އާރަށު މައްސަލައިގައި ޔާމީނަށް ހުކުމް ކުރުން ޖޫން މަހަށް އަވަސްކޮށްފި
ގާޒީ ވަނީ ހުރިހާ މައްސަލައެއްވެސް ކޯޓުން ކުރިއަށް ގެންދާނީ ވަކި ފަރާތަކަށް ނުޖެހި، ހަމަހަމަކަމާއެކު ކަމަށް ވިދާޅުވެފައި
އިދިކޮޅު ކޯލިޝަނުން ބޭއްވި ޖަލްސާގައި ރައީސް އަބްދުﷲ ޔާމީން ވާހަކަ ދައްކަވަނީ
ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން މަގާމުގެ ނުފޫޒު ބޭނުންކޮށް ރިޝްވަތު ނެގި މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އުފުލާފާއިވާ ދައުވާގެ ހުކުމް ކުރުން ޖޫން މަހަށް އަވަސްކޮށްފިއެވެ.
އާރަށު ޚިޔާނާތުގެ މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 27 ޖެނުއަރީ 2022 ގައެވެ. އެ އަޑުއެހުމުގައި މައްސަލަ ބައްލަވާ ގާޒީ އަހުމަދު ޝަކީލް ވަނީ ޔާމީންގެ މައްޗަށް އުފުލާފާއިވާ ދައުވާގެ ޝަރީއަތް ކުރިއަށްދާނެ ގޮތުގެތާވަލުދައުލަތާއި ދިފާއަށް ހިއްސާ ކުރައްވާފައެވެ.
ގާޒީ ހިއްސާ ކުރެއްވި ތާވަލަށް ބަލާއިރު, ޝަރީއަތް ފެށުމުގެ ކުރިން އިބްތިދާއީ ގޮތުން ގިނަ އަޑުއެހުންތަކެއް ތާވަލު ކޮށްފައިވެއެވެ. އެގޮތުން ޝަރީއަތް ފެށުމުގެ ކުރީގެ މަރުހަލާތަކަށް 6 އަޑުއެހުމެއް ގާޒީ ހިއްސާ ކުރެއްވި ތާވަލުގައި ބަޔާން ކުރައްވާފައިވެއެވެ. އަދި މައްސަލައިގެ ޝަރީއަތް ފެށުމަށް ތާވަލުކޮށްފައި އޮތީ ޖޫން މަހުގެ 26 ވަނަ ދުވަހުއެވެ. އޮކްޓޯބަރު މަހުގެ 25 ވަނަ ދުވަހު ޚުލާސާ ބަޔާން އިއްވުމަށް ތާވަލު ކޮށްފައިވާއިރު، މި ތާވަލާ އެއްގޮތަށް ކުރިއަށްދާނަމަ މި މައްސަލައިގެ ހުކުމްކުރުން އޮންނާނީ ނޮވެމްބަރު މަހުގެ 25 ހިސާބުގައިކަމަށް ގާޒީ ވިދާޅުވިއެވެ.
އެހެންނަަމަވެސް އެ ތާވަލަށް ބަދަލު އައުން އެކަށީގެންވާކަމަށް އެ ދުވަހުގެ އަޑުއެހުމުގައިވެސް ގާޒީ ވިދާޅުވެފައިވެއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި މި މައްސަލައިގައި ގާޒީ ހިއްސާ ކުރެއްވި ތާވަލާ ގުޅޭގޮތުން ދެފަރާތާ ވަނީ މަޝްވަރާވެސް ކޮށްފައެވެ. އެގޮތުން ޕީޖީ އޮފީހުން ވަނީ މި މައްސަލައިގެ ތާވަލަށް ބަލާއިރު، އެއް ދުވަހުން ކުރިއަށް ގެންދެވިދާނެ އަޑުއެހުންތައްވެސް ވަކި ދުވަސްތަކަކަށް ބަހާލާފައިވާތީ، ތާވަލާ ގުޅޭގޮތުން އެ އޮފީހުގެ ޚިޔާލުވެސް ހިއްސާކޮށްފައެވެ. އަދި އެކަމާ ގުޅޭގޮތުން ކްރިމިނަލް ކޯޓާ ވަނީ މަޝްވަރާވެސް ކޮށްފައެވެ. އެހެންނަމަވެސް، އެކަންކަން ލިއުމުން ކޯޓަށް ހުށައެޅުމުގެ ކުރިން ކޯޓުން ވަނީ ތާވަލަށް ބަދަލު ގެނެސް، ޖޫން މަހު ހުކުމް ކުުރުމަށް ތާވަލުކޮށް ދެފަރާތަށް ތާވަލު ހިއްސާކޮށްފައެވެ. އެގޮތުން ހުކުމް ކުރުން ޖޫން 30އަށް މިހާރު ވަނީ އަވަސްކޮށްފައެވެ.
