ރައީސުލްޖުމްހޫރިއްޔާ އިބުރާހިމް މުހައްމަދު ސާލިހުގެ ވެރިކަން ދެބައިވެގެން ގޮސްފައިވަނިކޮށް ކުރިމަތިލާން ޖެހުނު ބައި އިލެކްޝަން ވެގެން މިދަނީ، ކޮމަންޑޫ ދާއިރާގެ ރައްޔިތުންނަށް އައި ތަރައްގީގެ ފަހި ދުވަސްތަކަކަށެވެ. އެތައް ދުވަހެއް ވަންދެން ފެށޭނެ ކަމުގެ އިންތިޒާރުގައި ތިބި މަޝްރޫއުތަކުގައި އަމަލީ ސިފަ ޖެހި ފެށިގެން ދިޔައީއެވެ. ރަށުގެ ޒުވާނުންނާއި, ކުދި ބޮޑު އެންމެންގެ އުންމީދުތަކެކެވެ. އެއްދާއިރާއެއްގައި އެންމެ ގިނަ އަދަދަކަށް ތަރައްގީގެ މަޝްރޫއުތައް ކުރިއަށްދާ އަދި އެ ދާއިރާއަކަށް ބޮޑެތި ވައުދުތައް ވަމުން އަންނަ ދާއިރާއަކަށް ހަމަ ގައިމުވެސް ކޮމަންޑު ދާއިރާ ވެގެންދާނެއެވެ.

ކޮމަންޑޫ ދާއިރާގެ ރަށްތަކުގައި ތަރައްގީގެ ބައެއް މަޝްރޫއުތައް ކުރިޔަށް ދިޔަނަމަވެސް، ރައްޔިތުން އެކަމަކަށް އެދިއެދި ތިބި ބޮޑެތި ބައެއް ކަންކަން ހުރީ ތަންފީޒީ މަރުހަލާގައެއް ނޫނެވެ. އެހެންނަމަވެސް ބައި އިލެކްޝަނާއެކު މިކަންކަމުގައި އަމަލީ ސިފަ ޖެހިގެން ގޮސްފިއެވެ. ޕްލޭންކޮށް ނުކުރެވި ހުރި ކަންކަމާއި, މިހާރުވެސް ރައްޔިތުން އެކަމަކަށް އެދިއެދި ތިބި ކަންކަންވެސް ހިމެނޭގޮތަށް ބޮޑު އެތައް މަޝްރޫއެއް ފެށިގެން ގޮސްފިއެވެ. އިންތިޚާބާ ދިމާކޮށް ސަރުކާރުގެ މައި ޕާޓީ, އެމްޑީޕީގެ މެމްބަރުންނާއި, ދައުލަތުގެ ވަޒީރުންނާއި, އެމްޑީޕީއަށް ނިސްބަތްވާ މަޖިލިސް މެމްބަރުންވެސް ދަނީ އެ ދާއިރާއަށް ޒިޔާރަތް ކުރައްވަމުންނެވެ. އެއާއެކު ކޮންމެ ބައްދަލު ވުމެއްގައި ރައްޔިތުން އެދޭ ކަންކަން ރައްޔިތުން ދަނީ ހިއްސާ ކުރަމުންނެވެ.

