ހަނގުރާމަވެރި ސަރަޙައްދެއްގައި އުފަންވި ކުދިންތަކެއްގެ މަންމައަކީ ދިވެއްސެއްކަމަށް ފެމިލީ ކޯޓުން ފުރަތަމަ ފަހަރަށް ކަނޑައަޅައިފި
ޓެރަރިޒަމް މަނާކުރުމާބެހޭ ޤާނޫނަށް 2021 ވަނަ އަހަރު ގެނެސްފައިވާ އިސްލާޙުގައި ވަނީ އެކަމާގުޅޭ އުޞޫލުތައް ބަޔާންކޮށްފައި
ފެމިލީ ކޯޓް- އެ މައްސަލަ ކޯޓަށް ހުށައަޅާފައިވަނީ މަންމަގެ ފަރާތުން
ހަނގުރާމަވެރި ސަރަޙައްދެއްގައި އުފަންވި ކުދިންތަކެއްގެ މަންމައަކީ ދިވެއްސެއްކަމަށް ފެމިލީ ކޯޓުން ފުރަތަމަ ފަހަރަށް ކަނޑައަޅައިފިއެވެ.
އެކަމާ ގުޅޭގޮތުން ރާއްޖެއެމްވީއަށް މައުލޫމާތު ދެމުން ފެމިލީ ކޯޓުން ބުނީ، އެއީ އަންހެނަކު ވިހޭ ދެ ދަރިންގެ މަންމައަކީ އޭނާކަން ޘާބިތުކުރުމަށް ކޯޓަށް ހުށައެޅުނު މައްސަލައެއް ކަމަށެވެ. އެގޮތުން އެ މައްސަލަ ކޯޓަށް ހުށައަޅާފައިވަނީ މަންމަގެ ފަރާތުންނެވެ.
ޓެރަރިޒަމް މަނާކުރުމާބެހޭ ޤާނޫނަށް 2021 ވަނަ އަހަރު ގެނެސްފައިވާ އިސްލާޙުގައި ވަނީ އެކަމާގުޅޭ އުޞޫލުތައް ބަޔާންކޮށްފައެވެ. އެގޮތުން ހަނގުރާމަވެރި ސަރަޙައްދެއްގައި ދިވެހި ރައްޔިތުންނަށް އުފަންވެފައިވާ ކުދިން، ކަމާބެހޭ ޤާނޫނުގައިވާ ގޮތުގެމަތިން ދިވެހިރާއްޖޭގައި ރަޖިސްޓަރީ ކޮށްފައިނުވާނަމަ، އެކުދިން ދިވެހިރާއްޖެއަށް އަނބުރާ އައުމުގެ ކުރިން، އެކުދިންގެ އުފަންވުން ދިވެހިރާއްޖޭގައި ރަޖިސްޓަރީ ކުރަންވާނެކަމަށް ވަނީ ބަޔާންކޮށްފައެވެ.
އޭގެ އިތުރުން، ހަނގުރާމަވެރި ސަރަޙައްދެއްގައި އުފަންވެފައިވާ ކުއްޖެއްގެ އުފަންވުން ރަޖިސްޓަރީކުރުމަށް ކަމާބެހޭ ޤާނޫނުގައި ބަޔާންކުރާ ލިޔެކިޔުން ހުށަހަޅާފައި ނުވާނަމަ، އެ ކުއްޖެއްގެ އުފަންވުން ރަޖިސްޓަރީ ކޮށްދެވޭނީ، އެ ކުއްޖަކީ، އެ ކުއްޖެއްގެ މައިންބަފައިން ނުވަތަ އޭގެ ތެރެއިން އެއް ފަރާތް ކަމަށް ބުނާ ދިވެހި ރައްޔިތަކަށް އުފަން ދަރިއަކު ކަމާމެދު ގޮތެއް ކަނޑައެޅުމަށްޓަކައި، އެ މާއްދާގައިވާ ގޮތުގެމަތިން ކޯޓަށް މައްސަލަ ހުށަހަޅައި، އެ ކުއްޖެއްގެ އުފަންވުމާމެދު ކޯޓުން ގޮތެއް ކަނޑައެޅުމުންކަމަށްވެސް ވަނީ ބަޔާންކޮށްފައެވެ.
