ގދ. ތިނަދޫގައި ކޮވިޑް-19ގެ ހާލަތު ގޯސްވަމުންދާތީ ސިއްހީ ރައްކާތެރިކަމުގެ ފިޔަވަޅުތައް ވަރުގަދަ ކޮށްފިއެވެ.

ތިނަދޫ ކައުންސިލުން ބުނީ ކޮވިޑް-19ގެ ހާލަތާއި ގުޅިގެން ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އެރަށް މޮނިޓަރިންގ ހާލަތަށް ގެނެސްފައިވާތީ، 24 ޖަނަވަރީން ފެށިގެން 07 ދުވަހުގެ މުއްދަތަށް ސިއްހީ ރައްކާތެރިކަމުގެ ފިޔަވަޅުތައް ވަރުގަދަކޮށްފައިވާ ކަމަށެވެ.

ކައުންސިލުން ބުނީ ތިނަދޫން ކޮވިޑް-19ގެ އައު ވޭރިއަންޓަށް ބަޔަކު ޕޮޒިޓިވްވެ، ބަލިޖެހޭ މީހުންގެ އަދަދު ދުވަހެއް ދުވަހަކަށް އިތުރުވަމުންދާތީ އެއްގެއިން އަނެއްގެއަށް ޒިޔާރަތް ކުރުން މަނާކުރުމާއި، ރޭގަނޑު 09:00ން ފެށިގެން ފަތިހު 04:00ށް އެއްގަމު އުޅަނދުފަހަރު ދުއްވުމާއި، މަގުމައްޗާއި އާއްމު ތަންތަނަށް މީހުން ނުކުތުން މަނާކޮށްފައިވާ ކަމަށެވެ. ނަމަވެސް ރަށުގައި ބަލިފެތުރުމުގެ ހާލަތަށް ބަލައި މި ފިޔަވަޅުތަކަށް ބަދަލު ގެނެވޭނެކަމަށް ކައުންސިލުން ބުނެއެވެ.

ޒަރޫރީ ބޭނުންތަކުގައި މެނުވީ ގެއިން ބޭރަށް ނުނިކުތުމަށް އިލްތިމާސްކޮށްފައިވާއިރު، ޕާޓީތަކާއި، ހަފްލާތަކާއި، ރަސްމިއްޔާތުތައް ބޭއްވުން ވަނީ ހުއްޓުވާފައެވެ. އެއްފަހަރާ 3 މީހުންނަށްވުރެ ގިނަ މީހުން މަގުމައްޗާއި އާންމު ތަންތާގައި އެއްވެ އުޅުން މަނާކޮށްފައިވާއިރު، ސެލޫންތަކާއި، ޖިމްތަކާއި، ބޯކޮށާ ތަންތަން ވަނީ ބަންދުކޮށްފައެވެ. އަދި ހުރިހާ ކުޅިވަރު ހަރަކާތްތަކާއި، ގިނަ ބަޔަކު ބައިވެރިވެގެން ކުރިއަށްގެންދާ ކަސްރަތުގެ ހަރަކާތްތައް ހިންގުން ވަނީ ހުއްޓުވާފައެވެ.

ކައުންސިލުން ބުނީ ފިހާރަތަކުން ޚިދުމަތް ދޭއިރު، ހެލްތު ޕްރޮޓެކްޝަން އެޖެންސީން ޢާއްމުކޮށްފައިވާ ގައިޑްލައިނާ އެއްގޮތަށް ޚިދުމަތް ދިނުމާއި، ޔުނިވަރސިޓީތަކާއި ކޮލެޖުތަކަށް ދަރިވަރުން ހާޒިރުވެގެން ކިލާސްތައް ކުރިޔަށް ގެންދިއުން ހުއްޓައިލުމާއި، ޝިފްޓް ޑިއުޓީ އަދާކުރާ އޮފީސް (ކުންފުނި ތަކުގައިވެސް ވީހާވެސް މަދު މުވައްޒަފުން ބޭނުން ކުރުމާއި، ޒަރޫރީ ބޭނުންތަކަށް އެއްރަށުން އަނެއްރަށަށް ދަތުރުކުރު ދަތުރުކުރުމުގައި އެޗްޕީއޭގެ ގައިޑްލައިނާ އެއްގޮތަށް އަމަލު އަމަލުކުރަން ޖެހޭ ކަމަށެވެ.