މިގޮތުން އެންމެ ފާހގަކޮށްލެވެނީ, ދާއިރާގައި ހިމެނޭ އެންމެ ބޮޑު ރަށް ކަމުގައިވާ، ކޮމަންޑޫގެ ރައްޔިތުން އެދެމުން އައި ކޮމަންޑޫ އާއި މަތިކޮމަންޑޫ ގުޅުވައިދޭ ބްރިޖް މަޝްރޫއެެވެ. މިއަހަރަށް ބަޖެޓް ކުރެވިފައި ނެތް މި މަސައްކަތްވެސް މިހާރު ވަނީ ފެށިފައެވެ. އެމްޑީޕީގެ ކަންޑިޑޭޓްގެ ކެމްޕެއިން ލޯންޗް ކުރުމަށް ބޭއްވި ޖަލްސާގައި މި މަޝްރޫއު ފަށްޓަވައި ދެއްވާނެ ކަމުގެ ޔަގީކަން ރައީސް ދެއްވިއެވެ. އެއާއެކު ހަފްތާއެއްގެ ތެރެގައި މި މަޝްރޫއު އެވޯޑް ކުރެވި, އަމަލީ މަސައްކަތް މިވަނީ ފަށާފައެވެ. މި އަހަރަށް ބަޖެޓް ކުރެވިފައި ނެތް ނަމަވެސް ބަޖެޓްގެ ތެރެއިން މި މަޝްރޫއަށް 249 މިލިއަން ރުފިޔާ ވަނީ ހަމަޖައްސަވާފައެވެ. މިއީ އައުކަމެއް ނޫނެވެ. ބަޖެޓް ރާވާފައިވަނީ, އެއިރަކަށް ބޭނުންވާ މުހިއްމު ކަންކަމަށް ބަޖެޓްގެ ތެރެއިން އެޖަސްޓް ކުރެވޭގޮތަށެވެ. ކުރިއަށް އޮތް އަހަރެއްހާ ދުވަހުގެ ތެރޭގައި މިމަސައްކަތްވެސް ނިމިގެންދާނެއެވެ.

މީގެ އިތުރުންވެސް ކޮމަންޑޫގައި ހިއްކާފައިވާ ބިންކޮޅުން ގޯތި ދޫކުރުމާއި, އަތޮޅު ތެރޭގެ ރަށްތަކުގައި ސަރުކާރުން ކުރިއަށް ގެންދަން ނިންމާފައިވާ ހައުސިން މަޝްރޫއުގެ ބައެއް ކޮމަންޑޫގައި ވެސް ކުރިއަށް ގެންދިއުމަށް ނިންމުމާއި، ކޮމަންޑޫ ކައިރީގައި އޮތް ރަށްފަތި ކިޔާ ރަށެއްގައި ޓޫރިޒަމް ފެށުމާއި، ކޮމަންޑޫގެ ބަނދަރުގެ ބޭރުތޮށީގައި ކުދި ޑިންގީ އެޅޭނެ އިންތިޒާމުތަކެއް ހަމަޖައްސައިދިނުމަށް ރަށުގެ ރައްޔިތުން އެދޭތީ މިއަހަރު އެ މަސައްކަތް ފެށުމާއި، ކޮމަންޑޫގައި އައިސް ޕްލާންޓެއް ގާއިމުކުރުމަށް އެރަށުގެ މަސްވެރިން އެދޭތީ އެ މަސައްކަތް ކުރިޔަށް ގެންދިއުމުގެ އިތުރުން، މިއަހަރަށް މިހާރުވެސް ބަޖެޓް ކުރެވިފައިވާ، ކޮމަންޑޫ ސްކޫލު އަޕްގްރޭޑް ކުރުމުގެ މަސައްކަތް މިއަހަރު ފައްޓަވާ ދެއްވާނެކަމަށް ޚުދު ރައީސުލްޖުމްހޫރިއްޔާ ވަނީ ކޮމަންޑޫގެ ރައްޔިތުންނަށް ވައުދުވެ ވަޑައިގެންފައެވެ.

އެ ދާއިރާގެ ފޯކައިދޫގައި ފުޓްސަލް ދަނޑެއް ނެތިފައި ވަނިކޮށް، އެރަށުގައި ފުޓްސަލް ދަނޑެއް އެޅުމުގެ މަސައްކަތްވެސް ސަރުކާރުން މިހާރުވަނީ ފައްޓަވާ ދެއްވާފައެވެ. މީގެ އިތުރުން ފޯކައިދޫގެ ޕޮލިސް ސްޓޭޝަނާއިި، ސިއްހީ މަރުކަޒުގެ މަސައްކަތް މިއަހަރު ފެށޭނެ ކަމަށްވެސް ކޮމަންޑޫ ދާއިރާއަށް ރައީސް ސާލިހު ކުރެއްވި ދަތުރުފުޅުގައި ވަނީ ވިދާޅުވެފައެވެ. އަދި ފޯކައިދޫގެ ޗަކަ ބިމަށް ވެލިއަޅައި އެތަނުން ގޯތި ދޫކުރުމަށް ފޯކައިދޫ ރައްޔިތުން އެދޭތީ އެމަސައްކަތްވެސް ސަރުކާރުން މިއަހަރު ކޮށްދޭނެ ކަމުގެ ޔަގީންކަންވެސް ރައީސް ވަނީ އެރަށުގެ ރައްޔިތުންނަށް ދެއްވާފައެވެ.

