ކްރިމިނަލް ކޯޓުން ޝަރީއަތްތައް ލައިވް ނުކުރެވުން: އައިޓީ އޮފިސަރެއް ނެތި 4 މަސް!
2 ފެބުރުއަރީ 2022 | ބުދަ 08:42އިކުއިޕްމަންޓްސް ކޯޓުގައި ހުރި ނަމަވެސް، އެކަމަށް ބޭނުންވާ އިންސާނީ ވަސީލަތްތައް ނެތް
ފުއްގިރި ހިޔާނާތުގެ މައްސަލައިގައި ކްރިމިނަލް ކޯޓުގައި މީގެ ކުރިން ބޭއްވި ޝަރީއަތުގެ އަޑުއެހުމެއްގެ ތެރެއިން
ކްރިމިނަލް ކޯޓުގައި ޝަރީއަތްތައް ލައިވް ނުކުރެވެނީ އެކަމަށް ބޭނުންވާ އިންސާނީ ވަސީލަތްތައް އެކަށީގެންވާ ގޮތެއްގައި ނެތުމުންކަމަށް އެ ކޯޓުން ބުނެފިއެވެ.
ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން މަގާމުގެ ނުފޫޒް ބޭނުންކޮށް ރިޝްވަތު ނެގި މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އުފުލާފާއިވާ ދައުވާގެ ޝަރީއަތް ލައިވް ކުރަން ދިފާއުންނާއި ދައުލަތުން އެދުނު ނަމަވެސް، އިސްގާޒީ އަހުމަދު ޝަކީލް ވަނީ ކޯޓުގައި އެކަށީގެންވާ ވަސީލަތްތައް ނެތްކަމަށް ވިދާޅުވެ، ޝަރީއަތް މިވަގުތު ލައިވް ކުރެވެން ނެތްކަމަށް ވިދާޅުވެފައެވެ. އަދި ވަސީލަތްތައް ހަމަޖެހުނުހާ އަވަހަށް ޝަރީއަތް ލައިވް ކޮށްގެން ކުރިއަށް ގެންދިއުމަށް ހުރަހެއް ނެތްކަމަށް ގާޒީ ޝަކީލް އެ ދުވަހުގެ އަޑުއެހުމުގައި ވިދާޅުވިއެވެ.
އެކަމާ ގުޅޭގޮތުން ރާއްޖެއެމްވީން ސުވާލު ކުރުމުން ކްރިމިނަލް ކޯޓުގެ މީޑިއާ އޮފިޝަލު އަމާން މުޙައްމަދު ނަޖީބު ވިދާޅުވީ، އިސްގާޒީ ވިދާޅުވި ފަދައިން ކޯޓުގައި ވަސީލަތެއް ނެތް ކަމަށެވެ. އެގޮތުން ޝަރީއަތް ކުރިއަށް ގެންދިއުމަށް ބޭނުންވާ ވަސީލަތްތަކަށް ބަލާއިރު، އެކަމަށް ބޭނުންވާ އިކުއިޕްމަންޓްސް ކޯޓުގައި ހުރި ނަމަވެސް، އެކަމަށް ބޭނުންވާ އިންސާނީ ވަސީލަތްތައް ނެތްކަން އޭނާ ފާހަގަ ކުރެއްވިއެވެ.
އަމާން ވިދާޅުވީ، ފާއިތުވި ދުވަސްތަކުގައި ކޮމްޕިއުޓަރ ޓެކްނީޝަނެއް ހޯދުމަށް ކްރިމިނަލް ކޯޓުން 3 ފަހަރު އިއުލާނު ކޮށްފައިވާ ކަމަށެވެ. އަދި ސީނިއަރ ކޮމްޕިއުޓަރ ޓެކްނީޝަނެއް ހޯދުމަށް އެއް ފަހަރު އިއުލާނު ކޮށްފައިވާއިރު، އެންމެ ފަހުން ކޮށްފައިވާ އިއުލާނުގެ މުއްދަތު ހަމަވެފައިވަނީ 2022 ޖަނަވަރީ 23 އަށް ކަމަށެވެ. އަމާން ވިދާޅުވި ގޮތުގައި އެކަށީގެންވާ ފަރާތެއް ނެތުމުގެ ސަބަބުން އެ މަޤާމު ހުންނަނީ ހުސްކޮށެވެ. އަދި މިވަގުތު ކޯޓުގެ އައިޓީ ކަންކަން ބެލުމަށް ވަގުތީ ގޮތުން އެހީ ހޯދަނީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) ގެ އައިޓީ އޮފިސަރެއްގެ ފަރާތުންނެވެ.
އަމާން ވިދާޅުވި ގޮތުގައި ޝަރީއަތް ލައިވް ކޮށްގެން ކުރިއަށް ގެންދިއުމަށް ޑީޖޭއޭގެ އައިޓީ އޮފިސަރު މުޅި އަޑުއެހުމުގައި ކްރިމިނަލް ކޯޓުގެ މަސައްކަތަށް ބޭނުން ކުރުމުން ޑީޖޭއޭގެ މަސައްކަތްތަކަށް އެކަމުގެ ގޮންޖެހުމާއި ކުރިމަތިލާންޖެހޭކަމަށެވެ. ސަބަބަކީ ޑީޖޭއޭއަކީ ޖުމުލަކޮށް ހުރިހާ ކޯޓެއްގެ އިދާރީ ކަންކަމާއި ޙަވާލުވެ އޮންނަ އިދާރާކަމަށްވާތީކަމުގައި އަމާން ވިދާޅުވިއެވެ.
ކްރިމިނަލް ކޯޓުން އެކި ފަހަރުމަތިން އެ މަޤާމަށް މީހަކު ހޯދުމަށް މަސައްކަތް ކޮށްފައިވެއެވެ. އެގޮތުން އެންމެ ފަހުން ކޮށްފައިވާ އިއުލާނަށް ބަލާއިރު، ސީނިއަރ ކޮމްޕިއުޓަރ ޓެކްނީޝަނެއް ހޯދުމަށް ކޮށްފައިވާ އިއުލާނުގެ މުއްދަތު ހަމަވެފައިވަނީ ޖަނަވަރީ 23 ވަނަ ދުވަހުގެ 13:00 އަށެވެ. އެ މަޤާމަށް އަސާސީ މުސާރައިގެ ގޮތުގައި 7035 ރުފިޔާ ލިބޭއިރު، އެލަވަންސްތަކާއެކު 15000 އަށް ވުރެ ބޮޑު މުސާރައެއް ހުށަހަޅާފައިވެއެވެ.
ކްރިމިނަލް ކޯޓުން އެންމެ ފަހުން އަޑުއެހުމެއް ލައިވްކޮށްފައިވަނީ ނިމިދިޔަ ޑިސެމްބަރު މަހުއެވެ. އެއީވެސް ރ. ފުއްގިރި ހިޔާނާތާއި ގުޅިގެން ރައީސް ޔާމީނަށް ކޮށްފައިވާ ދައުވާއާއި ގުޅޭ މައްސަލައިގެ އަޑުއެހުމެކެވެ. އެ އަޑުއެހުންވެސް ކުރިއަށް ގެންގޮސްފައިވަނީ ޑީޖޭއޭއިން އައިޓީ އޮފިސަރެއް ގެންގޮސް އޭނާގެ އެހީތެރިކަމާއެކުއެވެ. ނަމަވެސް އެކަމުގައި ދެފަރާތަށްވެސް ގޮންޖެހުންތަކެއް ހުންނަކަމަށް ކޯޓުން މައުލޫމާތު ދެއެވެ.
