އަނަސްގެ މަރުގެ ދައުވާލިބޭ ޖުނައިޙް އަބްދުﷲގެ ބޭސްފަރުވާގެ ކަންކަމުގައި މައްސަލަތަކެއް އުޅުމާއެކު، ޝަރުތުތަކާއެކު ބަންދުން ދޫކޮށްލުމަށް ނިންމައިފިއެވެ.

މި މައްސަލައިގައި ބުރާސްފަތި ދުވަހު ކުރިއަށް ގެންގޮސްފައިވަނީ ބަންދު މުރާޖައާ އަޑުއެހުމެކެވެ. އެގޮތުން ޖުނައިޙްގެ ބޭސްފަރުވާއާ ގުޅޭ ގިނަ މައްސަލަތަކެއް މީގެކުރިންވެސްފެންމަތިވެފައިވެއެވެ.

އަދި އޭނާ ރާއްޖެއިން ބޭރަށް ދިއުމަށް ދޭން ޖެހޭ ހުއްދަވެސް މެޑިކަލް ބޯޑުން ދީފައިވާއިރު، އޭނާއަށް ފުރިފައިނުވަނީ ޕާސްޕޯޓު ލިބުމުގެ ދަތިތަކެއްގެ ސަބަބުންކަން އެނގިފައިވާކަމަށް ދިފާއީ ވަކީލު ވިދާޅުވިއެވެ. އަދި ޖެނުއަރީ 16 އަކީ އޭނާ އޮޕަރޭޝަން ކުރަން އޮތް ތާރީޚުކަމަށްވާއިރު، މިހާރު ލަސްވާ ސަބަބު ސާފުކުރަން ބޭނުންވާކަން ދިފާއީ ވަކީލު ފާހަގަ ކުރެއްވިއެވެ.

އެކަމާއި ގުޅޭގޮތުން ދައުލަތުގެ ވަކީލު ވިދާޅުވީ، އޭނާގެ ޓްރެވަލް ޑޮކިއުމަންޓުވެސް މިހާރު ހެދިފައިވާ ކަމަށާއި، ނަމަވެސް އޭނާއާއެކު ފުރުމަށް ހަމަޖެހިފައިވާ އާއިލާ މެމްބަރުގެ ޕާސްޕޯޓުގެ މުއްދަތު ހަމަވެފައިވުމުން ވަގުތު ނަގަމުންދާ ކަމަށެވެ. އަދި ޕާސްޕޯޓު އައު ކުރުމަށްފަހު އާސަންދަ އޮފީހަށް ހުށައެޅުމުން ބޭސްފަރުވާގެ ކަންކަން ހަމަޖެހޭނެކަމަށް ކަރެކްޝަންސްއިން ފޯރުކޮށްދީފައިވާ މައުލޫމާތުތަކާއި ޙަވާލާ ދެއްވައި ދައުލަތުގެ ވަކީލާ ވިދާޅުވިއެވެ. އެގޮތުން ޖުނައިޙްއާއެކު ފުރަން ހަމަޖެހިފައިވަނީ އޭނާގެ މަންމަ ކަމަށާއި، އޭނާގެ މަންމަގެ ޕާސްޕޯޓުގެ މުއްދަތު ހަމަނުވާކަމަށް ދިފާއުން ބުނެއެވެ. ޖުނައިޙްގެ މަންމަ ޕާސްޕޯޓު ހެއްދީވެސް އޭނާ ގޮވައިގެން ބޭސްފަރުވާއަށް ދިއުމަށްކަމަށްކަން ދިފާއުން ފާހަގަ ކުރެއެވެ.

އެކަމާއި ގުޅޭގޮތުން ދައުލަތުން ބުނީ، އެއީ ކަރެކްޝަންއިން މައުލޫމާތު ދިން ގޮތް ކަމަށެވެ.

މީގެ ކުރިންވެސް މެޑިކަލް ބޯޑުގެ ހުއްދަލިބި، އެކަށީގެންވާ މުއްދަތުގެ ތެރޭގައި ފުރޭގޮތް ނުވުމުގެ ސަބަބުން ބޭސްފަރުވާ މުޅިން ނުނިމެނީސް އަންނަންޖެހުނުކަން ދިފާއީ ވަކީލު ފާހަގަ ކުރެއްވިއެވެ. އަދި އޭރުވެސް މުއްދަތު އިތުރުކުރެވުނީ ނުހަނު ގިނަ ގޮންޖެހުންތަކާއެކު ކަމަށްވާއިރު، އެކަށީގެންވާ މުއްދަތެއް ބޭސްފަރުވާއަށް ލިއްބައިދޭންޖެހޭކަމަށް ވަކީލު ވިދާޅުވިއެވެ.

އެކަމާއި ގުޅޭގޮތުން ގާޒީ ވިދާޅުވީ، މި މައްސަލައިގައި ކަރެކްޝަންސްގެ ލަސްތަކެއް ހުރިކަން ފާހަގަވާ ކަމަށެވެ. އެގޮތުން ޝަރީއަތުން މެދުކެނޑުމަކަށްފަހު ޕާސްޕޯޓުގައިވާ ތާރީޚު ދިފާއު މެދުވެރިކޮށް ޗެކް ކޮށްފައިވާއިރު، ޕާސްޕޯޓު ހަދާފައިވަނީ ޖެނުއަރީ 2022ގައިކަން ވަނީ އެނގިފައެވެ. އަދި ދައުލަތުންވެސް ވަނީ ކަރެކްޝަންސް މެދުވެރިކޮށް އެކަމާއި ގުޅޭ ތަފްސީލުތައް ހިއްސާކޮށްފައެވެ. އެ ތަފްސީލުތަކާއި ދިފާއީ ވަކީލުންނަށް އާއިލާއިން ފޯރުކޮށްދީފައިވާ މައުލޫމާތުތަކުގައި ފުށުއެރުންތަކެއް ވެއެވެ.

ގާޒީ ވަނީ ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި ޝަރުތުތަކާއެކު ޖުނައިޙް ބަންދުން ދޫކޮށްލުމަށް ނިންމަވާފައެވެ. އަދި ޝަރީއަތް ނިމެންދެން ބަންދުކޮށްފައި އޮތް އޮތުން 30 ދުވަހަށް ވަނީ މަޑުޖައްސާލާފައެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.