ކޮމަންޑޫ ދާއިރާގައި ހިމެނޭ އެންމެ ކުޑަ ރަށް ކަމުގައިވާ މަރޮށީގައި ބަނދަރު ހެދުމުގެ މަސައްކަތް ފެށުމަށް އަންނަނީ ތައްޔާރުވަމުންނެވެ. މިއަހަރަށް ބަޖެޓް ކުރެވިފައިވާ، އެރަށުގެ ސިއްހީ މަރުކަޒާއި ސްކޫލުގެ ސައިންސް ލެބްގެ މަސައްކަތްތައް މިއަހަރު ފައްޓަވާ ދެއްވާނެކަމަށްވެސް ރައީސް ސާލިހުވަނީ އެމްޑީޕީގެ ބައި އިލެކްޝަން ކެމްޕޭން ފެށުމަށް ބޭއްވި ޖަލްސާގައި ވާހަކަފުޅު ދައްކަވަމުން ވައުދުވެވަޑައިގެންފައެވެ.

މިއީ ސަރުކާރުން މިދާއިރާއަށް އެކަނި ކުރަމުން އަންނަ ކަންކަމުގެ ކުރު ޚުލާސާއެކެވެ. ދެން އޮތީ, ވާދަވެރިންގެ ވައުދު ތަކެވެ. އެމްޑީޕީގެ ކެންޑިޑޭޓާ ވާދަކުރުމަށް ނުކުންނަ އިދިކޮޅު ކޯލިޝަންގެ ކެންޑިޑޭޓްގެ ކެމްޕެއިނަށް ވަޑައިގެން ކުރީގެ ރައީސް ޔާމީން ވިދާޅުވީ, ޕީޕީއެމްގެ ދެން އުފެދޭ ސަރުކާރެއްގައި، ދިގުވެލިދޫގައި އެއާޕޯޓެއް ތަރައްގީ ކުރައްވާނެ ކަމަށެވެ. އަދި ކީކިމިނީ ފެކްޓްރީގެ ފައިދާ ލިބޭ ގޮތަށް ކަންކަން އިންތިޒާމު ކުރައްވާނެ ކަމަށެވެ. އަދި އެމަނިކުފާނުގެ ވެރިކަމެއްގައި އެ ދާއިރާގައި ތަރައްގީގެ ގިނަ މަޝްރޫއުތަކެއް ކުރިއަށް ގެންދެވިކަމަށް ވިދާޅުވިއެވެ.

ކޮންމެއަކަސް ކޮމަންޑޫ ދާއިރާއަށް މިއޮތީ ތަރައްގީގެ އީދެއް އައިސްފައެވެ. ބައި އިލެކްޝަންތަކާ މަދުން ނޫނީ ކުރިމަތިލާން ނުޖެހެއެވެ. މަދުން ނޫނީ ކުރިމަތިލާން ނުޖެހޭ މި އިންތިޚާބުތަކާ ތަރައްގީގެ މަޝްރޫއުތަކާ ގުޅިލާމެހިފައިވާ މިންވަރު އެބަހާމަވެއެވެ. ރައްޔިތުންގެ އެތައް ދުވަހެއްގެ އުންމީދުތައް ހަގީގަތަކަށް ވެގެން އެދަނީ މަދު ވަގުތުކޮޅެއްގެ ތެރޭގައެވެ.