ޖަލުން ނުކުންނެވިގޮތަށް ހައްދަވަން ފެއްޓެވީ ކޮސް ގިނަ މިސްޓޭކްތަކެވެ.

ކޮސް ގިނަ މިސްޓޭކަކީ ރާއްޖޭގެ ރައްޔިތުންނަށް އައު ނަމަކަށް ނުވާނެކަން ގައިމެވެ. އެނަމުގައި ނެރުނު ފިލްމެއް ބަލައި, ހީ, އެތައް ބަޔަކު އުޅުނެވެ. ނަމަވެސް މިފަހަރު މި ދައްކަން އުޅެނީ ފިލްމެއްގެ ވާހަކައެއް ނޫނެވެ. ނުވަތަ ފްލޯކު ވާހަކައެއްވެސް ނޫނެވެ. ހަގީގީ ހާދިސާއެކެވެ. ދިވެހީންނަށް އެނގޭ ބޮޑު ސިއްރެއްވެސްމެއެވެ.

އާންމު ގޮތެއްގައި މީހުން ކޮސްގޮވައި، ކޮސް ކަންތައްކޮށް އުޅެނީ ހަދާނެގޮތް ހުސްވެ ދައްކާނެ ވާހަކައެއް ނެތުމުންނެވެ. ހަތަރު އުދަރެސް ފެނުޖެހުމުންނެވެ. މިފަހަރުވެސް މިއޮތީ އެފަދަ ވާހަކައެކެވެ. ރައްޔިތުންގެ އެތައް މިލިއަން ރުފިޔާއެއް ދަވާލިކަމުގެ ކުށުގައި ދުވަސްގަނޑެއް ވަންދެން ޖަލުގައި ހުންނެވުމަށްފަހު ނިކުމެވަޑައިގަތް ގޮތަށް ކުރީގެ ރައީސް އަބްދުﷲ ޔާމީނު ކުރައްވަން ފައްޓަވާފައިވަނީ މި މަސައްކަތެވެ. ކޮސް ގޮވުމާއި ކޮސް ކަންތައް ކުރެއްވުމެވެ.

އެމަނިކުފާނު ޖަލުން މިނިވަންވެވަޑައިގެން އެންމެ ފުރަތަމަ ބޭއްވި ޖަލްސާއަށްް ނަޒަރު ހިންގާލަމާތޯއެވެ. ފަސް އަހަރު ދުވަހު ގައުމުގެ ރައީސްކަން ކުރެއްވި ފަރާތެއްގައި, ރައްޔިތުންގެ މައްޗަށް ކޮންމެވެސް ވަރެއްގެ ކުލުނެއް ހުންނާނެކަމަށް ގަބޫލުކުރެވުނެވެ. ނަމަވެސް ކޮވިޑުގެ ދަތި މިހާލަތުގައި ދޮޅު ގަޑިއިރު ޕޯޑިއަމް ކައިރީގައި ހުންނަވައި އަޑަށް ބާރުލައްވާފައި ގިނަ ވާހަކަތަކެއް ދެއްކެވިއިރުވެސް ރައްޔިތުންގެ ހާލާމެދު ވިސްނާވަޑައިގެންފައެއް ނުވެއެވެ. މި ދަނޑިވަޅުގައި ރައްޔިތުން ތަހައްމަލު ކުރަމުންދާ ދަތި އުނދަގުލުގެ ވާހަކައެއްވެސް ނުދައްކަވައެވެ. އޭގެ ބަދަލުގައި އެމަނިކުފާނުގެ މިސްރާބު ހުރީ 2023 ވަނަ އަހަރު އޮންނަ އިންތިޚާބައް ކެމްޕެއިނު ކުރެއްވުމަށެވެ.

