ދިއްދޫގެ އިސްލާމިކް ސެންޓަރުގެ މަސައްކަތް ފަށައިފި

ހއ. ދިއްދޫގައި އިމާރާތްކުރުމަށް ހަމަޖެހިފައިވާ އިސްލާމިކް ސެންޓަރުގެ އަމަލީ މަސައްކަތް ފަށައިފިއެވެ.

މިކަމަށްޓަކައި ބުރާސްފަތި ދުވަހު ދިއްދޫގައި ބޭއްވި ރަސްމިއްޔާތުގައި މި މަަސައްކަތް ފައްޓަވައިދެއްވީ މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު އަލީ އާއި ރައްޔިތުންގެ މަޖިލީހުގެ ދިއްދޫ ދާއިރާގެ މެންބަރު ޢަބްދުﷲ ވަހީދު އާއި ދިއްދޫ ކައުންސިލްގެ ރައީސް ޢަބްދުﷲ ރަޝީދު އަދި ހއ. އަތޮޅު ކައުންސިލްގެ ރައީސް މޫސާ ޝަފީޤެވެ.

ދިއްދޫގައި އިމާރާތްކުރާ އިސްލާމިކް ސެންޓަރަކީ 1500 މީހުންގެ ޖާގައިގެ ސެންޓަރެކެވެ. އެ ސެންޓަރުގައި 2 ފަންގިފިލާ ހުންނައިރު 450 މީހުންގެ ޖާގައިގެ މަލްޓިޕަރޕަސް ހޯލެއް ވެސް ހެދުމަށް ވަނީ ނިންމާފައެވެ.

މީގެ އިތުރުން ކޮންމެ ކްލާސްރޫމެއްގައި 30 ކުދިންނަށް ތިބެވޭނެ ޖާގައިގެ 4 ކްލާސްރޫމާއިި، 2 ސެމިނަރ ރޫމް އަދި އިސްލާމިކް ލައިބްރަރީއަކާއި އޮފީސްބައެއް ވެސް އެ އިސްލާމިކް ސެންޓަރުގައި ހެދުމަށް ވަނީ ހަމަޖެހިފައެވެ.

މި މަޝްރޫއަކީ 50,895,299.07  (ފަންސާސް މިލިޔަން އަށްލައްކަ ނުވަދިހަ ފަސްހާސް ދުއިސައްތަ ނުވަދިހަ ނުވަ ރުފިޔާ ހަތްލާރި) ގެ މަޝްރޫއެކެވެ.