މެންޗެސްޓާ ސިޓީގެ ކޯޗު ޕެޕް ގާޑިއޯލާ ޕޮޒިޓިވްވިއިރު، އެ ޓީމުގެ 21 ކުޅުންތެރިއަކު އައިސޮލޭޝަނަށް ދާން ޖެހިއްޖެއެވެ.

އުމުރުން 50 އަހަރުގެ ގާޑިއޯލާގެ އިތުރުން ސިޓީގެ އެސިސްޓެންޓް ކޯޗު ޖުއަންމާ ލީލޯވެސް ވަނީ ކޮވިޑަށް ޕޮޒިޓިވްވެފައެވެ.

ކޮވިޑަށް ޕޮޒިޓިވްވުމާއެކު ގާޑިއޯލާއަށް ސިޓީން ހޮނިހިރު ދުވަހު އެފްއޭ ކަޕުގައި ހަޑަސްފީލްޑާ ދެކޮޅަށް ކުޅޭ މެޗު ގެއްލޭނެއެވެ.

ގާޑިއޯލާ އާއި އެސިސްޓެންޓް ކޯޗު ލީލޯ ކޮވިޑަށް ޕޮޒިޓިވްވިއިރު ސިޓީގެ 21 ކުޅުންތެރިން ވަނީ އައިސޮލޭޝަނަށް ދާން ޖެހިފައެވެ. އޭގެ ތެރޭގައި ސިޓީގެ ފުރަތަމަ ޓީމުގައި ހިމެނޭ ހަތް ކުޅުންތެރިންވެސް ހިމެނެއެވެ.

ރިޕޯޓްތައް ބުނާ ގޮތުން ސިޓީން ފެނުނު ޕޮޒިޓިވް ކޭސްތަކާއެކު އެ ޓީމުން ހޮނިހިރު ދުވަހު އެފްއޭ ކަޕުގައި ހަޑަސްފީލްޑާ ދެކޮޅަށް ކުޅެން ހަމަޖެހިފައިވާ މެޗު ފަސްކުރަން ހުށަހަޅާނެއެވެ. ދާދި ފަހުން ލިވަޕޫލުންވެސް ވަނީ ކޮވިޑް ކޭސްތަކެއްފެނި އެ ޓީމު ލީގު ކަޕުގައި ކުޅެން އޮތް މެޗު ފަސްކުރަން ހުށަހަޅާފައެވެ.

ކޮވިޑްގެ ސަބަބުން އިނގިރޭސި ޕްރިމިއާ ލީގުގެ ގިނަ މެޗުތަކެއް ޑިސެމްބަރު މަހު ވަނީ ފަސްވެސްކޮށްފައެވެ. މިދިޔަ ހޯމަ ދުވަހުގެ ނިޔަލަށް ޕްރިމިއާ ލީގުން 14،250 މީހުން ކޮވިޑަށް ޓެސްޓުކޮށްފައިވާއިރު، އޭގެ ތެރެއިން 94 މީހުން ވަނީ ކޮވިޑަށް ޕޮޒިޓިވްވެފައެވެ. އެހެންނަމަވެސް ކްލަބުތަކުން މިހާރު ކޮވިޑްގެ ކޭސްތައް އިތުރުވެގެން ރިޕޯޓްކޮށްފައިވާއިރު މި އަދަދު މިހާރު 103ށް އަރާނެކަމަށް ބެލެވެއެވެ.