ތ. ވިލުފުށި, އަދި ގއ. ގެމަނަފުށީ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި-އިލެކްޝަން ކުރިޔަށްދިޔައެވެ. އިންތިޚާބު ކުރިޔަށްދިޔަ ގޮތާއި ގުޅޭގޮތުން އީސީގެ ރައީސް ފުއާދު ތައުފީގް މީގެކުރިން "ރާއްޖެއެމްވީ"އަށް މައުލޫމަތު ދެއްވަމުން ވިދާޅުވީ އިންތިޚާބު ކުރިޔަށްދިޔަ ގޮތާމެދު ހިތްހަމަޖެހިވަޑައިގަންނަވާކަމަށެވެ. ފުއާދު ވިދާޅުވީ, މިއިންތިޚާބުގައި ޖުމްލަ 7 ޝަކުވާއެއް ހުށަހެޅުނު ކަމަށާއި އެޝަކުވާތައް ކޮމްޕްލެއިންސް ބިޔުރޯއިން ބަލަމުން އަންނަކަމަށެވެ. އަދި އިންތިޚާބުގެ ނަތީޖާއަށް އަސަރުކުރާފަދަ ޝަކުވާއެއް ހުށަހެޅިފައި ނުވާކަމަށާއި, ޝަކުވާތަކަށް 5 ދުވަހުގެ ތެރޭގައި އީސީން ޖަވާބު ދޭނެކަމަށެވެ.
އިންތިޚާބުގެ ވަގުތީ ނަތީޖާ އީސީން ވަނީ ހޮނިހިރު ދުވަހުގެ ރޭ އިއުލާންކޮށްފައެވެ.
ވަގުތީ ނަތީޖާ ދައްކާގޮތުން ކޮމަންޑޫ ދާއިރާގެ ބައި އިލެކްޝަން ކާމިޔާބުކުރައްވާފައިވަނީ އެމްޑީޕީ ކެންޑިޑޭޓް މުހައްމަދު ރާޝިދެވެ. ރާޝިދަށް 1401 ވޯޓު ލިބިވަޑައިގެންނެވިއެވެ. ރާޝިދާ އެންމެކައިރިން ވާދަކުރެއްވި ޕީޕީއެމް ކެންޑިޑޭޓް މޫސާ ފަތުހީއަށް ލިބިވަޑައިގެންނެވީ 1161 ވޯޓެވެ. ކޮމަންޑޫ ދާއިރާގެ ބައި އިލެކްޝަންގައި އެމްއެންޕީން ވާދަކުރެއްވި އަބްދުލް ހަންނާން އިދުރީސަށް ލިބިވަޑައިގަތީ 323 ވޯޓެވެ.
ގެމަނަފުށީ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބު ކާމިޔާބުކޮށްފައިވަނީ އެ ދާއިރާއަށް އަމިއްލަ ގޮތުން ވާދަކުރެއްވި ކެންޑިޑޭޓް ކެންޑިޑޭޓް ނަންބަރު 3 މަރިޔަމް ޖަމްޝީދާއެވެ. އޭނާ އެ ދާއިރާ ކާމިޔާބުކުރައްވާފައިވަނީ 151 ވޯޓުންނެވެ. އެ ދާއިރާއިން ދެވަނައަށް އެންމެ ގިނަ ވޯޓު ހޯދާފައިވަނީ އަމިއްލަ ގޮތުން ވާދަކުރެއްވި ކެންޑިޑޭޓް، ކެންޑިޑޭޓް ނަންބަރު 1 ފާތިމަތު ޝިފާޒާއެވެ. ޝިފާޒާއަށް 146 ވޯޓު ލިބިފައިވެއެވެ. އަދި ކެންޑިޑޭޓް ނަންބަރު 4 މަރިޔަމް ފަޒުނާއަށް 115 ވޯޓު ލިބިފައިވެއެވެ. ޕީޕީއެމުން ވާދަކުރެއވި ކެންޑިޑޭޓް، ކެންޑިޑޭޓް ނަންބަރު 2 އައިމިނަތު ރިޔާޒާއަށް ލިބިފައިވަނީ 92 ވޯޓެވެ. މި ދާއިރާއަށް ވޯޓުލުމުގެ ހައްގު ލިބިފައިވަނީ 1،271 މީހުންނަށެވެ. މި ދާއިރާއަށް ވޯޓުލާފައިވަނީ 537 މީހުންނެވެ.
މީގެ އިތުރުން ވިލުފުށީ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބު ކާމިޔާބުކޮށްފައިވަނީ އެ ދާއިރާއަށް އެމްޑީޕީގެ ފަރާތުން ވާދަކުރެއްވި ކެންޑިޑޭޓް ފާތިމަތު ނީނާއެވެ. އޭނާ އެ ދާއިރާ ކާމިޔާބުކުރައްވާފައިވަނީ 61 ވޯޓުންނެވެ. ދެން އެދާއިރާއަށް އަމިއްލަ ގޮތުން ވާދަކުރެއްވި ކެންޑިޑޭޓް، ރުގިއްޔާ އާލިމާ ރަޝާދަށް ލިބިވަޑައިގެންފައިވަނީ 57 ވޯޓެވެ. މި ދާއިރާއަށް ވޯޓުލުމުގެ ހައްގު 1،499 މީހުންނަށް ލިބިގެންވެއެވެ. އެހެންނަމަވެސް މި ދާއިރާއަށް ވޯޓު ލާފައިވަނީ 123 މީހުންނެވެ.
