ރައީސް މައުމޫން، ސިންގަޕޫރުގައި އެކަނިމާއެކަނި ޓެކްސީގައި!
ރައީސް މައުމޫން ސިންގަޕޫރުގައި ހުންނެވީ ނުރަސްމީ ދަތުރުފުޅެއްގައި
ސެކިއުރިޓީ އާއި ނުލައި، ރައީސް މައުމޫން އެކަނިމާއެކަނި ސިންގަޕޫރުގައި ޓެކްސީއަކަށް އަރާވަޑައިގަންނަވާ މަންޒަރު
ސެކިއުރިޓީ އާއި ނުލައި، ރައީސް މައުމޫން އެކަނިމާއެކަނި ސިންގަޕޫރުގައި ޓެކްސީއަކަށް އަރާވަޑައިގަންނަވާ މަންޒަރު ފެންނަ ފޮޓޯއެއް އާންމު ވުމާއި ގުޅިގެން ގިނަ ބައެއްގެ ފާޑުކިޔުން ސަރުކާރަށް އަމާޒުވެއްޖެއެވެ.
ބުދަ ދުވަހު ސޯޝަލް މީޑިއާގައި އާންމުވެފައިވާ މި ފޮޓޯގައި ފެންނީ ރައީސް މައުމޫން، ޓެކްސީއަކަށް އަރާވަޑައިގަތުމަށް ޓެކްސީގެ ދޮރު ހުޅުއްވަވައިގެން ހުންނަވާ މަންޒަރެވެ. އަދި ހަމަ މިއާއިއެކު ޓެކްސީގެ އަނެއް ފަޅިން މެޑަމް ނަސްރީނާ އިބްރާހިމްކަމަށް ލަފާކުރެވޭ ކަނބަލެއްވެސް ޓެކްސީއަށް އަރާވަޑައިގަތުމަށް ތައްޔާރުވެވަޑައިގެން ހުންނަވާ މަންޒަރު ފެނެއެވެ. ނަމަވެސް ކާރާއި މޫނު ނިވާވެފައިވާތީ ކާރުގެ އަނެއް ފަޅީގައި ހުންނެވީ މެޑަމް ނަސްރީނާ އިބްރާހިމްކަން ޔަޤީނެއް ނުވެއެވެ.
މި ފޮޓޯ އާންމުވެގެން ދިއުމާއި ގުޅިގެން، ގިނަ ބަޔަކު ވަނީ، މިއި ކުރިން ރައީސްކަން ކުރައްވާފައިވާ ބޭފުޅަކު އުޅުއްވަން ޖެހިވަޑައިގަންނަވާ ގޮތް ނޫން ކަމަށް ވިދާޅުވެ، މިހެން މިކަން ވިޔަދިނީތީ ސަރުކާރަށް ފާޑު ކިޔާފައެވެ. އެގޮތުން، ސިންގަޕޫރުގައި ދިވެހި އެމްބަސީއެއް ހުރެ، ރައީސް މައުމޫނަށް ކާރުކޮޅެއް ހަމަޖައްސައި ނުދެވުމަކީ ސަރުކާރުގެ އިހުމާލު ކަމާއި، ސެކިއުރިޓީ އާއި ނުލައި ރައީސް މައުމޫން ސިންގަޕޫރުގައި އުޅުއްވަން ޖެހިވަޑައިގަތުމުން، އެއީ ސަރުކާރުގެ އިހާނެތިކަން ހާމަވާ ކަމެއް ކަމަށްވެސް ބައެއް ފަރާތްތަކުން ވަނީ ބުނެފައެވެ.
ރައީސް މައުމޫން ސިންގަޕޫރަށް ވަޑައިގެން އުޅުއްވަނީ، އެމަނިކުފާނުގެ އަނބިކަނބަލުން، މެޑަމް ނަސްރީނާ އިބްރާހިމްގެ ދައްތާފުޅުގެ ސިއްހީ ހާލުކޮޅު އިންތިހާއަށް ގޯސްވުމާއި ގުޅިގެން އެކަމަނާގެ ބޭސްފަރުވާއަށެވެ.
