ޖައިލަމްގެ މަރުގެ މައްސަލައިގެ ހުކުމްކުރުން މާރޗް މަހުގެ 2 ވަނަ ދުވަހު
2 ފެބުރުއަރީ 2022 | ބުދަ 11:14ބުދަ ދުވަހު ކުރިއަށް ދިޔަ އަޑުއެހުމަކީ ދައުލަތާއި ދިފާއުން ޚުލާސާ ބަޔާން އިއްވުމަށް ކުރިއަށް ގެންދިޔަ އަޑުއެހުމެއް
ޖައިލަމްގެ މަރުގެ މައްސަލާގައި ދައުވާ އުފުލާފައިވާ 4 މީހުން
ހ. ހަންޑްރެޑް ފްލާވަރސް, ޖައިލަމް އަހުމަދު ޝާކިރުގެ މަރުގެ މައްސަލައިގެ ހުކުމްކުރުން މާރޗް މަހަށް ތާވަލުކޮށްފިއެވެ.
ޖައިލަމްގެ މަރުގެ މައްސަލާގައި, ތޫނު އެއްޗެއް ބޭނުން ކޮށްގެން ގަސްދުގައި މީހަކު މެރުމުގެ ކުށުގެ ދައުވާ އުފުލާފައިވަނީ 4 މީހެއްގެ މައްޗަށެވެ. އެއީ ނަސީބު ސައީދު، އިސްމާއިލް އަނީގު، އަލީ އިރުފާން އަދި މުހައްމަދު ހުމައިދުއެވެ.
މި މައްސަލައިގައި ބުދަ ދުވަހު ކުރިއަށް ދިޔަ އަޑުއެހުމަކީ ދައުލަތާއި ދިފާއުން ޚުލާސާ ބަޔާން އިއްވުމަށް ކުރިއަށް ގެންދިޔަ އަޑުއެހުމެކެވެ. މި އަޑުއެހުމުގައި ދެފަރާތުންވެސް ވަނީ ޚުލާސާ ބަޔާން އިއްވާފައެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިސްމާއިލް ޝަފީއުއެވެ.
މި މައްސަލާގައި ކުރިން ބޭއްވި އަޑުއެހުންތަކުގައި ދައުލަތުން ހުށަހަޅާފައިވާ 5 ހެކިންގެ ތެރެއިން 3 ހެއްކެއްގެ ހެކިބަސް ނަގާފައިވާއިރު، ބާކީ ތިބި 2 ހެކިންނަކީ ދައުލަތުން ހެކިންގެ ގޮތުގައި ހުށަހަޅާފައިވާ 2 ޑޮކްޓަރެކެވެ. އެއީ ޖައިލަމްގެ މެޑިކޯ ލީގަލް ރިޕޯޓު ތައްޔާރުކުރި ބިދޭސީ ޑޮކްޓަރާއި، އެ ރިޕޯޓު ތަރުޖަމާކުރި ދިވެހި ޑޮކްޓަރެވެ. މައްސަލަ ބައްލަވާ ގާޒީ އިސްމާއިލް ޝަފީއު ވަނީ, ދައުލަތުން އެދިފައިވާ ގޮތަށް ޑޮކްޓަރުގެ ރިޕޯޓާ ގުޅިގެން ޚަބީރެއްގެ ގޮތުން ހާޒިރު ކުރަން ބޭނުންވި ފަރާތް ހާޒިރު ނުކުރުމަށް ނިންމަވާފައެވެ. އެއީ ޖައިލަމްގެ މެޑިކޯ ލީގަލް ރިޕޯޓު ތައްޔާރުކުރި ބިދޭސީ ޑޮކްޓަރުގެ ބަދަލުގައި ހާޒިރު ކުރަން އެދުނު، އެ ރިޕޯޓު ތަރުޖަމާކުރި ދިވެހި ޑޮކްޓަރެވެ.