ކައުންސިލުން ބުނީ މަސްވެރިކަންކުރާ އުޅަނދުތަކަށް ކައުންސިލުން ދޫކުރާ ޚާއްސަ ހުއްދައިގެ ދަށުން މަހަށް ފުރުމާއި، އުޅަނދުތަކުގައި ކޮވިޑްގެ އެއްވެސް އަލާމާތެއް ހުރި މީހެއް ނަމަ ލަސްނުކޮށް ކައުންސިލް ނުވަތަ ހޮސްޕިޓަލަށް އަންގަން ޖެހޭނެކަމަށެވެ. އަދި ތިނަދޫއަށް މުދާ ހިފައިގެން އަންނަ އުޅަދު ފަހަރާއި އަދި އެހެން ރަށްރަށަށް ޒަރޫރީ ބޭނުންތަކަށް ކާބޯތަކެތި ފެން/ގޭސް އުފުލާ އުޅަނދުތައް ކުރިއާލައި ތިނަދޫ ހެލްޕް ޑެސްކްގެ ހުއްދަ ހޯދަން ޖެހޭކަމަށެވެ. ތިނަދޫއަށް މުދާ ހިފައިގެން އަންނަ އެއްވެސް އުޅަނދަކުން ބާލާ މުދާތައް އޭގެ ވެރިވަރާތުން ގެންދިއުމުގައި އެޗްޕީއޭގެ މިންގަޑާ އެއްގޮތަށް އަމަލުކުރުމަށް ވަނީ އިލްތިމާސްކޮށްފައިވާއިރު، ޑެލިވަރީގެ ޙިދުމަތްދޭ މީހުން އެއްވެސް ގޯއްޗެއްގެ ތެރެއަށް ނުވަނުމަށް ވަނީ އެދިފައެވެ.

މީގެ އިތުރުން ކައުންސިލުން ބުނީ ދޮންވެލި ނަގާ ފަރާތްތަކަށް ދޫކުރާ ޚާއްސަ ހުއްދައިގެ ދަށުން އެކަމުގައި ހަރަކާތްތެރިވާން ޖެހޭ ކަމަށާއި، ޓެކްސީ ކުރުމަށް އެޗްޕީއޭއިން އެކުލަވާލައިފައިވާ އުސޫލާ އެއްގޮތަށް ޓެކްސީ ދުއްވާ މީހުން އަމަލުކުރަން ޖެހޭ ކަމަށެވެ. އަދި ތިނަދޫއާ ކާޑެއްދޫއާ ދެމެދު ޕަސެންޖަރުން އުފުލާ ސްޕީޑް ބޯޓް ލާންޗްތައް އެޗްޕީއޭގެ ގައިޑްލައިނާ އެއްގޮތަށް ހަރަކާތްތެރިވުމާއި، ތިނަދޫއިން ފުރާ/އަންނަ ފަަސިންޖަރުން ފިޔަވައި އެހެން ފަރާތްތައް މި އުޅަނދުތަކުގައި ނުއުފުލުމާއި އަދި ފަޅުވެރިންނާއި ސްޕީޑް ބޯޓް/ ލާންޗް ދުއްވާފަރާތް ކާނޑެއްދޫއަށް ނޭރުމަށް ވަނީ އަންގާފައެވެ.

ކައުންސިލުން ބުނީ ތިނަދޫ އިން އަތޮޅުގެ ރަށްރަށް ދަތުރުކުރާ މީހުން ދުރާލައި އެކަމަށް ހުއްދައަށް އެދުމުން އެ ހުއްދަ ދިނުމުގައި ކައުންސިލުން އިތުރު ފިޔަވަޅުތަކާއެކު ހުއްދަ ދޭނެ ކަމަށެވެ.