އާސެނަލުން އެ ޓީމުގެ ކުރީގެ ކެޕްޓަން އަދި ގޮބެންގެ ފޯވާޑް ޕިއޭ-އެމެރިކް އޮބާމަޔަންގެ އެއްބަސްވުން އުވާލުމުން، ހިލޭ ޓްރާންސްފާއެއްގައި އޭނާ ބާސެލޯނާއަށް ސޮއިކޮށްފިއެވެ.

އާސެނަލާއެކު އުމުރުން 32 އަހަރު އޮބާމަޔަން އެންމެ ފަހުން ހަދާފައި އޮތް އެއްބަސްވުން ހަމަވަން އޮތީ 2023 ވަނަ އަހަރުގެ ހޫނު މޫސުމުގައެވެ. އެކަމަކު މިދިޔަ ޑިސެމްބަރު މަހު އަޚުލާގީ މައްސަލައަކާ ގުޅިގެން އާސެނަލުން ވަނީ އޮބާމަޔަން އަތުން ކެޕްޓަން ބޭންޑް އަތުލާފައެވެ.

އޭނާ އަތުން ބޭންޑް އަތުލީ ކުލަބުގެ ހުއްދަނެތި އާއިލާއާ ބައްދަލުކުރަން ފްރާންސަށް ދިއުމުން، އެކަމާ ބެހޭގޮތުން ކުލަބާ މެދު އުފެދުނު ދެބަސްވުމެއްގެ ތެރެއިން ކަމަށް ރިޕޯޓުތައް ބުނެއެވެ. އޭގެ ފަހުން އާސެނަލުން ކުޅުނު މެޗުތަކުގައި އޮބާމަޔަން ފެނިފައި ނުވާއިރު، މި ފަހުން ކުޅުނު މެޗުތަކުގައި އެ ޓީމުގެ ކެޕްޓަން ބޭންޑް އަޅައިގެން ކުޅެފައިވަނީ ފްރާންސްގެ ފޯވާޑް އަލެކްސަންޑަ ލަކަޒޭޓެވެ.

އެއާއެކު އާސެނަލް ދޫކޮށްލަން އޮބާމަޔަން ބޭނުންވިއިރު، މި ފަހަރުގެ ޓްރާންސްފާ ބާޒާރު ބަންދުވުމުގެ ކުރިން ހޯމަ ދުވަހުގެ ހެނދުނު އޭނާ ވަނީ ޕްރައިވެޓް ޖެޓެއްގައި ސްޕެއިނަށް ގޮސްފައެވެ. އަދި އެންމެ ފުރަތަމަ ލޯނު އެއްބަސްވުމެއްގެ ދަށުން އޮބާމަޔަން ބާސާއަށް ބަދަލުވާން މަސައްކަތްކުރި ނަމަވެސް، އޭނާގެ މުސާރަ ދޭން އެއްބަސްވާނެ ގޮތަކާ މެދު ހައްލު ނުހޯދި އެ ޑީލް މަޑުޖެހުނެވެ. ނަމަވެސް ފަހު ވަގުތު އާސެނަލުން ވަނީ ބާކީ 18 މަސް ދުވަސް އޮއްވައި އޮބާމަޔަންގެ އެއްބަސްވުން އުވާލާފައެވެ. އެއާއެކު ހިލޭ ޓްރާންސްފާއެއްގައި އޭނާ ވަނީ ބާސާއަށް ސޮއިކޮށްފައެވެ.

އާސެނަލް ދޫކޮށް އޮބާމަޔަން ބާސާއަށް ސޮއިކުރިއިރު، 2020 ވަނަ އަހަރު އޮބާމަޔަން އާސެނަލުގެ އެއްބަސްވުން އާކޮށްފައިވަނީ ބާސާއިން ލިބުނު ހުށަހެޅުމަށް ނޫނެކޭ ބުނުމަށްފަހުއެވެ. އެކަމަކު އާސެނަލުގައި އޮބާމަޔަންގެ ކުރިމަގެއް ނެތް ކަމަށް ބުނެ މީގެ ކުރިންވެސް ބައެއް ތަޖުރިބާކާރުން ވަނީ އޭނާ އާސެނަލް ދޫކޮށް ދިޔުމަށް ގޮވާލާފައެވެ.

ބޮރޫޝިއާ ޑޯޓްމުންޑް ދޫކޮށް 2018 ވަނަ އަހަރުގެ ޖެނުއަރީ މަހު 63 މިލިޔަން ޔޫރޯއަށް އާސެނަލަށް ސޮއިކުރި އޮބާމަޔަން ވަނީ އެ ޓީމަށް ކުޅެދިން 163 މެޗުގައި 92 ލަނޑު ޖަހާފައެވެ. އަދި ވަނީ އާސެނަލާއެކު އެފްއޭ ކަޕުގެ އިތުރުން ކޮމިއުނިޓީ ޝީލްޑުވެސް ކާމިޔާބުކޮށްފައެވެ.