އެޖަލްސާގަައި އަޑަށް ބާރުލައްވައި، މޭފުއްޕަވާފައި ޔާމީނު ދެއްކެވި އެއް ވާހަކައަކީ އެމަނިކުފާނުގެ ސަރުކާރުގައި ޚިޔާލުފާޅުކުރުމުގެ މިނިވަންކަން އޮތް ވާހަކައެވެ. މިއާއެކު ބައެއް ނޫސްތަކާ ޓީވީތައް ހިންގާ ފަރާތްތަކަށް ބުނާނެ ހަމަ އެކައްޗެއްވެސް ނޭނގުނެވެ. ވާނީވެސް އެހެންތާއެވެ. ޔާމީނުގެ ސަރުކާރަކީ މީޑިއާތަކަށް އެންމެ ދުއްޕާންކުރި ސަރުކާރެވެ. ގިނަ އަދަދެއްގެ ނޫސްވެރީންނަށް އަނިޔާކޮށް ހައްޔަރުކުރިއެވެ. ބައެއް ނޫސްތައް ކުރިއަށް ގެންދިޔަނުދީ ހުއްޓުވާލިއެވެ. އަނެއްބައި ނޫސްތައް ބޮޑެތި އަދަދުތަކުން ޖޫރިމަނާ ކުރިއެވެ. މީޑިއާގައި ދައުރުވާން ޖެހުނީ އެމަނިކުފާނު ހިތްޕުޅާވާ ވާހަކަތައް އެކަންޏެވެ. އެމަނިކުފާނުވަނީ އެރޭގައި މި ކޮސްގޮވުމާއެކު ބައިކޮޅަށް ގޯލު ޖައްސަވާފައެވެ.

ދެން އެމަނިކުފާނު ބާރު ސްޕީޑުގައި ކުރެއްވި ކަމަކީ "އިންޑިއާ އައުޓް"ގެ ނަމުގައި ކެމްޕެއިނެއް ކުރިއަށް ގެންދެވުމެވެ. ކާރޫބާރޫ ބޮޑުހެން ހީވާ މަގުތަކަށް ނިކުންނަވައި ރައްޔިތުންނަށް ތުރާވާނެހެން އަޑުގަދަކުރައްވަން ފެއްޓެވިއެވެ. ނުވިތާކަށް ރަށްރަށަށް ވަޑައިގެން, ފާރުތަކުގައިވެސް އިންޑިއާ އައުޓް ޖެހުމަށް ގޮވާލެއްވީއެވެ. އަދި އަމިއްލަ ގޭގައި މީހުން ލިޔާ އެފަދަ އެއްޗެއްސާ ސަރުކާރަށް ނުބެހެވޭނެކަމަށްވެސް ވިދާޅުވިއެވެ. މަގުތަކަށް ގިނަވެ ލާޗާރު ބިޗާރަށް އުޅޭ ކުދިން ކުރާކަހަލަ މިފަދަ ކަންތައް ކުރުމަށް ކުރީގެ ރައީސަކު ގޮވާލައްވާނެކަމަށް ހީކުރާނީ ކާކުތޯއެވެ. މިހާ ހިސާބުން އެމަނިކުފާނުގެ ފެންވަރު ވަރަށް ރަނގަޅަށް ސާފުވިއެވެ.

އަނެއްކޮޅުން ރާއްޖެ ފަދަ ގައުމަކަށް ބޭރުގެ ގައުމުތަކުގެ އެހީ އިންތިހާއަށް ބޭނުންވާނެ ކަމަށްވެސް ވިދާޅުވީ އެމަނިކުފާނެވެ. އަދި ވަކިން ޚާއްސަކޮށް އިންޑިއާފަދަ ގައުމުތަކުގެ އެހީ ރާއްޖެއަށް ވަރަށް މުހިންމުކަމަށް ޚުދު އެމަނިކުފާނުވެސް ވިދާޅުވިއެވެ. ނަމަވެސް އޮއެވަރާއެކު އެމަނިކުފާނުގެ ވާހަކަފުޅަށްވެސް ވަނީ ބަދަލުތައް އައިސްފައެވެ. އޭރު ދެއްކެވި ވާހަކައާއި މިހާރު ދައްކަވާ ވާހަކަ ދިމާނުވާތީ ގިނަ ރައްޔިތުން އަންނަނީ އެމަނިކުފާނު ވިދާޅުވާ ބަހުގެ އިތުބާރާމެދުވެސް ސުވާލު އުފައްދަމުންނެވެ. މޮޅުވާންވެގެން ކުރެއްވި ކަންތަކުން އަނެއްކާވެސް ގޯލު ވަނީ ބައިކޮޅަށެވެ.

