އާރަށު ޚިޔާނާތުގެ ޝަރީއަތް ލައިވް ކުރަން ޔާމީން އެދިވަޑައިގެންނެވި ނަމަވެސް، ޔޫސުފް ނައީމު އެކަމަށް އިންކާރު
ޔާމީނުގެ ގާނޫނީވަކީލުން ވަނީ މައްސަލައިގެ އަޑުއެހުންތައް ލައިވްކޮށްގެން ކުރިއަށް ގެންދިއުމަށް އެދިވަޑައިގެންފައި
ކުރީގެ ރައީސް އަބްދުﷲ ޔާމީނުގެ ޤާނޫނީވަކީލުންގެ ޓީމުން ވަނީ މި މައްސަލައިގެ އަޑުއެހުންތައް ލައިވްކޮށްގެން ކުރިއަށް ގެންދިއުމަށް އެދިވަޑައިގެންފައި
ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން މަގާމުގެ ނުފޫޒް ބޭނުންކޮށް ރިޝްވަތު ނެގި މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އުފުލާފާއިވާ ދައުވާގެ ޝަރީއަތުގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި އަޑުއެހުން ފެށުމާއެކު ރައީސް ޔާމީނުގެ ޤާނޫނީ ވަކީލުންގެ ޓީމުން ވަނީ މި މައްސަލައިގެ އަޑުއެހުންތައް ލައިވްކޮށްގެން ކުރިއަށް ގެންދިއުމަށް އެދިވަޑައިގެންފައެވެ. އެގޮތުން އިންސާފުވެރިކަމާއި ހަމަހަމަކަމާއެކު ޝަރީއަތްތައް ކުރިއަށް ގެންދަންޖެހޭނެކަމަށް ޤާނޫނުއަސާސީގެ 42 ވަނަ މާއްދާގައި ބަޔާންކޮށްފައިވާއިރު، ހާމަކަން ބޮޑު ގޮތެއްގައި ޝަރީއަތްތައް ކުރިއަށް ގެންދިއުން އޭގެ ތެރޭގައި ހިމެނޭކަމަށް ރައީސް ޔާމީނުގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ ޑރ މުހައްމަދު ޖަމީލް އަހުމަދު ވިދާޅުވިއެވެ.
ޝަރީއަތްތައް ލައިވް ކުރުމަށް ދައުލަތުންވެސް އިއުތިރާޒް ނުކުރާކަމަށް ދައުލަތުގެ ވަކީލާ ވިދާޅުވެއެވެ. އަދި ސުޕްރީމް ކޯޓުގައިވެސް ކޮންމެހެން އާންމުކޮށް ހުޅުވާނުލައި ކުރިއަށް ގެންދަންޖެހޭ އަޑުއެހުންތައް ފިޔަވައި ދެން ހުރި އަޑުއެހުންތައް ކުރިއަށްގެންދަނީ ލައިވްކޮށްގެންކަން ފާހަގަކުރައްވައި ދައުލަތުގެ ވަކީލާ ވަނީ، ދައުލަތުން އަޑުއެހުންތައް ލައިވް ކުރުމަށް ކުރިންވެސް އެދިފައިވާނެކަން ބަޔާން ކުރައްވާފައެވެ.
މި މައްސަލައާއި ގުޅިގެން ރިޝްވަތު ދިނުމުގެ ކުށުގެ ދައުވާ އުފުލާފައިވާ ވ. ފެލިދޫ ހަނދުވަރީގެ ޔޫސުފް ނައީމު ވަނީ ޝަރީއަތްތައް ލައިވްކޮށްގެން ކުރިއަށް ގެންދިއުމަށް އިއުތިރާޒު ކުރައްވާފައެވެ. އޭނާގެ ވަކީލު ވިދާޅުވީ، ލައިވްކޮށް މި މައްސަލައިގެ އަޑުއެހުން ކުރިއަށް ގެންދަވާނަމަ، ޔޫސުފު ނައީމްގެ ބައި ވަކިން ކުރިއަށް ގެންދެވުމަށް އެދޭ ކަމަށެވެ.
އެކަމާއި ގުޅިގެން ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ އަހުމަދު ޝަކީލް ވިދާޅުވީ، މި މައްސަލައިގެ އަޑުއެހުންތައް ލައިވް ކުރުމާމެދު ނިންމަވާ ގޮތެއް ޖެނުއަރީ މަހުގެ 20 ވަނަ ދުވަހުގެ ކުރިން ދެފަރާތަށްވެސް އަންގަވާނެ ކަމަށެވެ.
