ހއ. ދިއްދޫ އަށް ރައީސް މުއިއްޒު ވަޑައިގަންނަވާތީ ޝުއޫރު ފާޅު ކުރަން އެ ރަށުގެ މަގުމަތީގައި ދަމާފައިވާ ބެނަރ ތަކުގެ ތެރެއިން 'ބަހުލޫލު' ޖަހާފައިވާ ބެނަރ ނަގަން ފުލުހުން އަންގައިފި އެވެ.
ހއ. އަތޮޅުގެ ވެރިކަން ކުރާ ދިއްދޫ އިން މި ނޫހަށް ވާހަކަ ދެއްކި މީހަކު ބުނީ އަންގާރަ ވިލޭރޭ ބެނަރ ދަމަން އުޅުނު މީހުންނާ ފުލުހުން ބައްދަލު ކޮށް 'ބަހުލޫލު' ޖަހާފައިވާ ބެނަރ ނަގަން އެންގީ އެއީ "އިޖުތިމާއީ މިންގަނޑުތަކަށް ނުފެތޭ އެއްޗެއް" ކަމަށް ބުނެއެވެ.
އެހެން ނަމަވެސް 'ބަހުލޫލު' އިޖްތިމާއީ މިންގަނޑަށް ނުފެތޭ ގޮތެއް ފުލުހުން ބުނެދީފައި ނުވާ ކަމަށް އޭނާ ބުންޏެވެ.
"ފުލުހުން ބުނީ އެހެން ޖަހާފައި ހުރި ބެނަރ ނުނަގައިފިއްޔާ އެމީހުން އެ ބެނަރ ނަގާނަމޭ،" އޭނާ ބުންޏެވެ.
ރައީސް ޑރ. މުހައްމަދު މުއިއްޒު ހއ. ދިއްދޫ އަށް ވަޑައިގަންނަވާތީ އެރަށުގައި މުއިއްޒު އާ ދެކޮޅަށް ސުލްހަވެރިކަމާއެކު ޝުއޫރު ފާޅުކުރުމަށް މަސައްކަތް ކުރާ ފަރާތްތަކަށް ހުރަސް އަޅާ ބިރު ދައްކަމުންދާ އަޑުތައް ވަނީ ފެތުރިފައެވެ.
"އަޅުގަނޑުމެން މިތިބީ ގާނޫނު އަސާސީން ލިބޭ ޚިޔާލުފާޅު ކުރުމުގެ ހައްގުގެ ބޭނުން ހިފަން، އެއީ މުއިއްޒު ނޫނީ މިހާރު ހުރި މެމްބަރުން ދެއްވި އެއްޗެއް ނޫން،" ދިއްދޫން ވާހަކަ ދެއްކި ފަރާތުން ބުންޏެވެ.
ރަށުން ވާހަކަ ދެއްކި އެހެން މީހަކު ބުނި ގޮތުގައި މިހާރު މިހިނގާ މިންވަރަށް ދުވަހަކުވެސް މީގެ ކުރިން ދިއްދޫގައި ސުލްހަވެރި ސިޔާސީ ހަރަކާތައް ހުރަސް އަޅަމުން ގޮސްފައި ނުވާ ކަމަށެވެ.
މި ނޫހަށް މައުލޫމާތު ލިބިފައިވާ ގޮތުގައި ފުލުހުން ވަނީ މުއިއްޒުގެ ދަތުރުފުޅާ ގުޅިގެން އިދިކޮޅު ފަރާތްތަކުން ޝުއޫރު ފާޅު ކުރުމަށް ބެނަރ ހަދަމުންދާ ތަނަށް ވެސް ވަދެ އެތަނުގައި ތިބި މީހުންނާ ސުވާލު ކޮށްފައެވެ.
އަނެއްކޮޅުން މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ދިއްދޫ ދާއިރާގެ އިސް ދެ އޮފިޝަލަކު އާދިއްތަ ދުވަހުގެ ރޭ ފުލުހަށް ވަނީ ހާޒިރުކޮށްފިއެވެ.
ދިއްދޫ ދާއިރާގެ އިސް ދެ އޮފިޝަލަކު ފުލުހަށް ހާޒިރު ކޮށް މައުލޫމާތު ސާފު ކޮށްފައިވާއިރު، ރައީސް މުއިއްޒު ދިއްދޫ އަށް ކުރައްވާ ދަތުރުފުޅަށް ހުރަސް އެޅޭ އެއްވެސް ކަމެއް ނުކުރުމަށް ދިއްދޫ ކައުންސިލުން އެމްޑީޕީ އަށް ވަނީ އަންގައިފައެވެ.
ޖެނުއަރީ މަހުގެ 28 ވާ އަންގާރަ ދުވަހުން 30 ވާ ބުރާސްފަތި ދުވަހުގެ ނިޔަލަށް މުއިއްޒު ކުރައްވާ މި ދަތުރުފުޅުގައި ހއ. ގެ 10 ރަށަކަށް ވަޑައިގަތުމަށް ވަނީ ހަމަޖެހިފައެވެ.
ރައީސް މުއިއްޒުގެ ސަރުކާރަށް އަހަރަކަށް ވުރެ ގިނަ ދުވަސް ވެފައިވާއިރު ރަށްރަށުގެ ތަރައްގީ އަށް އެކަށީގެންވާ މަސައްކަތްތަކެއް ކުރަމުން ނުދާ ކަމާއި ފަށާފައި ހުރި މަސައްކަތްތައްވެސް ހުއްޓިފައި ހުރުމުގެ ޝަކުވާ ވަނީ އިތުރުވެފައެވެ.
