މުއިއްޒަކީ ލިބެންވާ އެންމެ ލާރި ފޮއްޗެއްވެސް ދޫކޮށްލައްވާނެ ބޭފުޅެއް ނޫން: ރައީސް ޔާމީން
މުލީއާގެ މަރާމާތުގެ މަސައްކަތް ނިމެންދެން ދިމްޔާތުގައި ހުންނެވި އިރު ގޭގޭ ޚަރަދަށް މުއިއްޒު ސަރުކާރުން ފައިސާ ނެންގެވި ކަމަށް ޔާމީން ވިދާޅުވި
މިހާރުގެ ރައީސުލްޖުމްހޫރިއްޔާ ޑޮކްޓަރު މުޢިއްޒު އަދި ކުރީގެ ރައީސް ޔާމީން
ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެން ފުރަތަމަ ދުވަސްކޮޅު މުލީއާގޭގެ އާބާތުރަ ފިލުވަން ހޭދަވި މުއްދަތުގައި އެމަނިކުފާނު ހުންނެވީ އަމިއްލަފުޅު ގެކޮޅު ދިމްޔާތުގައި ކަމަށާއި އެ މުއްދަތުގައި ދިމްޔާތަށް ސަރުކާރުން ކުލި ނެންގެވި ކަމަށް ރައީސް ޔާމީން ވިދާޅުވެއްޖެއެވެ.
މުލީއާގޭގެ އާބާތުރަ ފިލުވާ ނިމެންދެން "ދިމްޔާތުގައި ހުންނެވި ހުންނެވުމަށް މުއިއްޒު ކްލެއިމް ކުރެއްވި،" ޔާމީން ވިދާޅުވިއެވެ.
ރައީސް ޔާމީންގެ ޕާޓީ ޕީޕަލްސް ނޭޝަނަލް ފްރަންޓް (ޕީއެންއެފް) ޖަލްސާގައި ހުކުރުވިލޭރޭ ވާހަކަފުޅު ދައްކަވަމުން ޔާމީން ވިދާޅުވީ "މުއިއްޒު އަކީ އެވަރަށް ކްލެއިމް ކުރެއްވި ބޭފުޅެއް," ކަމަށެވެ.
"އެހެންވީމާ މުއިއްޒަކީ ލިބެންވާ އެންމެ ލާރި ފޮއްޗެއްވެސް ދޫކޮށްލައްވާނެ ބޭފުޅެއް ނޫން،" ކަމަށް ރައީސް ޔާމީން ވިދާޅުވިއެވެ.
ސަރުކާރުގެ ޚަރަދުތައް ބޮޑުވެ، ރައީސުލްޖުމްހޫރިއްޔާ ހިމެނިވަޑައިގަންނަވާ ގޮތައް ދައުލަތުގެ ބައެއް މަގާމުތަކުގައި ތިއްބެވި ބޭފުޅުންގެ މުސާރަ އަންނަ އަހަރު ކުޑަކުރައްވަން ނިންމަވާފައިވާ ކަމަށް ރައީސް ޑރ. މުހައްމަދު މުއިއްޒު އިއުލާނުކުރެއްވުމާ ގުޅޭ ގޮތުން ރައީސް ޔާމީންވަނީ އެކަމަށްވެސް ހުކުރުވިލޭރޭގެ ޖަލްސާގައި ވަރަށް ބޮޑަށް ފާޑު ވިދާޅުވެފައެވެ.
ރައީސް ޔާމީން ފާހަގަ ކުރެއްވި ގޮތުގައި މި ސަރުކާރުގެ ކުރީކޮޅު ކޮންމެ ދުވަހަކު ދުވާލަކު ތިން ލައްކަ ރުފިޔާ ރައީސް އޮފީހުގެ ފަރީއްކުޅަށް ވަނީ ޚަރަދު ކޮށްފައެވެ.
"މިވަރުގެ ބަޔަކު އެންމެ ފައިސާ ފޮއްޗެއްވެސް ދޫކޮށްލާނެތޯ؟" ރައީސް ޔާމީން ސުވާލު ކުރެއްވިއެވެ.
ދިމްޔާތުގައި ރައީސް ކަމުގައި ހުންނަވައިގެން ޑރ. މުއިއްޒު ހޭދަކުރެއްވި މުއްދަތައް ސޯޅަ މިލިއަން ރުފިޔާ ހޭދަކުރެއްވި ކަމަށް ގާނޫނީ ވަކީލު އާދަމް އާސިފް ހުކުރުވިލޭރޭގެ ޖަލްސާގައި ފާހަގަ ކުރެއްވިއެވެ.
