އެޗްޑީސީ މައްސަލާގައި ފުލުހުން ލައްވާ މުއިއްޒު ކުޅުއްވަނީ ޑްރާމާ: ރައީސް ޔާމީން
ކޮރޮޕްޝަންގެ ކަންކަމުގައި ރައީސް މުއިއްޒު ފިޔަވަޅު އެޅުއްވުމުގައި ތަފާތުކުރުން ގެންގުޅުއްވާކަން ރައީސް ޔާމީން ފާހަގަކުރެއްވި
އެޗްޑީސީ މައްސަލާގައި ފުލުހުން ލައްވާ މުއިއްޒު ކުޅުއްވަނީ ޑްރާމާ: ރައީސް ޔާމީން
އެޗްޑީސީގެ ގޯތި ވައްކަމުގެ މައްސަލާގައި ފުލުހުން މެދުވެރިކޮށް ރައީސް ޑރ. މުޙައްމަދު މުއިއްޒު އެ ގެންދަވަނީ ޑްރާމާއެއް ކުޅުއްވަމުންކަމަށް ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ވިދާޅުވެއްޖެއެވެ.
ޕީއެންއެފުން އާދިއްތަ ދުވަހުގެރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވަނީ ހައުސިންގ ޑިވެލޮޕްމަންޓު ކޯޕަރޭޝަންސް (އެޗްޑީސީ)ގެ ތެރެއިން ހިންގާފައިވާ ބޮޑެތި ވައްކަންތައް، އެ ވައްކަންތައް ކުރަމުން ދަނިކޮށް އެކަން ރައްޔިތުންނަށް ފަޅާއެރުމުން އެކަން އޮއްބާލަން ސަރުކާރުން ވަރަށް މަސައްކަތްކުރަމުން ދާތީ އެކަމަށް އަލިއަޅުވާލައްވާ ވާހަކަފުޅު ދައްކަވާފައެވެ.
އެޗްޑީސީގެ ބޮޑު ވައްކަމުގެ މައްސަލައަށް އަލިއަޅުވާލައި ރޭގެ ޖަލްސާގައި ވާހަކަދައްކަވަމުން ރައީސް ޔާމީން ވިދާޅުވީ އެޗްޑީސީގެ ވައްކަމުގެ އެ މައްސަލަ ބެލުމުގައި ސަރުކާރުގައި ހެޔޮ ނިޔަތެއް ނޯންނާނެ ކަމަށާއި އެގޮތުން ފުލުހުން މެދުވެރިކޮށް ރައީސް ޑރ. މުޙައްމަދު މުއިއްޒު އެ ގެންދަވަނީ ޑްރާމާއެއް ކުޅުއްވަމުންކަމަށެވެ. އަދި އެކަން ރައްޔިތުންނަށް މިހާރު ވަރަށް ސާފުކޮށް އެނގޭ ކަމަށްވެސް ރައީސް ޔާމީން ވިދާޅުވިއެވެ.
މީގެ އިތުރުން އެޗްޑީސީ މައްސަލައިގައި ފުލުހުންގެ އިޚްލާސްތެރި ނިޔަތެއް ތަހުގީގުކުރުމުގައި ނެތް ކަން ފާހަގަކުރައްވާ ރައީސް ޔާމީން ވިދާޅުވީ އެޗްޑީސީގެ ބޮޑު ވައްކަމުގެ މައްސަލަ ތަހުޤީޤު ކުރަމުން ދާކަމަށް ވިދާޅުވާ ފުލުހުންގެ އެއްވެސް ސީރިއަސްކަމެއް ނެތްކަމަށާއި އެޗްޑީސީ މައްސަލައިގައި ހިމެނޭ މީހުންގެ މުއާސަލާތީ ވަސީލަތް ނުހިފެހެއްޓުމަކީ ވެސް އެކަން ހާމަވާ ކަމެއްކަމަށެވެ. އަދި އެއީ އެ މައްސަލައިގެ ހެކި ނައްތާލުމަށް ފުރުސަތު ދިނުން ކަމަށް ބެލެވޭނެ ޖާގައޮތް ކަމެއް ކަމަށްވެސް ޔާމީން ވިދާޅުވިއެވެ.
ޔާމީން ވިދާޅުވީ އެޗްޑިސީގެ މައްސަލާގައި ރައީސް މުއިއްޒު ފުލުހުން ލައްވައި ކުޅުވަން މަސައްކަތް ކުރާ އެ ޑްރާމާ ނުވަތަ ސަރުކާރުން ކުޅެމުންދާ ޗަރުކޭސް މިހާރު ރައްޔިތުންނަށް ވަރަށް ސާފުކޮށް އެނގޭކަމަށެވެ.
ކޮރޮޕްޝަންގެ ކަންކަމުގައި ރައީސް މުއިއްޒު ފިޔަވަޅު އެޅުއްވުމުގައި ތަފާތުކުރުން ގެންގުޅޭކަން ފާހަގަކުރައްވަމުން ރައީސް ޔާމީން ވިދާޅުވީ އެންސްޕާގެ ތެރެއިން ޓީވީ ސްޓޭޝަންއެއް އުފައްދަން ކުރި ޚަރަދު ނޭނގޭ ކަމަށް ވިދާޅުވެ އެކަމުން ބޯދަމައިގަނެގެން ރައީސް މުއިއްޒު އެ ހައްދަވަނީ އިތުރުފުޅު ކަމަށެވެ. އަދި މިއަދު ރައީސް މުއިއްޒަށް ގޮތް ހުސްވެ އެއް ދޮގު ފޫބައްދަން ހާސްދޮގު ހަދަމުންދާކަމަށްވެސް ރައީސް ޔާމީން ވިދާޅުވިއެވެ.
