"ހއ. ދިއްދޫ އެންމެ އަލިގަދަ ތަރި 1443"ގައި ބައިވެރިވުމުގެ ފުރުސަތު ހުޅުވާލައިފި

ދިއްދޫ މިޑްލް ސްޕޯރޓްސް ކްލަބުން އިންތިޒާމުކޮށްގެން ރަމަޟާން މަހު ހއ. ދިއްދޫގައި ބޭއްވުމަށް ހަމަޖެހިފައިވާ, "ހއ.ދިއްދޫ އެންމެ އަލިގަދަ ތަރި 1443" ޤުރްއާން މުބާރާތުގައި ބައިވެރިވުމުގެ ފުރުސަތު ހުޅުވާލައިފިއެވެ.

މިޑްލް ސްޕޯރޓްސް ކުލަބުން މައުލޫމާތުދޭ ގޮތުގައި, މި މުބާރާތުގައި 8 އަހަރުން މަތީގެ ދިއްދޫ ކޮންމެ ރައްޔިތަކަށާއި ދިއްދޫގައި ދިރިއުޅެމުންދާ ފަރާތްތަކަށް ބައިވެރިވެވޭނެއެވެ. މި މުބާރާތުގައި ބައިވެރިވުމުގެ ޝަރުތުތަކާއި މުބާރާތް ކުރިއަށްދާނެ ގޮތުގެ ތަފްސީލް މުބާރާތުގެ ގަވާއިދުގައި ހިމެނިފައިވާނެއެވެ.

މިޑްލް ސްޕޯރޓްސް ކްލަބުން މައުލޫމާތުދޭގޮތުގައި ކީރިތި ޤުރްއާނާމެދު އޮންނަ ލޯބި އިތުރު ކުރުމާއި ތަޖުވީދްގެ ހަމަތަކާއި އުސޫލްތަކާ އެއްގޮތްވާ ގޮތުގެ މަތީން ކީރިތި ޤުރްއާން ކިޔަވަން ދަންނަ ބަޔަކު އުފައްދައި, ކީރިތި ޤުރްއާން ހިތުދަސް ކުރުމުގެ ރޫހު އަށަގެންނުވަމަކީ މި މުބާރަތުގެ މަގުސަދެވެ. އަދި ރަމަޟާންމަހަކީ ކީރިތި ޤުރްއާން ބާވައިލެއްވި މައްސަރު ކަމަށްވާތީ, މިމައްސަރުގައި ރައްޔިތުންގެ މެދުގައި ކީރިތި ޤުރްއާނަށް ދޭންޖެހޭ އަހައްމިއްޔަތު އިތުރުކުރުމާއި, ދިއްދޫގައި ހާފިޒުން އުފެއްދުމާއި ރާއްޖެއާއި ރާއްޖެއިން ބޭރުންލިބޭ ޤުރްއާން މުބާރާތްތަކުގައި ދިއްދޫ ތަމްސީލް ކުރާނެ ދަރީންތަކެއް އުފެއްދުމެވެ.

މި މުބާރާތުގައި ބައިވެރިވުމަށް ޝައުގުވެރިވާ ފަރާތްތަކުން 17 ފެބްރުއަރީ 2022 ވަނަ ދުވަހުގެ 21:00ގެ ކުރީން "ހއ. ދިއްދޫ އެންމެ އަލިގަދަ ތަރި ޤުރްއާން މުބާރާތުގައި ބައިވެރިވުމަށް އެދޭ ފޯމް" ފުރުމަށް ފަހު އައިޑީކާޑުގެ ކޮޕީއާއިއެކު މިޑްލް ސްޕޯރޓްސް ކުލަބްގެ އިދާރާއަށް ހުށަހެޅުމަށް އެ ކުލަބްއިން އެދިފައިވެއެވެ. އަދި މުބާރާތުގައި ބައިވެރިވުމަށް އެދޭ ފޯމް ހުށަހަޅާ ފަރާތްތަކުގެ ތެރެއިން ޝަރުތު ހަމަވާ ބައިވެރީންގެ އަދަދު 20އަށް ވުރެން އިތުރުވާނަމަ އޮޑިޝަން ބެއްވޭނެ ކަމަށް އެ ކުލަބުން މައުލޫމާތުދެއެވެ. އޮޑިޝަން ބޭއްވުމަށް ހަމަޖެހިފައިވަނީ ފެބްރުއަރީ މަހުގެ 24ން 26އަށެވެ.

މުބާރާތް ބޭއްވުމަށް ހަމަޖެހިފައިވަނީ އޭޕްރީލް މަހުގެ 1ން 15އަށެވެ.