ޚިޔާލު ފާޅުކުރުމުގެ ހައްގު ރައްޔިތުންނަށް ދޭން ނުކެރޭ ވެރިޔަކު މަޤާމުގައި ދެމިހުރުމުގެ ހައިސިއްޔަތެއް ނެތް: ފައްޔާޒް
28 ޖެނުއަރީ 2025 | އަންގާރަ 08:26ޚިޔާލު ފާޅުކުރުމަކީ ގާނޫނުއަސާސީން ކަށަވަރުކޮށްދީފައި އޮތް އަސާސީ ޙައްޤެއް
އެމްޑީޕީގެ ޗެއަރޕާސަން ފައްޔާޒް އިސްމާއިލް
ހިޔާލު ފާޅުކުރުމަކީ ގާނޫނުއަސާސީން ކަށަވަރު ކޮށްދީފައި އޮތް އަސާސީ ޙައްގެއް ކަމަށާއި އެ ހައްގު ރައްޔިތުންނަށް ދޭން ނުކެރޭ ވެރިއަކު މަޤާމުގައި ދެމި ހުރުމުގެ ހައިސިއްޔަތެއް ނެތް ކަމަށް އެމްޑީޕީގެ ޗެއާޕާސަން، ފައްޔާޒް އިސްމާއިލް މިއަދު ވިދާޅުވެއްޖެ އެވެ.
ފައްޔާޒު މިހެން ވިދާޅުވީ، ހއ. ދިއްދޫ އަށް ރައީސް ޑރ މުޙައްމަދު މުއިއްޒު ވަޑައިގަންނަވާތީ ޝުއޫރު ފާޅު ކުރަން އެ ރަށުގެ މަގުމަތީގައި ދަމާފައިވާ ބެނަރތައް ނަގަން ފުލުހުން އެންގުމާ ގުޅިގެން އެކަން އިޝާރާތް ކުރައްވައެވެ.
އެކްސްގައި ކުރެއްވި ޓްވީޓްގައި ފައްޔާޒު ވަނީ ޤާނޫނުއަސާސީއާ އަސާސީ ޙައްޤުތަކުގެ ދިފާޢުގައި ބަސްބުނުމަށް ދިއްދޫ ރައްޔިތުން ކުރެއްވި ހިތްވަރަށް ސާބަސް ދަންނަވާފައެވެ.
"ޚިޔާލު ފާޅުކުރުމަކީ ގާނޫނުއަސާސީން ކަށަވަރުކޮށްދީފައި އޮތް އަސާސީ ޙައްޤެއް. އެ ޙައްޤު ރައްޔިތުންނަށް ދޭން ނުކެރޭ ވެރިޔަކު މަޤާމުގައި ދެމިހުރުމުގެ ހައިސިއްޔަތެއް ނެތް. ޤާނޫނުއަސާސީއާ އަސާސީ ޙައްޤުތަކުގެ ދިފާޢުގައި ބަސްބުނުމަށް ދިއްދޫ ރައްޔިތުން ކުރެއްވި ހިތްވަރަށް ސާބަސް ދަންނަވަން" ފައްޔާޒް ކުރެއްވި ޕޯސްޓުގައި ވެއެވެ.
ހއ. އަތޮޅުގެ ވެރިކަން ކުރާ ދިއްދޫ އިން މި ނޫހަށް ވާހަކަ ދެއްކި މީހަކު ބުނީ އަންގާރަ ވިލޭރޭ ބެނަރ ދަމަން އުޅުނު މީހުންނާ ފުލުހުން ބައްދަލު ކޮށް 'ބަހުލޫލު' ޖަހާފައިވާ ބެނަރ ނަގަން އެންގީ އެއީ "އިޖުތިމާއީ މިންގަނޑުތަކަށް ނުފެތޭ އެއްޗެއް" ކަމަށް ބުނެއެވެ.
ރައީސް ޑރ. މުހައްމަދު މުއިއްޒު ހއ. ދިއްދޫ އަށް ވަޑައިގަންނަވާތީ އެރަށުގައި މުއިއްޒު އާ ދެކޮޅަށް ސުލްހަވެރިކަމާއެކު ޝުއޫރު ފާޅުކުރުމަށް މަސައްކަތް ކުރާ ފަރާތްތަކަށް ހުރަސް އަޅާ ބިރު ދައްކަމުންދާ އަޑުތައް ވަނީ ފެތުރިފައެވެ.
