ސީރިއާގައި ހިނގަމުންދާ ދާޚިލީ ހަނގުރާމައިގައި ބައިވެރިވުމަށް ތުރުކީ މަގުން ސީރިއާއަށް ދިޔަ މައްސަލައިގައި މއ. މާރަނގަ ޙަސަން ފައިޒަންގެ މައްޗަށް އުފުލާފައިވާ ދައުވާގެ ޝަރީއަތުގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

އެންމެ ފަހުން ބޭއްވި އަޑުއެހުމުގައި ވަނީ ދިފާއީ ހެކި ހުށައެޅުމާއި، ޝަރީއަތުގެ ކުރިން ހުށައަޅާ ހުށައެޅުމަށް ފުރުސަތު ދެއްވާފައެވެ.

މި މައްސަލައިގައި ދައުލަތުން ވަނީ ހެކި ރައްކާތެރި ކުރުމުގެ އަމުރެއް ނެރެދެއްވުމަށް އެދި ހުށައަޅުއްވާފައެވެ. އެގޮތުން 17 ޖެނުއަރީ 2018 ގައި މި މައްސަލައިގެ ދައުވާ ހުށައެޅިއިރުވެސް ހެކި ރައްކާތެރި ކުރުމުގެ އަމުރަކަށް އެދިފައިވާނެކަން ދައުލަތުން ފާހަގަ ކުރިއެވެ. އެންމެ ފަހުން ބޭއްވި އަޑުއެހުމުގައި ޝަރީއަތުގެ ކުރިން ހުށައަޅާ ހުށައެޅުމެއްގެ ގޮތުންވެސް ދައުލަތުން ވަނީ ހެކި ރައްކާތެރި ކުރުމުގެ އަމުރަކަށް އެދިފައެވެ. އެގޮތުން އިންޓެލް ރިޕޯޓުގެ ވަކި މިންވަރެއް ސިއްރު ކޮށްދީ، ދިފާއު އެއްގެ ގޮތުން ހިއްސާ ކުރެވޭ މިންވަރަށް ހިއްސާ ކޮށްދެއްވުމަށް އެދި ދައުލަތުން ވަނީ ހުށައަޅުއްވާފައެވެ. އަދި މި ލިޔުން ސީދާ ދައުވާ ލިބޭ ފަރާތަށް ދޫކުރުމުގެ ބަދަލުގައި، ޝަރީއަތުން ކަނޑައަޅާ އުސޫލެއްގެ މަތިން އެ ރިޕޯޓު ދިރާސާ ކުރުމަށް ދިފާއަށް ފުރުސަތު ދެއްވުމަށްވެސް ދައުލަތުން އެދެއެވެ.

ދައުލަތުން ވަނީ މި ރިޕޯޓުގައި ޤައުމީ ސަލާމަތާއި ގުޅުންހުރި މައުލޫމާތުތައްވެސް ހިމެނޭކަން ބަޔާން ކުރައްވާފައެވެ.

އެކަމާ ގުޅޭގޮތުން ދިފާއީ ވަކީލު ވިދާޅުވީ، ޓެރަރިޒަމް ޤާނޫނުގެ ދަށުން އިންޓެލް ރިޕޯޓަކީ ހެއްކެއްގެ ދަރަޖަ ލިބިގެންވާ އެއްޗެއްކަން ދައުލަތުން ބުނާއިރު، އެގޮތަށް ކަނޑައެޅިގެން ދިޔައީ ކޮން ތާރީޚެއްގައިތޯ ސުވާލުކުރައްވާފައެވެ. ދައުލަތުން އެކަމާއި ގުޅިގެން ބުނީ، އޭރު ދައުވާ ހުށައަޅާފައިވަނީ އޭރުގައި އޮތް ޓެރަރިޒަމް މަނާ ކުރުމުގެ ޤާނޫނުގެ ދަށުން ކަމަށާއި، އޭރުގެ ޤާނޫނަށް ބަލާއިރު އެފަދަ ލިޔެކިޔުންތަކަކީ ހެއްކެއްގެ ގޮތުގައި ބެލިގެންދާނެކަމަށް މާނަ ކުރެވޭކަމަށެވެ. ސަބަބަކީ އެއީ ތަހުގީގީ އިދާރާއަކުން ދޫކޮށްފައިވާ ރަސްމީ ލިޔުމަކަށްވާތީ ކަމަށް ދައުލަތުން ބުނެއެވެ.

އަދި ފަހުން ގެނައި އިސްލާޙުގައި އިންޓެލް ރިޕޯޓު ހެއްކެއްގެ ގޮތުގައި ބެލެވިދާނެ ކަމަށް ސީދާކޮށް ބަޔާންކޮށްފައިވާއިރު، ދެ ޤާނޫނުގެ ދަށުން ބެލި ނަމަވެސް އިންޓެލް ރިޕޯޓަކީ ހެއްކެއްގެ ގޮތުގައި ބެލެވޭނެ ކަމަށް ދައުލަތުގެ ވަކީލާ ވިދާޅުވިއެވެ.

