ފައިޒަންއަށް އުފުލާފައިވާ ދައުވާ: އިންޓެލް ރިޕޯޓު ދިފާއަށް ދޫކުރުމުގެ ބަދަލުގައި ޝަރީއަތުން ކަނޑައަޅާ އުސޫލެއްގެ މަތިން ދިރާސާ ކުރެވޭނެ
ދައުލަތުން ވަނީ ހެކި ރައްކާތެރި ކުރުމުގެ އަމުރަކަށް އެދިފައި
ރާއްޖެއިން ބޭރުގައި ހިނގާ ހަނގުރާމައެއްގައި ބައިވެރިވުމަށް ރާއްޖެ ދޫކޮށް ދިޔުމުގެ ކުށުގެ ދައުވާ އުުފުލާފައިވާ ޙަސަން ފައިޒަން
ސީރިއާގައި ހިނގަމުންދާ ދާޚިލީ ހަނގުރާމައިގައި ބައިވެރިވުމަށް ތުރުކީ މަގުން ސީރިއާއަށް ދިޔަ މައްސަލައިގައި މއ. މާރަނގަ ޙަސަން ފައިޒަންގެ މައްޗަށް އުފުލާފައިވާ ދައުވާގެ ޝަރީއަތުގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
އެންމެ ފަހުން ބޭއްވި އަޑުއެހުން:
މި މައްސަލައިގައި އެންމެ ފަހުންއަޑުއެހުމެއްބާއްވާފައިވަނީ 24 ޖެނުއަރީ 2022 ގައެވެ. އެ ދުވަހުގެ އަޑުއެހުމުގައި ދައުލަތުން ވަނީ ހެކި ރައްކާތެރި ކުރުމުގެ އަމުރެއް ނެރެދެއްވުމަށް އެދި ހުށައަޅުއްވާފައެވެ. އެގޮތުން އިންޓެލް ރިޕޯޓުގެ ވަކި މިންވަރެއް ސިއްރު ކޮށްދީ، ދިފާއު އެއްގެ ގޮތުން ހިއްސާ ކުރެވޭ މިންވަރަށް ހިއްސާ ކޮށްދެއްވުމަށް އެދި ދައުލަތުން ވަނީ ހުށައަޅުއްވާފައެވެ. އަދި މި ލިޔުން ސީދާ ދައުވާ ލިބޭ ފަރާތަށް ދޫކުރުމުގެ ބަދަލުގައި، ޝަރީއަތުން ކަނޑައަޅާ އުސޫލެއްގެ މަތިން އެ ރިޕޯޓު ދިރާސާ ކުރުމަށް ދިފާއަށް ފުރުސަތު ދެއްވުމަށްވެސް ދައުލަތުން އެދެއެވެ.
ދައުލަތުން ވަނީ މި ރިޕޯޓުގައި ޤައުމީ ސަލާމަތާއި ގުޅުންހުރި މައުލޫމާތުތައްވެސް ހިމެނޭކަން ބަޔާން ކުރައްވާފައެވެ.
އެކަމާ ގުޅޭގޮތުން ދިފާއީ ވަކީލު ވިދާޅުވީ، ޓެރަރިޒަމް ޤާނޫނުގެ ދަށުން އިންޓެލް ރިޕޯޓަކީ ހެއްކެއްގެ ދަރަޖަ ލިބިގެންވާ އެއްޗެއްކަން ދައުލަތުން ބުނާއިރު، އެގޮތަށް ކަނޑައެޅިގެން ދިޔައީ ކޮން ތާރީޚެއްގައިތޯ ސުވާލުކުރައްވާފައެވެ. ދައުލަތުން އެކަމާއި ގުޅިގެން ބުނީ، އޭރު ދައުވާ ހުށައަޅާފައިވަނީ އޭރުގައި އޮތް ޓެރަރިޒަމް މަނާ ކުރުމުގެ ޤާނޫނުގެ ދަށުން ކަމަށާއި، އޭރުގެ ޤާނޫނަށް ބަލާއިރު އެފަދަ ލިޔެކިޔުންތަކަކީ ހެއްކެއްގެ ގޮތުގައި ބެލިގެންދާނެކަމަށް މާނަ ކުރެވޭކަމަށެވެ. ސަބަބަކީ އެއީ ތަޙުޤީޤީ އިދާރާއަކުން ދޫކޮށްފައިވާ ރަސްމީ ލިޔުމަކަށްވާތީ ކަމަށް ދައުލަތުން ބުނެއެވެ.