މި މައްސަލައިގެ ހެކިވެރިންނަށް ބަލާއިރު، ދައުލަތުން ހުށައަޅާފައިވާ ހެކިވެރިޔާ އިބްރާހިމް ރަމީޒަކީ ހާދިސާ ހިނގިއިރު ފުލުހުންގެ އިދާރާގައި މަސައްކަތް ކޮށްފައިވާ ފަރާތެކެވެ. އޭނާ ހެކިވެރިއެއްގެ ގޮތުގައި ހުށައަޅާފައިވަނީ ސީން އޮފް ކްރައިމް ރިޕޯޓު ތައްޔާރުކުރި އޮފިސަރުގެ ހައިސިއްޔަތުން ޖައިލަމްއަށް ލިބިފައިވާ އަނިޔާތައް ކިޔައިދިނުމާއި، އެ ރިޕޯޓުގެ ސައްހަކަން ކަށަވަރު ކުރުމުގެ ގޮތުންކަން ދައުލަތުން ފާހަގަކުރިއެވެ.
ހެކިވެރިޔާ ވަނީ އެ ދުވަހުގެ ބައެއް ހާދިސާތައް ކިޔައިދީފައެވެ. އެގޮތުން ކޮމާންޑު ސެންޓަރުން އެންގީ ހޮސްޕިޓަލަށް ދިއުމަށް ކަމަށާއި، ހޮސްޕިޓަލަށް ދިޔައިރު ޖައިލަމަށް ފަރުވާދެމުން ދިޔަކަމަށް ވިދާޅުވިއެވެ. އަދި އިރުކޮޅަކުން ޑޮކްޓަރު ނުކުތުމަށްފަހު، ވަރަށް ގިނަ އަނިޔާވެފައިވާ ކަމަށާއި، ނިޔާވެއްޖެކަން ބަޔާން ކުރެއްވިކަމަށް ހެކިވެރިޔާ ވިދާޅުވިއެވެ.
ހެކިވެރިޔާ ބުނީ, ރިޕޯޓުގައި އެކަމާގުޅޭ ތަފްސީލުތައް ހިއްސާ ކޮށްފައި ވާނެކަމަށެވެ. އަދި މިއީ 2015ގެ މައްސަލައެއްކަމުން، މައްސަލައާ ގުޅޭ ބައެއް ކަންކަން މިހާރު ހަނދާނުގައިވެސް ނެތްކަން އޭނާ ފާހަގަ ކުރިއެވެ.
ދެން ހާޒިރުކޮށްފައިވަނީ ލާންސް ކޯޕްރަލް މުހައްމަދު އަރީފެވެ. އޭނާ ހާޒިރުކުރީ ހުމައިދުގެ ގެއިން ފެނިފައިވާ މެޑިކަލް ލިއުމަކީ މި ހާދިސާގެ ތެރެއިން ލިބުނު އަނިޔާއެއްކަން ކަށަވަރު ކުރުމަށެވެ. ހެކިބަސް ދެމުން އަރީފް ބުނީ، ސިނަމާލޭ ފްލެޓުގައި ހުރި އެޕާޓްމަންޓު ޗެކްކުރިއިރު ހުމައިދުގެ މެޑިކަލް ލިއެކިއުންތަކެއް ފެނިފައިވާ ކަމަށެވެ. އެގޮތުން އަތްތިލަ ކަނޑައިގެން ގޮސްފައިވާކަން އެ ލިއެކިއުންތަކުން ފެންނަކަން ހެކިވެރިޔާ ފާހަގަކުރިއެވެ. އަދި އެތަކެތީގެ ފޮޓޯ ނެގިކަން ފާހަގަކޮށް ހެކިވެރިޔާ ވަނީ އެކަމާ ގުޅޭ ތަފްސީލުތައް ހިއްސާކޮށްފައެވެ.
ދެން ހާޒިރު ކޮށްފައިވަނީ ޕޮލިސް ކޯޕްރަލް އަހުމަދު ފަޔާޒެވެ. އޭނާއަކީ ކްރައިމް ސީން އިންވެސްޓިގޭޝަން އޮފިސަރެއްގެ ގޮތުން އެ ހާދިސާ ހިނގިއިރު ސީންއަށް ދިޔަ އޮފިސަރެކެވެ. އޭނާ ވަނީ ހާދިސާ ހިނގި ސަރަހައްދުން ފެނުނު ކަންކަން ޝަރީއަތުގައި ހިއްސާ ކޮށްފައެވެ.
މި މައްސަލައިގެ ހުކުމްކުރުން އޮންނާނީ މާރޗު މަހުގެ 2 ވަނަ ދުވަހު ކަމަށް މައްސަލަ ބައްލަވާ ގާޒީ ވިދާޅުވިއެވެ.