އެގޮތުން ހުށައެޅޭ ހެކިތަކުގެ ތެރޭގައި ކުއްޖާގެ ޑީ.އެން.އޭ ޕްރޮފައިލާއި ކުއްޖާގެ މަންމަ އަދި ބައްޕަ ކަމަށް ބުނާ ފަރާތުގެ ޑީ.އެން.އޭއާ އަޅައިކިޔައި ހަދާފައިވާ މެޓަރނިޓީ ޑީ.އެން.އޭ އެނަލިސިސް ހިމެނެއެވެ.
ކޯޓުން މައުލޫމާތު ދޭ ގޮތުގައި މި މައްސަލައިގައިވެސް ޝަރީއަތުން ވަނީ ފުލުހުން ހަދާފައިވާ މެޓަރނިޓީ ޑީއެންއޭ ތަހުލީލު ރިޕޯޓަށް ރިޢާޔަތްކޮށްފައެވެ. މި މައްސަލައިގައި ޤާނޫނުގައި ބަޔާންކޮށްފައިވާ މިންވަރަށް ހެއްކާއި ޤަރީނާތަކުން ސާބިތުވާކަމަށް ކޯޓުން މައުލޫމާތު ދެއެވެ. އަދި މިއީ ހަނގުރާމަވެރި ސަރަޙައްދެއްގައި އުފަންވި ކުދިންތަކެއްގެ މަންމައަކީ ދިވެއްސެއްކަމަށް ފެމިލީ ކޯޓުން ފުރަތަމަ ފަހަރަށް ކަނޑައެޅި މައްސަލަކަންވެސް ކޯޓުން ފާހަގަ ކުރެއެވެ.
ހަނގުރާމަވެރި ސަރަޙައްދެއްގައި ދިވެހި ރައްޔިތަކަށް އުފަންވެފައިވާ ކުދިންގެ އުފަންވުން ރަޖިސްޓްރީކޮށްދެވޭނީ އެކުއްޖާއަކީ ދިވެހި ރައްޔިތަކަށް އުފަން ދަރިޔަކުކަމާމެދު ކޯޓުން ގޮތެއް ކަނޑައެޅުމުންކަމަށް ބަޔާންކޮށް، ހަނގުރާމަވެރި ސަރަޙައްދެއްގައި ދިވެހި ރައްޔިތަކަށް އުފަންވެފައިވާ ކުދިންގެ އުފަންވުން ރަޖިސްޓަރ ކުރުމާބެހޭ އުސޫލެއްވެސް މިހާރު ވަނީ ގެޒެޓުކޮށްފައެވެ. މިޤާނޫނުގެ ދަށުން އެކުލަވާލާފައިވާ ޤަވާއިދުގައި ބުނެފައިވަނީ ކުއްޖާއަކީ ދިވެހި ރައްޔިތަކަށް އުފަން ދަރިޔަކާމެދު ކޯޓުން ގޮތެއް ނިންމާތާ 4 ދުވަހުގެ ތެރޭގައި އެ ކުއްޖާގެ ބެލެނިވެރިޔާ، ނުވަތަ ބެލެނިވެރިޔާގެ ޕަވަރ އޮފް އެޓަރނީއެއް މެދުވެރިކޮށް، ކަނޑައަޅާ ފަރާތަކުން އެ ކުއްޖެއްގެ އުފަންވުން ރަޖިސްޓަރ ކުރުމަށާއި އުފަން ދުވަހުގެ ސެޓުފިކެޓު ހެދުމަށް، ފޯމު މެދުވެރިކޮށް އެ ކުއްޖެއްގެ މަންމަ ނުވަތަ ބައްޕަ ރަށްވެހިވެފައިވާ ރަށެއްގެ ނުވަތަ ސިޓީއެއްގެ ކައުންސިލަށް ހުށަހަޅަންވާނެ ކަމަށެވެ.