އަދި ފަހުން ގެނައި އިސްލާޙުގައި އިންޓެލް ރިޕޯޓު ހެއްކެއްގެ ގޮތުގައި ބެލެވިދާނެ ކަމަށް ސީދާކޮށް ބަޔާންކޮށްފައިވާއިރު، ދެ ޤާނޫނުގެ ދަށުން ބެލި ނަމަވެސް އިންޓެލް ރިޕޯޓަކީ ހެއްކެއްގެ ގޮތުގައި ބެލެވޭނެ ކަމަށް ދައުލަތުގެ ވަކީލާ ވިދާޅުވިއެވެ.
ދިފާއުން ވަނީ ރިޕޯޓުގެ އެއްވެސް ބައެއް އުނިކުރުމަށް ދެކޮޅު ހައްދަވާފައެވެ. އަދި އިންޓެލިޖެންސް ރިޕޯޓަކީ ރަސްމީ ލިޔުމެއް ނޫންކަމަށް ދިފާއީ ވަކީލު ވިދާޅުވިއެވެ. ނަމަވެސް ދައުލަތުން ވަނީ އެއް އިދާރާއިން އަނެއް އިދާރާއަށް ހުށައަޅާ ކޮންމެ ލިޔުމަކީ ރަސްމީ ލިޔުމެއް ކަމަށާއި، އެއީ އާންމު މީހަކު އަމިއްލައަށް ތައްޔާރުކުރާ ލިޔުމެއް ނޫން ކަމަށް ވިދާޅުވެފައެވެ.
އެކަމާއި ގުޅިގެން ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ އެ ދުވަހު ވަނީ ދެން އޮންނަ އަޑުއެހުމެއްގައި އެކަންކަމާއި ގުޅޭގޮތުން ގޮތެއް ނިންމަވާނެކަމަށް ވިދާޅުވެފައެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒް ރަޝާދުއެވެ.
ބުދަ ދުވަހުގެ އަޑުއެހުން:
މި މައްސަލައިގައި ބުދަ ދުވަހު ކުރިއަށް ދިޔަ އަޑުއެހުމުގައި ގާޒީ ވަނީ ހުށައެޅުންތަކަށް ގޮތެއް ކަނޑައަޅުއްވާފައެވެ. އެގޮތުން ގާޒީ ނިންމަވާފައިވަނީ ދައުލަތުން އެދިފައިވާ ގޮތަށް ހެކި ރައްކާތެރި ކުރުމުގެ ދާއިމީ އަމުރެއް ނެރެދެއްވާފައެވެ. އެގޮތުން ފުލުހުންގެ އިންޓެލިޖެންސް ރިޕޯޓު ދައުވާ ލިބޭ ފަރާތަށް ދޫކުރުމުގެ ބަދަލުގައި ޝަރީއަތުން ކަނޑައަޅާ އުސޫލެއްގެ މަތިން ދިރާސާ ކުރެވޭ ގޮތަށް ހެކި ރައްކާތެރި ކުރުމުގެ އަމުރެއް ގާޒީ ވަނީ ނެރެދެއްވާފައެވެ.
އެއަށްފަހު ވަނީ ހެކި ހާމަކުރުމުގެ ބައި ކުރިއަށް ގެންދަވާފައެވެ. އެގޮތުން ދައުލަތުން ވަނީ ޝަފަހީ ހެކިންގެ ގޮތުގައި 1 ހެއްކެއް ހުށައަޅާފައެވެ. އެއީ ފުލުހުންގެ މޯބައިލް ފޮރެންސިކް ރިޕޯޓު ތައްޔާރުކުރެއްވި އޮފިސަރެވެ. ކިތާބީ ހެކީގެ ގޮތުގައިވެސް ދައުލަތުން ގިނަ ހެކިތަކެއް ހުށައަޅާފައިވެއެވެ.
ދިފާއުން ވަނީ އެއްވެސް ދިފާއީ ހެއްކެއް ހުށައަޅާފައި ނުވާނެކަަމަށް ފާހަގަކޮށްފައެވެ. އެއާއެކު ގާޒީ ވަނީ ދެން މައްސަލައިގެ އަޑުއެހުންތައް ކުރިއަށްދާނެ ގޮތުގެ ތާވަލެއް ހިއްސާ ކުރައްވާފައެވެ.
ދެން މި މައްސަލައިގެ އަޑުއެހުމެއް އޮންނާނީ 13 ފެބްރުއަރީގައެވެ. އެއީ މި މައްސަލައިގެ ޝަރީއަތް ފަށައި، ދައުލަތުގެ ހެކިންގެ ހެކިބަސް ނެގުމެވެ. އެއަށްފަހު 20 ފެބްރުއަރީގައި ހެކި ބަހާއި ގުޅޭގޮތުން ވާހަކަ ދެއްކުން އޮންނާނެއެވެ. އަދި މާރޗު 13 ގައި ޚުލާސާ ގޮތެއްގައި ވާހަކަ ދެއްކުމަށް އަޑުއެހުމެއް ވަނީ ތާވަލު ކުރައްވާފައެވެ.
