ރައީސް ޔާމީން ރައްޔިތުންނަށް އަނިޔާވެރިވި ގޮތްތައް ކިޔައި ކޮޅުން ނުލާނެ: ވަހީދު
ރައީސް ޔާމީންގެ ސަރުކާރުގައި ފާޑުކިޔުމުގެ މިނިވަންކަމެއް ނެތް
ޮރާޝިދުގެ ކެމްޕޭން ޖަލްސާ
ރައީސް ޔާމީންގެ ވެރިކަމުގެ ފަސް އަހަރުގައި ތަރައްގީއަށް ކުރި ކަންކަމުގެ ބަދަލުގައި، ރައްޔިތުންނަށް އަނިޔާވެރިވި ގޮތްތައް ކިޔާ ކޮޅުން ނުލާނެ ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު ވިދާޅުވެއްޖެއެވެ.
ކޮމަންޑޫ ދާއިރާގެ ބައި އިލެކްޝަންގެ ކެމްޕެއިން ޖަލްސާގައި ފޯކައިދޫގައި ވާހަކަފުޅު ދައްކަވަމުން މެމްބަރު ވަހީދު ވިދާޅުވީ ރައީސް ޔާމީނަކީ ކޮން ބޭފުޅެއްކަން އަދި ކިހިނެއް ކަން ކުރެއްވި ބޭފުޅެއްކަން އަޅުގަނޑުމެން ބައެއް ފަހަރު ހަނދާން ނެތޭ ކަމަށެވެ. ރައީސް ޔާމީންގެ ސަރުކާރުގައި ފާޑުކިޔުމުގެ މިނިވަންކަން ދެއްވާފައި ނުވާ ކަމަށާއި، ފާޑުކީ ކަމަށްޓަކައި އެކަނިވެސް 1300 މީހުން ހައްޔަރުކުރި ކަމަށް ވަހީދު ވިދާޅުވިއެވެ. ހަމައެކަނި އަނގައިން ބުނެލި ބަހަކަށްޓަކައި ޚުދު އޭނާވެސް އެތައް ފަހަރެއްގެ މަތިން ހައްޔަރުކުރެއްވިކަމަށް ވަހީދު ވިދާޅުވިއެވެ.
އަދި މިއަދު ރައްޔިތުންނަށް ހެޔޮއެދިވަޑައިގަންނަވާ ބޭފުޅަކަށް ހެދިވަޑައިގެން މޭމަތީގައި "އިންޑިއާ އައުޓް" ޖައްސަވައިގެން ހިންގަވާއިރު، އެމަނިކުފާނު ލަދުވެތިވެ ނުލައްވާކަމަށް މެމްބަރު ވަހީދު ވިދާޅުވިއެވެ. ވަހީދު ވިދާޅުވީ ހަމައެކަނި ކޮމަންޑޫއަށް ބަލާލި ކަމުގައިވީ ނަމަވެސް ގިނަ ޚިދުމަތްތައް ފެށިފައި ހުރީ އިންޑިއާގެ އެހީތެރިކަމާއެކުގައި ކަމަށެވެ. މިގޮތުން ކޮމަންޑޫ ހެލްތް ސެންޓަރަށް ގެނައި ފުރަތަމަ ޑޮކްޓަރު އަދި ނަރުހަކީވެސް އިންޑިއާ ރައްޔިތުން ކަމަށް ވަހީދު ވިދާޅުވިއެވެ. އަދި ސްކޫލްގައި ކިޔަވައިދެނީވެސް ގިނައިން އިންޑިއާ ޓީޗަރުން ކަމަށް ވަހީދު ވިދާޅުވިއެވެ. މީގެ އިތުރުން ރާއްޖޭގައި މިހާތަނަށް ގާއިމްކޮށްފައިވާ ޚިދުމަތްތަކަށް ބެލިކަމުގައި ވިޔަސް އިންޑިއާގެ ދައުރު ބޮޑުކަން އޭނާ ފާހަގަކުރެއްވިއެވެ.
ވަހީދު މިފަދައިން ވިދާޅުވެފައިވާއިރު، ދާދި ފަހުން ރައީސް ޔާމީންވެސް ވަނީ ރައްޔިތުންގެ މަޖިލީހުގެ ކޮމަންޑޫ ދާއިރާއަށް ޕީޕީއެމްގެ ފަރާތުން ވާދަކުރައްވާ ކެންޑިޑޭޓް މޫސާ ފަތުހީގެ ކެމްޕޭނަށް ށ. ކޮމަންޑޫއަށް ވަޑައިގެންފައެވެ. ކެމްޕޭނަށް ކޮމަންޑޫއަށް ވަޑައިގެން އެމަނިކުފާނުވަނީ އެރަށުގައިވެސް އިންޑިއާ އައުޓް ކެމްޕޭން ކުރިއަށް ގެންދަވާފައެވެ. އަދި އިންޑިއާގެ ފުލުހުންނާއި، އިންޑިއާގެ ރައްޔިތުން ރާއްޖެއިން ބޭރުކުރަންޖެހޭކަމަށް ގެންދިޔައީ ތަކުރާރުކުރައްވާ ވިދާޅުވަމުންނެވެ.
