އަލީ ގެނައުމަށް އިނގިރޭސި ބަހުން ކޯޓު އަމުރެއް ހޯދަން ފުލުހުން އެދުނު ސިޓީ ބުރާސްފަތި ދުވަހު ހަވީރު ކޯޓަށް ވަނީ ލިބިފައި

އަލީ ވަހީދު ގެނައުމަށް އިނގިރޭސި ބަހުން ކޯޓު އަމުރެއް ހޯދަން ފުލުހުން އެދުނު ސިޓީ ބުރާސްފަތި ދުވަހު ހަވީރު ކޯޓަށް ލިބިފައިވާކަމަށް ކްރިމިނަލް ކޯޓުން ބުނެފިއެވެ.

އެކަމާ ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލު ވިދާޅުވީ، އިންޓަރޕޯލުން ބޭނުންވާ މައުލޫމާތަކާއި، އިނގިރޭސި ބަހުން ކޯޓު އަމުރެއް ހޯދުމަށް އެދި ނިމިދިޔަ ޑިސެމްބަރު މަހު ކްރިމިނަލް ކޯޓުގައި ސިޓީއަކުން އެދިފައިވާނެ ކަމަށެވެ. އަދި ނިމިދިޔަ ހަފުތާގައިވެސް އިތުރު ސިޓީއެއް ކޯޓަށް ފޮނުވާފައިވާނެ ކަމަށާއި، ނަމަވެސް މިހާތަނަށް ކޯޓު އަމުރު ލިބިފައިނުވާކަމަށް ފުލުހުންގެ މީޑިއާ އޮފިޝަލު ވިދާޅުވިއެވެ. އަދި ކޯޓު އަމުރުގެ އިނގިރޭސި ތަރުޖަމާއެއް ހޯދުމުގެ މަސައްކަތް ކްރިމިނަލް ކޯޓާ ގުޅިގެން ކުރަމުންދާކަމަށް އޭނާ ވިދާޅުވިއެވެ.

އެކަމާގުޅޭ އެންމެ ފަހުގެ މައުލޫމާތު ހިއްސާ ކުރަމުން ކްރިމިނަލް ކޯޓުގެ މީޑިއާ އޮފިޝަލު ވިދާޅުވީ، އަލީ ވަޙީދުގެ މައްސަލައާއި ގުޅިގެން ބުރާސްފަތި ދުވަހުގެ ހަވީރު 15:55 ގައި ފުލުހުންގެ ސިޓީއެއް ކޯޓަށް ލިބިފައިވާ ކަމަށެވެ. އަދި ސިޓީ އެންޓަރކޮށް، އާދިއްތަ ދުވަހުގެ 11:05 ހާއިރު ސެކްޝަނަށް ލިބިފައިވާކަން އޭނާ ކަށަވަރު ކޮށްދެއްވިއެވެ.

ޓޫރިޒަމް މިނިސްޓްރީގެ މުވައްޒަފުންތަކަކަށް ޖިންސީ ގޯނާކުރި މައްސަލައިގައި ކްރިމިނަލް ކޯޓުގައި އޭނާގެ މައްޗަށް އުފުލާފައިވާ ދައުވާތަކުގެ އަޑުއެހުން ވަނީ ފެށިފައެވެ. ޢަލީ ވަޙީދު ބޭސްފަރުވާއަށް ރާއްޖެއިން ބޭރަށް ވަޑައިގަތުމަށްޓަކައި، އެދިވަޑައިގަތުމުން ކޯޓު އަމުރެއްގެ ދަށުން ޕާސްޕޯޓު ދޫކުރީ ހަތަރު މަހަށެވެ. އަދި އެކަން ކުރީ އަސްޢަދު ޢަލީ (އަޑުބަރޭ) ޖާމިނުވާގޮތަށެވެ. އެހެންނަމަވެސް ހަތަރު މަސް ފާއިތުވެ، ޝަރީޢަތް ފެށުނު އިރު ވެސް ޢަލީ ވަޙީދު އެނބުރި ރާއްޖެއަށް ވަޑައެއްނުގަންނަވައެވެ. އަދި އެކަމުގެ ޒިންމާ އަޑުބަރޭ ވެސް ނަގާފައެއް ނުވެއެވެ.

މި މައްސަލައިގައި އަލީ ވަހީދު ހާޒިރުވެވަޑައިގަތުމަށް އުޒުރުވެރިވާތީ އަލީ ވަޙީދުގެ ފަރާތުން ކޯޓުގައި ޖާމިނުވި އަޑުބަރޭ ވަނީ އެކަން އަންގައި ކްރިމިނަލް ކޯޓަށްވެސް ސިޓީއެއް ފޮނުވާފައެވެ. އެ ސިޓީގައި އޭނާ ވަނީ އޭނާ މި މައްސަލައިގައި ޖާމިނުވީ 4 މަަހަށް ކަމަށް ބުނެ، އެ މުއްދަތުގެ ތެރޭގައި އަލީ ވަހީދު ކޯޓަށް ހާޒިރުވެވަޑައިގަތުމަށް ކޯޓުން އެއްވެސް އެންގުމެއް އަންގާފައިނުވާކަމަށް ބުނެފައެވެ.

ކޯޓުގައި ހިނގަމުންދާ އެއްވެސް މައްސަލައަކާއި ގުޅިގެން ދައުވާ ލިބޭ ފަރާތް ދިވެހިރާއްޖޭގެ ސަރަހައްދުން ބޭރުގައި ވަނިކޮށް އޯޑިއޯ/ވީޑިއޯ ކޮންފަރެންސް މެދުވެރިކޮށް ޝަރީއަތް ކުރިއަށް ނުގެންދެވޭނެ ކަމަށް 4 ނޮވެމްބަރު 2021ގައި ސުޕްރީމް ކޯޓުން ކްރިމިނަލް ކޯޓުގެ މައްޗަށް އަމުރެއް ނެރެފައިވެއެވެ. ނަމަވެސް އޮންލައިންކޮށް އަލީ ވަހީދު އަޑުއެހުންތަކުގައި ބައިވެރިވެވަޑައިގަތް މައްސަލާގައި، ސުޕްރީމް ކޯޓުގެ އެންގުމާއި އެއްގޮތަށް އޭނާ ކޯޓަށް ހާޒިރުވެފައިނުވާތީ ކޯޓުން ވަނީ އަލީ ވަހީދުގެ މައްޗަށް 2 މަހާއި 12 ދުވަހުގެ ޖަލު ހުކުމެއްވެސް އިއްވާފައެވެ.