މި އަޑުއެހުމުގައި ޔާމީނުގެ އިތުރުން ޔޫސުފް ނައީމްގެ ފަރާތުންވެސް ވަނީ ލިއެކިއުންތަކުގައި ހިމެނޭ ބައެއް ސީޑީތައް ނުބެލޭކަން ފާހަގަކޮށްފައެވެ. އަދި ލިއެކިއުންތައް ދިރާސާކޮށް، މަދުވާ ލިއެކިއުންތައް ހަމަ ކުރުމަށް އިތުރު ވަގުތު ބޭނުންވާކަން ޔޫސުފު ނައީމްގެ ވަކީލުން ފާހަގަ ކުރައްވައެވެ. އެގޮތުން އެބޭފުޅުން އޭނާގެ ވަކީލުންގެ ގޮތުގައި އައްޔަނުކޮށްފައިވަނީވެސް އަޑުއެހުމުގެ އެއް ދުވަސް ކުރިންކަން ވަކީލުން ސަބަބެއްގެ ގޮތުގައި ފާހަގަ ކުރެއްވިއެވެ.
އެކަމާއި ގުޅިގެން މައްސަލަ ބައްލަވާ ގާޒީ އަހުމަދު ޝަކީލް ވަނީ 20 ޖެނުއަރީގެ ކުރިން ދެފަރާތުންވެސް މަދުވާ ލިއެކިއުންތައް ކޯޓަށް ހިއްސާކޮށް، ލިއެކިއުންތައް ހަމަ ކުރުމުގެ ކަންކަން ކުރިއަށް ގެންދިއުމަށް އަންގަވާފައެވެ. އަދި 27 ޖެނުއަރީ 2022 ގައި އޮންނަ އަޑުއެހުމުގައި ދައުވާ ސާފުކޮށްދީ ދައުވާއަށް ޖަވާބުދާރީވުން އޮންނާނެކަމަށް ގާޒީ ވިދާޅުވިއެވެ. އޭގެ ފަހުން ފެބްރުއަރީ 10 ގައިވެސް މި މައްސަލައިގެ އިތުރު އަޑުއެހުމެއް ބާއްވަވާނެކަމަށް ގާޒީ ޝަކީލް ވިދާޅުވިއެވެ.
މައްސަލައިގެ ޚުލާސާއެއް:
ޕީޖީ އޮފީހުން ބުނެފައިވަނީ މއ. ކާމިނީހުޅަނގުގެ އަބްދުﷲ ޔާމީން އަބްދުލްގައްޔޫމާއި ވ. ފެލިދޫ ހަނދުވަރީގެ ޔޫސުފް ނަޢީމް، މިނިސްޓްރީ އޮފް ޓުއަރިޒަމް އާއި މޯލްޑިވްސް މާރކެޓިންގ އެންޑް ޕަބްލިކް ރިލޭޝަން ކޯޕަރޭޝަން މެދުވެރިކޮށް ޓުއަރިސްޓް ރިޒޯޓް ތަރައްގީ ކުރުމަށްޓަކައި ވ. އާރަށް ކުއްޔަށް ދޫކުރުމުގެ މުއާމަލާތުގެ ތެރެއިން އޭރުގެ ރައީސުލްޖުމްހޫރިއްޔާ މަގާމުގެ ނުފޫޒު ބޭނުންކޮށްގެން ރިޝްވަތުގެ ގޮތުގައި 1 މިލިއަން ޔޫއެސް ޑޮލަރ ނަގައި ލޯންޑަރ ކޮށްފައިވާ ކަމަށް ތުޙުމަތުކުރެވޭ ކަމަށެވެ.
ރިސޯޓެއްގެ ގޮތުގައި ތަރައްގީކުރުމަށް ވ. އާރަށް ބޭރުގެ ބަޔަކަށް ވިއްކައިގެން ލިބުނު ފައިސާ، ރައީސް ޔާމީނުގެ އަމިއްލަފުޅު އެކައުންޓަކަށް ޖަމާކުރައްވާފައިވާ ކަމަށް ބުނާ މައްސަލައެއްގައި ދައުވާ ކޮށްދިނުމަށް އެދި އެ މައްސަލަ ޕީޖީއަށް ފޮނުވާފައިވަނީ 2021 ވަނަ އަހަރުގެ އޭޕްރީލް މަހުގެ ތެރޭގައެވެ. އާރަށުގެ އަގުގެ ގޮތުގައި ލިބުނު 1 މިލިއަން ޑޮލަރު އަމިއްލަފުޅު އެކައުންޓަކަށް ޖަމާކުރައްވާފައިވާ ކަަމަށް ތަހުގީގު ރިޕޯޓުގައިވެއެވެ.
ވ. ތިނަދޫ ކައިރީގައި އޮތް އާރަށަކީ ޕިކްނިކް ދާ ކުޑަރަށެކެވެ. އެ ރަށަކީ ޑީއާރްޕީގެ ކުރީގެ ލީޑަރު އަޙުމަދު ތަސްމީން އަލީގެ ހިއްސާ އޮންނަ ކުންފުންޏަކަށް ކުރިން ދީފައި އޮތް ރަށެކެވެ. އޮގަސްޓް 2015 ގައި ތަސްމީންގެ އަތުން އެރަށް އަތުލައި، ހަމަ އެ އަހަރުގެ ސެޕްޓެމްބަރު މަހު އެ ރަށް ހަވާލުކޮށްފައިވަނީ ވ. ފެލިދޫ ދާއިރާގެ ކުރީގެ މެމްބަރު ޔޫސުފް ނައީމާއެވެ.
