އަލީ ވަޙީދު ގެނައުމަށް ކްރިމިނަލް ކޯޓުން އިނގިރޭސި ބަހުން ކޯޓު އަމުރު ނެރެ، ފުލުހުންނަށް ޙަވާލުކޮށްފި

އަލީ ވަހީދު ގެނައުމަށް އިނގިރޭސި ބަހުން ކޯޓު އަމުރެއް ހޯދަން ފުލުހުން އެދިފައިވާތީ އިނގިރޭސި ބަހުން ކޯޓު އަމުރު ނެރެ، ކްރިމިނަލް ކޯޓުން ފުލުހުންނަށް ޙަވާލުކޮށްފިއެވެ.

ފުލުހުން ބުނެފައިވަނީ އިންޓަރޕޯލުން ބޭނުންވާ މައުލޫމާތަކާއި، އިނގިރޭސި ބަހުން ކޯޓު އަމުރެއް ހޯދުމަށް އެދި ކްރިމިނަލް ކޯޓަށް ހުށައަޅާފައިވާނެ ކަމަށެވެ.

އެކަމާ ގުޅޭގޮތުން ރާއްޖެއެމްވީން ކުރި ސުވާލަކަށް ޖަވާބު ދެއްވަމުން ކްރިމިނަލް ކޯޓުގެ މީޑިއާ އޮފިޝަލު ވިދާޅުވީ، އަލީ ވަހީދު މައްސަލައިގައި ކޯޓު އަމުރެއް ހޯދުމަށް ފުލުހުން ފޮނުވި ސިޓީއާއި ގުޅިގެން އަލީ ވަޙީދު ބަންދުގައި ބަހައްޓައިގެން ކޯޓަށް ހާޒިރު ކުރުމަށް ނެރެފައިވާ ކޯޓު އަމުރުގެ އިނގިރޭސި ތަރުޖަމާ އެންޑޯރސް ކުރުމަށްފަހު، ފުލުހުންނަށް ޙަވާލުކޮށްފައިވާނެ ކަމަށެވެ. ކޯޓުން އެ އަމުރު ފުލުހުންނަށް ޙަވާލު ކޮށްފައިވަނީ ބުދަ ދުވަހުކަމަށް ކޯޓުގެ މީޑިއާ އޮފިޝަލު ވިދާޅުވިއެވެ.

ޓޫރިޒަމް މިނިސްޓްރީގެ މުވައްޒަފުންތަކަކަށް ޖިންސީ ގޯނާކުރި ކަމަށް ބުނާ މައްސަލައިގައި ކްރިމިނަލް ކޯޓުގައި އޭނާގެ މައްޗަށް އުފުލާފައިވާ ދައުވާތަކުގެ އަޑުއެހުން ވަނީ ފެށިފައެވެ. ޢަލީ ވަޙީދު ބޭސްފަރުވާއަށް ރާއްޖެއިން ބޭރަށް ވަޑައިގަތުމަށްޓަކައި، އެދިވަޑައިގަތުމުން ކޯޓު އަމުރެއްގެ ދަށުން ޕާސްޕޯޓު ދޫކުރީ ހަތަރު މަހަށެވެ. އަދި އެކަން ކުރީ އަސްޢަދު ޢަލީ (އަޑުބަރޭ) ޖާމިނުވާގޮތަށެވެ. އެހެންނަމަވެސް ހަތަރު މަސް ފާއިތުވެ، ޝަރީޢަތް ފެށުނު އިރު ވެސް ޢަލީ ވަޙީދު އެނބުރި ރާއްޖެއަށް ވަޑައެއްނުގަންނަވައެވެ. އަދި އެކަމުގެ ޒިންމާ އަޑުބަރޭ ވެސް ނަގާފައެއް ނުވެއެވެ.

މި މައްސަލައިގައި އަލީ ވަހީދު ހާޒިރުވެވަޑައިގަތުމަށް އުޒުރުވެރިވާތީ އަލީ ވަޙީދުގެ ފަރާތުން ކޯޓުގައި ޖާމިނުވި އަޑުބަރޭ ވަނީ އެކަން އަންގައި ކްރިމިނަލް ކޯޓަށްވެސް ސިޓީއެއް ފޮނުވާފައެވެ. އެ ސިޓީގައި އޭނާ ވަނީ އޭނާ މި މައްސަލައިގައި ޖާމިނުވީ 4 މަަހަށް ކަމަށް ބުނެ، އެ މުއްދަތުގެ ތެރޭގައި އަލީ ވަހީދު ކޯޓަށް ހާޒިރުވެވަޑައިގަތުމަށް ކޯޓުން އެއްވެސް އެންގުމެއް އަންގާފައިނުވާކަމަށް ބުނެފައެވެ.

މީގެއިތުރުން، ކޯޓުގެ ޙުރުމަތް ކެނޑި މައްސަލައިގައި އަލީ ވަހީދުގެ މައްޗަށް ސުޕްރީމް ކޯޓުން ޙުކުމެއްވެސް ކޮށްފައިވެއެވެ. އޭރު ފުލުހުން ބުނެފައިވަނީ އަލީ ވަހީދުގެ މައްޗަށް ސުޕްރީމް ކޯޓުން ކޮށްފައިވާ ހުކުމް ތަންފީޒު ކުރުމަށް ރާއްޖެ ގެނައުމަށްޓަކައި އިންޓަރޕޯލް މެދުވެރިކޮށް ކުރަން ޖެހޭ ކަންކަން ކުރަމުންދާ ކަމަށެވެ. އަދި ފުލުހުންގެ ފަރާތުން ޕޮލިސް ޓު ޕޮލިސް ކޯޕަރޭޝަން މެދުވެރިކޮށް ވެސް އިތުރަށް މި މަސައްކަތް ކުރަމުންދާ ކަމަށް ފުލުހުން އޭރު ބުނެފައިވެއެވެ.