ދައުވާ ލިބޭ ފަރާތުގެ މައްޗަށް ހުށަހެޅިފައިވާ ދައުވާ ކުރިއަށްދާނެ ތަނެއް އޮތްކަމަށް ފަނޑިޔާރު ނިންމަވައިފިނަމަ، އެ ގާނޫނުގެ ސާދަވަނަ ބާބުގައިވާ ގޮތުގެމަތިން, ޝަރީއަތް ފެށުމުގެ ކުރިން ހުށަހަޅަން ބޭނުންވާ ހުށަހެޅުންތައް ހުށަހެޅުމަށް މުއްދަތެއް ކަނޑައަޅައި، އެ މުއްދަތުން އުނިނުވާ ގޮތަށް، މައްސަލައިގެ ޝަރީއަތުގެ އަޑުއެހުންތައް ބާއްވާނެ ދުވަސްތައް، ދައުލަތާއި ދައުވާ ލިބޭ ފަރާތާ މަޝްވަރާކުރުމަށްފަހު، ކޯޓުން ކަނޑައަޅައި ތާވަލު ކުރަންވާނެ ކަމަށް ޖިނާއީ އިޖުރާއަތުގެ ގާނޫނުގެ 116 ވަނަ މާއްދާގައި ވަނީ ބަޔާންކޮށްފައެވެ.
މި މައްސަލައިގައި އެންމެ ފަހުން ބޭއްވި އަޑުއެހުމުގައި ގާޒީ ވަނީ ހުރިހާ މައްސަލައެއްވެސް ކޯޓުން ކުރިއަށް ގެންދާނީ ވަކި ފަރާތަކަށް ނުޖެހި، ހަމަހަމަކަމާއެކު ކަމަށް ވިދާޅުވެފައެވެ. އަދި ކޯޓުން މައްސަލަތައް ކުރިއަށް ގެންދިއުމުގައި އެއްވެސް ފަރާތެއްގެ ބިރަކަށް، ނުފޫޒަކަށް ނުބައްލަވާނެ ކަމަށް ގާޒީ ވިދާޅުވިއެވެ.
އެ އަޑުއެހުމުގައި ދައުލަތުން ވަނީ ޔާމީނުގެ މައްޗަށް ކުރާ 2 ދައުވާ އިއްވާފައެވެ. ނަމަވެސް ޔާމީނުގެ ގާނޫނީ ވަކީލުންގެ ޓީމުގެ ބައެއް މެމްބަރުން ކޮވިޑުގެ ސަބަބުން އަޑުއެހުމުގައި ބައިވެރިނުވެވޭ ކަމާއި، ދައުވާއަށް ޖަވާބުދާރީވުމަށް ވަގުތު ބޭނުންވާކަން ފާހަގަކޮށްފައިވާތީ, ދައުވާއަށް ޖަވާބުދާރީވުމުގެ ބައި ކުރިއަށް ގެންދަވާފައެއް ނުވެއެވެ. އަދި ވަކީލުންގެ ޓީމު އެއްކޮށް ނެތުމުގެ ސަބަބުން ދައުވާ ސާފުނުވާކަމަށް ރައީސް ޔާމީނުވެސް ވިދާޅުވެފައިވާތީ ގާޒީވެސް ނިންމެވީ މައްސަލައަށް ޖަވާބުދާރީވުމަށް އެކަށީގެންވާ ވަގުތާއި ފުރުސަތު ދެއްވުމަށެވެ.
ދެން އޮންނަ އަޑުއެހުމުގައި, ދައުވާ ސާފު ކުރުމާއި ޖަވާބުދާރީވުން އޮންނާނެކަމަށް ގާޒީ ވިދާޅުވިއެވެ.
