ކޯޓުގެ ޙުރުމަތް ކެނޑިކަމުގެ ކުށް އަޑުބަރޭގެ މައްޗަށް ސާބިތުވުމުން، ރައީސް އޭނާ މަޤާމުން ދުރުކުރައްވައިފި
މި މައްސަލައިގެ ފުރަތަމަ އަޑުއެހުން ބާއްވާފައިވަނީ 9 ފެބްރުއަރީ 2021 ގައި
އަލީ ވަހީދު ރާއްޖެއައުމަށް އެދުމުން އެކަމަށް އޭނާ ވަނީ އިންކާރުކޮށްފައި
ކޯޓުގެ ޙުރުމަތް ކެނޑިކަމުގެ ކުށް، ޔޫތު މިނިސްޓްރީގެ ސްޓޭޓް މިނިސްޓަރ އަސްހަދު އަލީ (އަޑުބަރޭ) ގެ މައްޗަށް ސާބިތުވުމުން، ރައީސުލްޖުމްހޫރިއްުޔާ އިބްރާހިމް މުޙައްމަދު ސޯލިޙު އޭނާ މަޤާމުން ދުރު ކުރައްވައިފިއެވެ.
ކްރިމިނަލް ކޯޓުގެ ޗިޓާއި ޙަވާލުވެ، ކޯޓަށް ހާޒިރުވެފައި ނުވުމާއި، ކޯޓުގެ ޙުރުމަތް ކެނޑޭފަދަ އަމަލުތަކެއް އަޑުބަރޭގެ ފަރާތުން ފެނިފައިވާތީ އޭނާގެ މައްޗަށް ބުދަ ދުވަހު ކްރިމިނަލް ކޯޓުން ވަނީ 15 ދުވަހުގެ ޖަލު ޙުކުމެއް އިއްވާފައެވެ. ގާޒީ ޙަސަން ސައީދު ކުރެއްވި މިޙުކުމުގައިވިދާޅުވެފައިވަނީ އަލީ ވަޙީދު އަނބުރާ ރާއްޖެ ގެނައުމަށް އަޑުބަރޭ ކުރި މަސައްކަތެއް ފެންނަން ނެތް ކަމަށެވެ.
އޭގެ ބަދަލުގައި ތަކުރާރުކޮށް އަޑުބަރޭ ބުނަމުން ގެންދިޔައީ އޭނާ ޖާމިނުވީ 4 މަހަށް ކަމަށާއި، އެ މުއްދަތުގައި އޭނާ ހާޒިރު ކުރުމަށް ކޯޓުން އަންގާފައި ނުވާ ކަމަށްކަން ގާޒީ ވިދާޅުވިއެވެ. މިއީ ކޯޓާމެދު ނުބައި ތަސައްވުރެއް އުފެއްދުންކަން ފާހަގަކުރައްވައި ގާޒީ ވަނީ މި މުޅި މައްސަލައިގައި އަޑުބަރޭގެ އިހުމާލު އެބައޮތްކަމަށް ވިދާޅުވެފައެވެ.
ގާޒީ ވިދާޅުވީ، މި މައްސަލަ ކޯޓުގައި ލަސްވެގެންދާ ސަބަބުތަކުގެ ތެރޭގައިވެސް އެކަން ހިމެނޭއިރު، މިއީ އަދުލު އިންސާފަށް ހުރަސް އެޅުންކަމަށް ބެލޭނެ ކަމަށެވެ. ގާޒީ ވަނީ އަލީ ވަޙީދު ފިލައިގެން ހުރުމަށް އަޑުބަރޭ ވާގިވެރިވާކަމަށްވެސް ވިދާޅުވެފައެވެ.
އަދި އަޑުބަރޭވެސް ޗިޓް ލިބި ކޯޓަށް ހާޒިރުވެފައިނުވާއިރު، މިއީ ހައްތަހާވެސް ކޯޓުގެ ޙުރުމަތް ކެނޑުންކަމަށް ގާޒީ ވިދާޅުވިއެވެ. އެފަދަ ކުށްތަކަށް ޖިނާއީ އިޖުރާއަތުގެ ޤާނޫނުގައި އޮންނަނީ 15 ދުވަހަށްވުރެ ދިގުނޫން މުއްދަތަކަށް ޖަލަށް ލުމެވެ.
އެގޮތުން ގާޒީ ޙަސަން ސައީދު ވަނީ އަޑުބަރޭ ޖާމިނުވުމުގެ އިޤްރާރާ ޚިލާފުވެ، ކޯޓުގެ ޙުރުމަތް ކެނޑުމަށް ކޮށްފައިވާ ކަންކަމަށް ރިއާޔަތް ކުރައްވައި، އޭނާ 15 ދުވަހަށް ޖަލަށް ލުމަށް ޙުކުމް ކުރައްވާފައެވެ.
