ހާލަންޑް ހޯދުމުގެ ރޭހުގެ ކުރީގައި ބާސެލޯނާ

ޖަރުމަނުގެ ބޮރޫޝިއާ ޑޯޓްމުންޑަށް ކުޅޭ ނޯވޭގެ ފޯވާޑް އާލިން ބްރައުޓް ހާލަންޑްގެ ސޮއި ހޯދުމުގެ ރޭހުގެ ކުރީގައި މިވަގުތު އޮތީ ސްޕެއިންގެ ގަދަ ބާރު ބާސެލޯނާ ކަމަށް ރިޕޯޓްތައް ބުނެފިއެވެ.

ނޯވޭގެ ޒުވާން ތަރި މި ސީޒަނަށްފަހު ޑޯޓްމުންޑު ދޫކޮށްލާނެކަމަށް ބެލެވިފައިވާއިރު، އޭނާގެ ސޮއި ހޯދަން ޔޫރަޕްގެ ބޮޑެތި ހުރިހާ ކްލަބްތަކަކުން ކަހަލަ ގޮތަކަށް އަންނަނީ މަސައްކަތް ކުރަމުންނެވެ.

މިފަހުން ހާލަނޑްގެ އެޖެންޓު މިނޯ ރައިއޯލާ ދިން އިންޓަވިއުއެއްގައި ވަނީ ޑޯޓްމުންޑް ދޫކޮށް ހާލަންޑް ދެން ފެނިދާނެ ހަތަރު ކްލަބެއްގެ ނަން ހާމަކޮށްފައެވެ. އެ ކްލަބުތަކަކީ ޖަރުމަނުގެ ބަޔާން މިއުނިކް، ސްޕެއިންގެ ބާސެލޯނާ، އިންގްލެންޑްގެ މެންޗެސްޓާ ސިޓީ އަދި ސްޕެއިންގެ ރެއާލް މެޑްރިޑެވެ.

ރިޕޯޓްތައް ބުނާ ގޮތުން ބާސެލޯނާގައި މިހާރު ތިބި ބޮޑު މުސާރަ ލިބޭ ބައެއް ކުޅުންތެރިން ޓީމު ދޫކޮށްލުމާއި އެ ކްލަބްގެ މާލީ ހާލަތު މަޑުމަޑުން ބަދަލުވަމުން އަންނަ ގޮތަށް ބަލާއިރު، ބާސެލޯނާއިން އަންނަ ސީޒަނުގައި ހާލަންޑް ފެނުމުގެ ފުރުސަތު އެބައޮތެވެ.

ބާސެލޯނާގެ ރައީސް ޖޮއާން ލަޕޯޓާ އާއި ހާލަންޑްގެ އެޖެންޓް ރައިއޯލާ ވަނީ ފާއިތުވެދިޔަ ދެ ހަފްތާއެއްހާ ދުވަހު އެކި ފަހަރު މަތިން ބައްދަލުކޮށްފައެވެ. އެ ބައްދަލުވުންތަކުގެ ބޭނުމަކީ މި ސީޒަނަށްފަހު ހާލަންޑް ބާސެލޯނާއަށް ގެންދިޔުންކަމަށް ރިޕޯޓުތައް ބުނެއެވެ.

މިދިޔަ އަހަރުގެ ފިނި މޫސުމުގެ ޓްރާންސްފާ މާކެޓުގައި ސަލްޒްބާގް ދޫކޮށް ހާލަންޑް ޑޯޓުމުންޑަށް ބަދަލުވީ 22 މިލިއަން ޑޮލަރުގެ ފީ އަކަށެވެ. މި ސީޒަން ފެއްޓުމުގެ ކުރިން ހާލަންޑް ގަންނަން ޓީމުތަކުން ކުރި މަސައްކަތް ހުއްޓުމަކަށް އައީ ހާލަންޑް ވިއްކުމަށް ޑޯޓުމުންޑުން ކީ އަގު ބޮޑުވުމުންނެވެ. ޑޯޓުމުންޑުން އޭރު ހާލަންޑް ވިއްކުމަށް ކީ 150 މިލިއަން ޑޮލަރުގެ އަގެކެވެ.

ހާލަންޑު ވަނީ ޑޯޓުމުންޑަށް ކުޅެދިން 75 މެޗުން 76 ލަނޑު އެޓީމަށް ކާމިޔާބުކޮށްދީފައެވެ.