ކޮމަންޑޫ ޝޯރ ޕްރޮޓެކްޝަން ރެކްޓިފިކޭޝަން މަސައްކަތާއި މަތިކޮމަންޑޫ ކަނެކްޓިވިޓީ މަޝްރޫއުގެ މަސައްކަތް އެމްޓީސީސީއަށް
މިމަސައްކަތް އެމްޓީސީސީއާ ހަވާލުކޮށްފައިވަނީ 730 ދުވަހުގެ ތެރޭގައި ނިންމާ ގޮތަށް، 2.5 މިލިއަން ރުފިޔާއަށް
އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން
ށ. ކޮމަންޑޫ ޝޯރ ޕްރޮޓެކްޝަން ރެކްޓިފިކޭޝަން މަސައްކަތާއި މަތިކޮމަންޑޫ ކަނެކްޓިވިޓީ މަޝްރޫއުގެ މަސައްކަތް މޯލްޑިވްސް ޓްރާންސްޕޯރޓް އެންޑް ކޮންސްޓްރަކްޝަން ކޮމްޕެނީ (އެމްޓީސީސީ)އާ ހަވާލުކޮށްފިއެވެ.
މިމަސައްކަތް އެމްޓީސީސީއާ ހަވާލުކުރުމުގެ އެއްބަސްވުމުގައި ސޮއިކޮށްފައިވަނީ މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރގެ ފަރާތުން ޑެޕިއުޓީ ޑިރެކްޓަރ ޖެނެރަލް އަންވަރު އަލީ އެވެ. އަދި އެމްޓީސީސީގެ ފަރާތުން ސޮއިކުރެއްވީ ސީއީއޯ އާދަމް އާޒިމް އެވެ.
މިމަސައްކަތް އެމްޓީސީސީއާ ހަވާލުކޮށްފައިވަނީ 730 ދުވަހުގެ ތެރޭގައި ނިންމާ ގޮތަށް، 2.5 މިލިއަން ރުފިޔާ އަށެވެ.
މިމަޝްރޫއުގެ ދަށުން ކޮމަންޑޫގައި 1690 މީޓަރުގެ މީޓަރުގެ ޝޯރ ޕްރޮޓެކްޝަން ރެކްޓިފިކޭޝަން މަސައްކަތް ކުރުމާއި، 16.7 ހެކްޓަރުގެ ބިން މަތިކޮމަންޑޫގައި ހިއްކުމާއި، 1520 މީޓަރުގެ ބޮޑު ހިލައިގެ ތޮށި، ޖުމްލަ 353 މީޓަރުގެ ބޮޑުހިލައިގެ ފައިކަށި އަދި 112 މީޓަރުގެ ޖިއޯބޭގް ތޮށި މަތިކޮމަންޑޫގައި ގާއިމުކުރުން ހިމެނެއެވެ. މީގެ އިތުރުން 200 މީޓަރު ދިގުމިނުގެ ލަންކަކުން ކޮމަންޑޫ އަދި މަތިކޮމަންޑޫގައި ހިއްކާ ސަރަހައްދު ގުޅާލުމާއެކު، މިމަސައްކަތަށް ބޭނުންވާ ތިމާވެށީގެ ދިރާސާތަކާއި ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ތައްޔާރުކުރުން ހިމެނެއެވެ.
ކޮމަންޑޫއަކީ ބިން ފުރިފައިވާ ރަކަށްވުމާއެކު މީގެ ކުރިން ކޮމަންޑޫގައި ބިން ހިއްކައި، ގޮނޑުދޮށް ހިމާޔަތްކުރުމުގެ މަޝްރޫއެއް ހިންގާފައިވެއެވެ. ނަމަވެސް ކޮމަންޑޫ އޮންނަ ފަޅުގެ ސަބަބުން ކޮމަންޑޫއަށް އެކި ފަހަރު މަތިން ރާޅުއަރައި، ހިއްކާފައިވާ ބިން ވަނީ ރަށުގެ ރައްޔިތުންނަށް ބޭނުން ނުކުރެވިފައެވެ.
އެހެންކަމުން މިމައްސަލައަށް ދާއިމީ ހައްލެއް ހޯދުމަށް ކޮމަންޑޫގައި މިހާރު ގާއިމުކޮށްފައިވާ ތޮށި މަރާމާތުކޮށް، ކޮމަންޑޫގެ ބިން ފުރިހަމަ ގޮތުގައި ބޭނުން ކުރެވޭނެ ބިމަކަށް ހެދޭނީ އިތުރަށް ބިން ހިއްކައިގެން ކަމަށްވާތީ މަތިކޮމަންޑޫއިން ބައެއް ހިއްކާ މަތިކޮމަންޑޫއާ ކޮމަންޑޫއާ ދެތެރޭ ފާލަމުގެ ލިންކަކުން ގުޅާލުމަށް ރޭވިގެން ދިޔައެވެ.