މި މައްސަލައިގެ ފުރަތަމަ އަޑުއެހުން ބާއްވާފައިވަނީ 9 ފެބްރުއަރީ 2021 ގައެވެ. އެ ދުވަހު އަލީ ވަޙީދު ފުރުމަށް ވަނީ ހުއްދަ ދެއްވާފައެވެ. އެ ހުއްދަ ދީފައިވަނީ ބޭސްފަރުވާއަށް ކަމަށް ބަޔާންކޮށް ހުށައަޅާފައިވާ ލިޔެކިޔުންތަަކަށް ބަލައި، އަލީ ވަޙީދު ފުރުމަށް ދައުލަތުންވެސް އިއުތިރާޒު ނުކުރާކަމަށް ބުނުމާއި ގުޅިގެންކަން ގާޒީ ފާހަގަކުރެއްވިއެވެ. އެގޮތުން ބޭސްފަރުވާގެ ކަންކަން އިތުރަށް ސާފު ކުރުމަށް ޑޮކްޓަރު ހާޒިރުކުރުމުން ޑޮކްޓަރު ވަނީ އަލީ ވަޙީދުގެ މައިބަދައިގެ ޑިސްކުގައި މައްސަލަ ހުރި ކަމަށާއި, ނާރު ފިތެމުންދާތީ އޮޕަރޭޝަން ކުރަން ޖެހޭކަމަށް ވިދާޅުވެފައިވެއެވެ. އެގޮތުން އޮޕަރޭޝަން ކުރެވޭނެ ތަފާތު ގޮތްތައް ހުންނާނެ ކަމަށާއި، އޮޮޕަރޭޝަން ކުރާނެ ގޮތް ކަނޑައަޅާނީ އޮޕަރޭޝަން ކުރާ ޑޮކްޓަރު ކަމަށްވެސް އޭނާ ވަނީ ވިދާޅުވެފައެވެ.
ޑޮކްޓަރު ވަނީ އޮޕަރޭޝަން "ކޮމްޕްލިކޭޓް" ވުމުގެ ފުރުސަތު އޮތްކަން ފާހަގަކުރައްވައި، އޮޕަރޭޝަން ކުރާނެ އެކަށީގެންވާ ވަސީލަތްތައް ރާއްޖޭގައި ނެތްކަމަށް ވިދާޅުވެފައެވެ. އަދި މައިބަދައިގެ އެފަދަ އޮޕަރޭޝަނެއްގައި ދާދި ފަހުން މީހަކު ނިޔާވެފައިވާކަމަށްވެސް ޑޮކްޓަރު އެދުވަހު ވަނީ ޝަރީއަތުގެ މަޖިލީހުގައި ވިދާޅުވެފައެވެ. އެގޮތުން އަލީ ވަޙީދު ފުރުމަށް ހުއްދަ ދެއްވީ އޭނާގެ ފުރާނައަށް ނުރައްކާ ވެދާނެކަމަށް ޑޮކްޓަރު ވިދާޅުވި ވާހަކަތަކުގެ މައްޗަށް ބިނާކޮށްކަން ގާޒީ ފާހަގަކުރެއްވިއެވެ.
އޭރު ފުރުމުގެ ހުއްދަ ދެއްވީ 4 މަސް ދުވަހުގެ ތެރޭގައި ކޯޓަށް ހާޒިރުވާނެކަމަށް ބުނެ، އެކަމުގެ ޔަޤީންކަމެއްގެ ގޮތުން އަޑުބަރޭ ޖާމިނު ކުރުމުންނެވެ. 4 މަސް ހަމަވެ ކޯޓަށް ހާޒިރުވާން އެންގުމުން ބޭސްފަރުވާ ނުނިމޭކަމަށް ބުނެ އިތުރު ލިޔުންތައް ހުށައަޅައި، ޝަރީއަތުގެ އަޑުއެހުމުގައި އޮންލައިންކޮށް ބައިވެރިވެވޭނެ ގޮތް ހައްދަވައިދެއްވުމަށް އަލީ ވަހީދު ވަނީ އެދިފައެވެ. އެގޮތުގެ މަތިން ޝަރީއަތުގެ ކުރީ މަރުޙަލާގެ ދެ އަޑުއެހުމެއް ބޭއްވިފައިވެއެވެ. އެއީ 21 ޖޫންއާއި، 11 ޖުލައިގައެވެ. 11 ޖުލައިގެ އަޑުއެހުމުގައި ޝަރީއަތުން ވަނީ 26 އޯގަސްޓުގެ އަޑުއެހުމަށް ކޯޓަށް ހާޒިރުވާން ޖެހޭނެކަން އަންގާފައެވެ. ނަމަވެސް މިއަޑުއެހުމަށް ވެސް އަލީ ވަޙީދު ހާޒިރުވެފައެއް ނުވެއެވެ.
