ހދ. ހަނިމާދޫ ހައުސިންގ މަޝްރޫއުގެ ބީލަމުން އެސްޖޭ ކޮންސްޓްރަންޝަން ޑިސްކޮލިފައިކުރީ ގާނޫނާއި ގަވާއިދާ ޚިލާފަށް ކަމަށް ކަނޑައަޅައި، 20 ދުވަސްތެރޭ ޕްރޮޖެކްޓް އެވޯޑު ކުރުމަށް ސިވިލް ކޯޓުން ހުކުމް ކޮށްފިއެވެ.

18 ޖުލައި 2021ގައި މިމަސައްކަތް ކުރުމަށް ހައުސިން މިނިސްޓްރީގެ ފަރާތުން ހަވާލުކޮށްފައިވަނީ ދޮންބޭޒް ޕްރައިވެޓް ލިމިޓެޑާއެވެ. އެއީ ހަނިމާދޫގައި އަޅަން ފަށާފައިވާ 48 ހައުސިން ޔުނިޓް ނިންމުމަށާއި އަލަށް އިމާރާތްކުރާ 52 ހައުސިން ޔުނިޓުގެ ޑިޒައިންގެ މަސައްކަތް ކުރުމަށެވެ. އެ މަސައްކަތް ހަވާލު ކުރިއިރު އެސްޖޭއާއި އެ ކުންފުނީގެ ސިސްޓަރ ކޮމްޕެނީ އެސްޖޭ ޓްރޭޑަރސް ހުށަހެޅި ޖޮއިންޓް ބިޑް އިވެލުއޭޓްކޮށްފައެއް ނުވެއެވެ. އެ ބިޑް އިވެލުއޭޓް ނުކުރީ މާލީ ފުދުންތެރިކަމާއި އެމްޕްލޯޔަރސް ރިކުއަރމަންޓް ހަމަނުވާތީ ކަމަށް ބުނެއެވެ.

ނަމަވެސް އާދިއްތަ ދުވަހު ސިވިލް ކޯޓުގެ ގާޒީ އަބްދުއްނާސިރު ޝަފީގު ކުރެއްވި ހުކުމުގައި ވިދާޅުވެފައި ވަނީ، އެސް.ޖޭ ކޮންސްޓްރަކްޝަން ޕްރައިވެޓް ލިމިޓެޑާއި، އެސް.ޖޭ ޓްރޭޑް ޕްރައިވެޓް ލިމިޓެޑްގެ ފަރާތުން މިނިސްޓްރީ އޮފް ފިނޭންސްގެ މައްޗަށް ދައުވާކޮށް ހުށަހެޅި މައްސަލާގައި، ދައުވާކުރާ ފަރާތްތަކަކީ ފައިނޭންޝަލް ރިސޯސަސްއާއި، އެމްޕްލޯޔަރސް ރިކުއަރމަންޓް ފުރިހަމަވެފައިވާ ފަރާތްތަކެއް ކަމުގައި ކަނޑައަޅައި، އެފަރާތްތަކުގެ ބިޑަކީ ފައިނޭންޝަލް ރިސޯސަސްއާއި، އެމްޕްލޯޔަރސް ރިކުއަރމަންޓް ފުރިހަމަވެފައިވާ ބިޑެއްކަމުގައި ބަލަން ޖެހޭ ކަމަށެވެ. އަދި 02 ޖެނުއަރީ 2022ން ފެށިގެން، ސަރުކާރު ބަންދު ދުވަސް ނުހިމެނޭހެން 20 ދުވަހުގެ ތެރޭގައި، ދައުވާކުރާ ފަރާތްތަކުގެ ބިޑް ރީ-އިވެލުއޭޓްކޮށް، މިހާރު އިވެލުއޭޓްކޮށް ނިންމާފައިވާ ބިޑްތަކާއި، ދައުވާކުރާ ފަރާތްތަކުގެ ބިޑްގެ ތެރެއިން، އެންމެ މަތިން ޕޮއިންޓް ލިބޭ ފަރާތަކަށް ބިޑް އެވޯޑްކުރުމަށް މިނިސްޓްރީ އޮފް ފިނޭންސާއި، ކަމާބެހޭ ފަރާތްތަކަށް އަންގާ ހުކުމް ކުރާ ކަމަށެވެ.

ދޮންބޭޒް ޕްރައިވެޓް ލިމިޓެޑާ މަސައްކަތް ހަވާލުކޮށްފައިވީ ނަމަވެސް އެ މައްސަލަ ކޯޓަށް ވެއްދުމާ ގުޅިގެން އަމަލީ މަސައްކަތް ފަށާފައިނުވެއެވެ.