ދިފާއުން ވަނީ ރިޕޯޓުގެ އެއްވެސް ބައެއް އުނިކުރުމަށް ދެކޮޅު ހައްދަވާފައެވެ. އަދި އިންޓެލިޖެންސް ރިޕޯޓަކީ ރަސްމީ ލިއުމެއް ނޫންކަމަށް ދިފާއީ ވަކީލު ވިދާޅުވިއެވެ. ނަމަވެސް ދައުލަތުން ވަނީ އެއް އިދާރާއިން އަނެއް އިދާރާއަށް ހުށައަޅާ ކޮންމެ ލިޔުމަކީ ރަސްމީ ލިޔުމެއް ކަމަށާއި، އެއީ އާންމު މީހަކު އަމިއްލައަށް ތައްޔާރުކުރާ ލިޔުމެއް ނޫން ކަމަށް ވިދާޅުވެފައެވެ.

އެކަމާއި ގުޅިގެން ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ވިދާޅުވީ، ދެން މި މައްސަލައިގެ އަޑުއެހުމެއް އޮންނާނީ އަންނަ ފެބްރުއަރީ މަހުގެ 2 ވަނަ ދުވަހު ކަމަށެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒް ރަޝާދެވެ.

މައްސަލައިގެ ޚުލާސާއެއް:

ޙަސަން ފައިޒަން ނޮވެމްބަރު 2017 ގައި ރާއްޖެއިން ފުރައިގެން ތުރުކީއަށް ގޮސް، ތުރުކީގައި ޙަރަކާތްތެރިވަމުން ދަނިކޮށް އެ ޤައުމުގެ ސަލާމަތީ ބާރުތަކުން ވަނީ ތުރުކީއާއި ސީރިއާ ގުޅޭ ބޯޑަރުން އޭނާ ހައްޔަރުކޮށް އަނބުރާ ރާއްޖެއަށް ފޮނުވާލާފައެވެ. ދައުލަތުން ވަނީ އޭނާއަކީ ސީރިއާގައި ހިނގަމުންދާ ދާޚިލީ ހަނގުރާމައިގައި ބައިވެރިވުމަށް ދިޔަ މީހެއްކަމަށް ތުހުމަތުކޮށްފައެވެ. އޭރު ފައިޒަން ވަނީ އޭނާގެ މައްޗަށް ކުރާ ދައުވާއަށް އިންކާރު ވެސް ކޮށްފައެވެ. ކޯޓުގައި ފައިޒަން ބުނެފައިވަނީ ތުރުކީއަށް ދިޔައީ ޓޫރިސްޓެއްގެ ގޮތުގައި ކަމަށާއި ސީރިޔާއަށް ދާން ގަސްދެއް ނުކުރާ ކަމަށް ބުނެފައެވެ. އަދި ތުރުކީ ސިފައިން އޭނާ އަތުލައިގެންފައިވަނީ އޮޅިގެން ސީރިޔާއަށް އެތެރެވާން އުޅެނިކޮށް ކަމަށް އޭނާ ބުނެފައިވެއެވެ.

އޭނާގެ މައްޗަށް އުފުލާފައިވަނީ ރާއްޖެއިން ބޭރުގައި ހިނގާ ހަނގުރާމައެއްގައި ބައިވެރިވުމަށް ދިވެހިރާއްޖެ ދޫކޮށް ދިޔުމުގެ ކުށުގެ ދައުވާއެވެ. މި މައްސަލައިގައި ދައުވާ އުފުލައި އެންމެ ފުރަތަމަ ކްރިމިނަލް ކޯޓަށް ހުށައަޅާފައިވަނީ 17 ޖެނުއަރީ 2018 ގައެވެ. އެހެންނަމަވެސް ކޯޓުން އޭރު ވަނީ ފައިޒަންގެ މައްޗަށް އުފުލާފައިވާ ދައުވާތައް ބާތިލުކޮށްފައެވެ.

އެހެންނަމަވެސް، ދައުލަތުން ވަނީ ކްރިމިނަލް ކޯޓުގެ މި ނިންމުން ހައިކޯޓުގައި އިސްތިއުނާފުކޮށްފައެވެ. އަދި ހައިކޯޓުން 14 ފެބްރުއަރީ 2021 ގައި ވަނީ ކްރިމިނަލް ކޯޓުގެ އެ ނިންމުން ބާތިލުކޮށް، މި ދައުވާ އަލުން ކުރިއަށް ގެންދިޔމަށް ޙުކުމް ކޮށްފައެވެ. އެއާއެކު ކްރިމިނަލް ކޯޓުގައި އަނެއްކާވެސް މި މައްސަލަ މިވަނީ ކުރިއަށް ގެންދަން ފަށާފައެވެ.