ގދ. ތިނަދޫން ބޯހިޔާވަހިކަން ބޭނުންވާ ރަށުން ބޭރުމީހުންނަށް އެރަށުން ގޯތި ދޫކުރުމަށް ހަމަޖެހިފައިވާކަމަށް, އެރަށު ކައުންސިލުން ހާމަކޮށްފިއެވެ.

ތިނަދޫ ކައުންސިލުން ބުނީ، އެރަށަކީ ހަލުވިކަމާއެކު އާބާދީ އިތުރުވަމުން އަންނަ ރަށެއް ކަމުން، ތަރައްގީގެ އާ އުސްމިންތަކަކަށް ވާސިލުވުމަށް ކައުންސިލުން ހިފާފައިވާ އަމާޒަށް ވާސިލުވުމަށްޓަކައި، އެހެން ރަށްރަށުގެ ރައްޔިތުންވެސް ހިމަނައިގެން، ސަރަހައްދީ ތަރައްގީގެ ތެރެއިން އެންމެންނަށް ލާބަ ހުރި ގޮތްތައް ހޯދުމަށް ބޭނުންވާ ކަމަށެވެ.

އެގޮތުން އިގުތިސާދީ ގޮތުންނާއި އިޖުތިމާއީ ގޮތުން ހިންގާ އެކިއެކި ހަރަކާތްތަކާއެކު، ތިނަދޫން ގޯތި ނުވަތަ ބޯހިޔާވަހިކަން ބޭނުންވާ ރަށުން ބޭރުގެ ފަރާތްތަކަށް ގޯތި ނުވަތަ ބޯހިޔާވަހިކަން ދޫކުރުމަށް އެ ކައުންސިލުން ގަސްދުކުރާކަމަށް ކައުންސިލުން މައުލޫމާތު ދެއްވިއެވެ.

އެގޮތުން އެރަށުން ގޯތި ބޭނުންވާ، ރަށުން ބޭރުގެ ފަރާތްތަކުން ގޫގުލް ފޯމު މެދުވެރިކޮށް، އަންނަ މާޗު މަހުގެ 31 ވަނަ ދުވަހުގެ ކުރިން މައުލޫމާތު ހިއްސާކުރުމަށް އެކައުންސިލުން ވަނީ އެދިފައެވެ.

2016 ވަނަ އަހަރު އެރަށުގެ ބިން ހިއްކުމަށް ކުރިއަށް ގެންދިޔަ މަޝްރޫއު ނިންމާލިއިރު ތިނަދޫގެ ދެކުނު ފަރާތުން 4 ހެކްޓަރު އަދި އުތުރު ފަރާތުން 51 ހެކްޓަރުގެ ބިން ވަނީ ހިއްކާފައެވެ.