ވިދާޅުވާން ބޭނުންނުވެ، ޔާމީންގެ ތައުރީފު ރައީސް ސާލިހުގެ ސަރުކާރަށް

ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުން ހިންގި މަޝްރޫއުތަކަށް, ޖަލުހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން ތައުރީފު ކުރައްވައިފިއެވެ.

ޕީއެންއެފްގެ ޖަލްސާއެއްގައި އޯޑިއަންސްގައި އިންނަވައި ވާހަކަދައްވަމުން ޔާމީން ވިދާޅުވީ، ދެ ސަރުކާރު އަޅާކިޔާއިރު، ފުރަތަމަ ދެމަހު ވެސް ރައީސް ސާލިހުގެ ސަރުކާރު 2.7 ބިލިއަން ޕްރޮޖެކްޓްތަކަށް ހަރަދުކޮށްފައިވާ ކަމަށެވެ. އަދި ވިދާޅުވީ މިސަރުކާރުން ރައީސް ސާލިހުގެ ސަރުކާރާއި އެއްވަރަށް މަސައްކަތް ކުރާނެ ކަމަށް އުންމީދު ކުރެވުނު ކަމަށެވެ. ނަމަވެސް މިސަރުކާރުން ޕްރޮޖެކްޓްތަކަށް ހަރަދުކޮށްފައިވަނީ އެއް ބިލިއަން ރުފިޔާ ކަމަށް ޔާމީން ވިދާޅުވިއެވެ.

ޔާމީން ވިދާޅުވީ ރައީސް ސާލިހުގެ ސަރުކާރަށްވުރެ އިތުރަށް މިސަރުކާރުން މަހަކު 150 މިލިއަން ރުފިޔާ ހޭދަ ކޮށްފައިވާ ކަމަށެވެ. އަދި އެސަބަބާއި ހުރެ ރައްޔިތުންނަށް ބޭނުންވާ ބޮޑެތި މަޝްރޫއުތައް މިސަރުކާރުން ނުހިންގޭ ކަމަށް ޔާމީން ވިދާޅުވިއެވެ.

މީގެ އިތުރުން ޔާމީން ވަނީ މިސަރުކާރުން މުވައްޒަފުންނަށް ބިރު ދައްކަމުންދާ ކަމަށް ތުހުމަތުކުރައްވައި ވާހަކަފުޅު ދައްކަވާފައެވެ.

ޔާމީން ވިދާޅުވީ ރައީސް ޑރ.މުހައްމަދު މުއިއްޒުގެ ކެންޑިޑޭޓުން ރައްޔިތުންނަށް ވަޒީފާގެ ބިރު ދައްކަމުންދާ ކަމަށާއި، އާއިލީ މީހުންގެ ދަރިން ވެސް ވަޒީފާތަކުން ވަކިކުރާނެ ކަމުގެ އިންޒާރު ދެމުންދާ ކަމަށެވެ. މިއީ ރައްޔިތުންނާއި މެދު ސަރުކާރަކުން ކަންތައްތައް ކުރަންޖެހޭ ގޮތް ނޫން ކަމަށް ޔާމީން ވިދާޅުވިއެވެ.