ކޮވިޑްގެ ހާލަތު ގޯސްވެ، ދިއްދޫގައި ކާފިއު ހިންގަނީ
24 ޖެނުއަރީ 2022 | ހޯމަ 11:11ދިއްދޫގައި ފިޔަވަޅުތަކެއް އެޅުމަށް ވަނީ ނިންމާފައި
ހއ. ދިއްދޫ
ހއ. ދިއްދޫގައި ކޮވިޑްގެ ހާލަތު ގޯސްވެ، ކާފިއު ހިންގުމަށް ދިއްދޫ ކައުންސިލުން ނިންމައިފިއެވެ.
ދިއްދޫ ކައުންސިލުން މައުލޫމާތު ދޭ ގޮތުގައި އެރަށުގައި ކާފިއު ހިންގުމަށް ނިންމާފައިވަނީ ރޭގަނޑު 9:00ން ފަތިހު 4:00ށެވެ. އެގޮތުން އެވަގުތުތަކުގައި ގެއިން ބޭރަށް ނުދިއުމަށާއި އަދި ހުއްދަ ދީފައިވާ އެއްގަމު އުޅަނދުތައް ފިޔަވައި އެހެން އުޅަނދުތައް ދުއްވުން ހުއްޓާލުމަށް ދިއްދޫ ކައުންސިލުން ވަނީ އަންގާފައެވެ.
މީގެ އިތުރުން ދިއްދޫ ކައުންސިލުން ވަނީ އެރަށު ރައްޔިތުންގެ ސަލާމަތާއި ރައްކާތެރިކަމަށް ފިޔަވަޅުތަކެއް އެޅުމަށް ނިންމާފައެވެ. އޭގެތެރޭގައި ހޮޓާ އަދި ރެސްޓޯރެންޓްތަކުން ރޭގަނޑު 9:00އާ ހަމައަށް ޚިދުމަތް ދިނުމާއި، ރޭގަނޑު 9:00ން 12:00ށް ޓޭކްއަވޭއާއި ޑެލިވަރީގެ ޚިދުމަތް ދިނުމަށް ދިއްދޫ ކައުންސިލުން ވަނީ އަންގާފައެވެ. އަދި ފިހާރަތަކުން ކަނޑައަޅާ އަދަދަށް ކަސްޓަމަރުން ވައްދައިގެން ޚިދުމަތް ދިނުމަށާއި، ފިހާރަތަކާއި ވިޔަފާރިކުރާ ތަންތަންވެސް ރޭގަނޑު 9:00ގެ ފަހުން ބަންދުކޮށްފައި ބެހެއްޓުމަށާއި، ރޭގަނޑު 9:00ން 10:00ށް ޑެލިވަރީގެ ޚިދުމަތް ދިނުމަށް ވަނީ އަންގާފައިއެވެ. ސެލޫންތަކާއި، ބޯކޮށާ ތަންތަނުން ރޭގަނޑު 9ގެ ފަހުން ޚިދުމަތް ދިނުން ހުއްޓާލުމަށާއި، ހޮޓާ ރެސްޓޯރެންޓްތަކުން އެޗްޕީއޭގެ މިންގަނޑުތަކާއި އެއްގޮތަށް މީހުން ތިބެވޭނެ އިންތިޒާމު ހަމަޖެއްސުމަށް ވެސް ވަނީ އަންގާފައެވެ.
ދިއްދޫ ކައުންސިލުން ވަނީ، ޓިއުޝަން ކުލާސްތަކާއި ކިޔަވައިދޭ އެހެނިހެން ތަންތަނަށް ކުދިން ހާޒިރުކޮށްގެން ކިޔަވައި ދިނުން ހުއްޓާލުމަށާއި، ސްކޫލާއި މަދަރުސާފަދަ ތަންތަނުގައި ގުރޭޑް 7ން ދަށުގެ ކުދިން ހާޒިރުކޮށްގެން ކިޔަވައި ދިނުން ހުއްޓާލުމަށް އަންގާފައެވެ. އަދި ދިއްދޫއިން ކޮންމެހެން ފުރަންޖެހޭ އުޅަނދުފަހަރު ދިއްދޫ ކައުންސިލްގެ ހުއްދަ ހޯދުމަށްފަހު ފުރުމަށާއި، ޕާޓީތަކާއި ހަފްލާތަކާއި ބައްދަލުވުންތައް އަދި ކުޅިވަރުގެ ހަރަކާތްތައް ކުރިއަށް ނުގެންދިއުމަށް އަންގާފައިވެއެވެ. މީގެ އިތުރުން ޕާކުތަކާއި ހޮޅުއަށިތަކާއި ޖޯލިފަތިތަކުގައި މީހުން އެއްވެ ތިބުން ވަނީ މަނާކޮށްފައިއެވެ
ދިއްދޫގައި ހަލުވިކަމާއެކު ކޮވިޑް ފެތުރެމުންދާތީވެ ސިއްހީގޮތުން ބަލަންޖެހޭ ކަންކަން ބެލުމަށް، ހެލްތު ޕްރޮޓެކްޝަން އެޖެންސީގެ ފަރާތުން 20 ޖަނަވަރީ 2022ގައި ދިއްދޫ ވަނީ މޮނިޓަރިންގއަށް ލާފައިއެވެ.
ދިއްދޫގައި މިހާތަނަށް 472 މީހަކު ވަނީ މި ބައްޔަށް ޕޮޒިޓިވްވެފައެވެ. އެގޭތެރޭގައި މިވަގުތު ބަލި ޖެހިފައި 109 މީހަކު ވާއިރުގައި 362 މީހަކު ވަނީ މިބަލިން ރަނގަޅުވެފައެވެ. އަދި މިބަލީގައި އެކަކު ވަނީ ނިޔާވެފައެވެ.