ރާއްޖޭގެ ސިޔާސީ ހޮޅުއަށީގައި މިހާރު އެންމެ ފޯރިގަދަކޮށް ދެކެވޭ ވާހަކައަކީ ކޮމަންޑޫ ދާއިރާގެ ބައި އިލެކްޝަންގެ ވާހަކައެވެ. އިދިކޮޅު ޕީޕީއެމުން ކުރިމަތިލާފައިވާ ކެންޑިޑޭޓުގެ ކެމްޕެއިނުގައި ޔާމީނުވެސް އަންނަނީ ހަރަކާތްތެރިވެވަޑައިގަންނަވަމުންނެވެ. އެގޮތުން ކޮމަންޑޫ ދާއިރާއަށް ޕީޕީއެމްއިން ވާދަކުރައްވާ ކެންޑިޑޭޓް މޫސާ ފަތުހީއަށް ކެމްޕޭން ކުރެއްވުމަށް ބޭއްވި ޖަލްސާއެއްގައި ވާހަކަފުޅުދައްކަވަމުން ޔާމީނު ވިދާޅުވީ، 2023ގައި ޕީޕީއެމްގެ ސަރުކާރެއް ގާއިމުވެއްޖެނަމަ، ސަރުކާރުގެ ކުންފުނިތަކާއި މުއައްސަސާތަކުގެ ވަޒީފާތަކަށް ނަންގަވާނީ ޕީޕީއެމްއަށް ނިސްބަތްވާ ފަރާތްތައް ކަމަށެވެ.

ޔާމީނު ވިދާޅުވީ، މިހާރު ޕީޕީއެމްއާއެކު މަސައްކަތްކުރާ މީހުންނަށް ޖާގަ އޮންނާނެކަމަށެވެ. އަދި ވަޒީފާ ދެއްވާނީ ހަމައެކަނި ޕީޕީއެމްއަށް ނިސްބަތްވާ ފަރާތްތަކަށް އެކަނި ކަމަށާއި، އެހެން ބަޔަކަށް ޖާގަވެސް ނޯންނާނެކަމަށެވެ.

ޔާމީނުގެ މި ވާހަކަފުޅާއެކު އަނގަ ބަންދުކޮށްގެން ތިބި މީހުންގެ ދުލަށް އެމަނިކުފާނު މިވަނީ ކެތްނުވާވަރު ކުރައްވާފައެވެ. މިއީ އައު ކަމެއް ނޫނެވެ. ރައީސް ޔާމީނުގެ ވެރިކަމުގައި މީގެ ކުރިންވެސް ކަންހިނގާފައި ވަނީ މި ބީދައިންނެވެ. ވަޒީފާ އަދާކުރާ މީހާގެ އިތުރުން އާއިލާ މެމްބަރުންވެސް އެމަނިކުފާނުގެ ޕާޓީއަށް ސޮއި ނުކޮށްފިނަމަ ވަޒީފާ ގެއްލޭނެކަމުގެ ބިރު މީގެ ކުރިންވެސް ދެއްކެވިއެވެ.

ފެބްރުއަރީ މަހުގެ ފަސްވަނަ ދުވަހު އޮންނަ އިންތިޚާބު ކާމިޔާބުކުރުމަށް ދެއްކެވި ވާހަކަތަކުގައިވެސް ގޮވުނީ ކޮހެވެ. މީހުން ބުނެ އުޅެއެވެ. އެމީހަކަށް ދެއްކޭނީ އެމީހެއްގެ ހިތުގައި އޮންނަ ވާހަކައެކެވެ. އަނެއްކާވެސް ބައިކޮޅަށް ގޯލެކެވެ. މިފަހަރުގެ ގޯލާއެކު ހެޓްރިކެއް ހެއްދެވުނީއެވެ. މިފަދަ އެތައް ހެޓްރިކެއް އެމަނިކުފާނު ހައްދަވާފައި އެބަހުއްޓެެވެ. ބެލެވޭ ގޮތުގައި ކުރިއަށް އޮތްތަނުގައިވެސް ގޮތް ހުސްވެ މިފަދަ ގިނަ ބައިވަރު ހެޓްރިކްތަކެއް ހައްދަވާނެއެވެ. ޚާއްސަކޮށް 2023ގެ އިންތިޚާބާ ގާތްވާ ވަރަކަށެވެ.