އާޒިމާ ޝަކޫރުގެ މައްސަލަ ކޯޓުގައި ތާށިވެފައި؟!

ރައީސް އޮފީހުގެ ކުރީގެ ލީގަލް އެފެއާޒް މިނިސްޓަރ އައިޝަތު އާޒިމާ ޝަކޫރުގެ މައްޗަށް އުފުލާފައިވާ މަނީ ލޯންޑަރ ކުރުމާ ގުޅޭ ދެ ދައުވާގެ އަޑުއެހުންތައް ކްރިމިނަލް ކޯޓުގައި ކުރިއަށް ނުގެންދާތާ ގިނަ ދުވަސްތަކެއް ވެއްޖެއެވެ.

މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ މީގެ ދޮޅުއަހަރު ކުރިންނެވެ. އެގޮތުން އިބްތިދާއީ އަޑުއެހުންތަކެއް ބޭއްވުމަށްފަހު، މި މައްސަލަ އިތުރަށް ކުރިއަށް ގެންގޮސްފައެއް ނުވެއެވެ.

އެކަމާ ގުޅޭގޮތުން ރާއްޖެއެމްވީއަށް ޕީޖީ އޮފީހުގެ މީޑިއާ އޮފިޝަލު ވިދާޅުވީ، ޕީޖީ އޮފީހުން ކޯޓަށް މައްސަލަ ހުށައަޅާފައި ވީނަމަވެސް، އެ މައްސަލައިގެ އަޑުއެހުންތައް ތާވަލު ކުރަމުން ނުދާ ކަމަށެވެ. އަދި އަޑުއެހުންތައް ތާވަލު ނުކުރާ ވަކި ސަބަބެއް ކޯޓުން އަންގާފައިނުވާކަމަށް ވިދާޅުވިއެވެ. މި މައްސަލައިގައި އިބްތިދާއީ އަޑުއެހުން ބޭއްވުމަށްފަހު، އޭގެ ފަހުން މައްސަލަ ކުރިއަށް ނުދާކަމަށް އޭނާ ވިދާޅުވިއެވެ.

އެހެން މައްސަލަތަކެކޭ އެއްގޮތަށް މި މައްސަލަވެސް އަވަސްކުރުމަށްޓަކައި ޕީޖީ އޮފީހުން ކުރަންޖެހޭ ކަންކަން ކުރައްވާނެކަމަށް އޭނާ ވިދާޅުވިއެވެ.

މި މައްސަލަ ފުރަތަމަ ބައްލަވަމުން ގެންދެވި، ކްރިމިނަލް ކޯޓުގެ ކުރީގެ ގާޒީ އަހުމަދު ހައިލަމެވެ. ސްލޫކީ މައްސަލައެއް ފެންމަތިވެ، ފަނޑިޔާރު ކަމުގެ މަގާމުން އޭނާ ވަކިކުރުމުގެ ކުރިން އޭނާ ވަނީ ފަނޑިޔާރު ކަމުގެ މަގާމުން އިސްތިއުފާ ދެއްވާފައެވެ. އޭގެ ފަހުން މިމައްސަލަ ބައްލަވަމުން ގެންދެވީ ގާޒީ ހަސަން ސައީދެވެ.

ގާޒީ ސައީދު ކުރިއަށް ގެންދެވި އަޑުއެހުންތަކުގައި ވެސް، އާޒިމާ ވަނީ މި ދެ ދައުވާއަކީ ކުރިއަށް ގެންދެވޭނެ ދައުވާތަކެއް ނޫންކަމަށް ވިދާޅުވެ، ދައުވާތައް ކުރިއަށް ނުގެންދެވޭނެ ކަމަށް ނިންމަވައި ދެއްވުމަށް ތަކުރާރުކޮށް އެދިވަޑައިގެންފައެވެ. ބައެއް އަޑުއެހުންތަކުގައި، މި ދެ ދައުވާގެ އަޑުއެހުންތައް އަލުން ފެށުމަށް ވެސް އާޒިމާގެ ފަރާތުން އެދިވަޑައިގެންފައިވެއެވެ. އެގޮތަށް ބަޔާންކޮށް އާޒިމާގެ ފަރާތުން ވަނީ ކްރިމިނަލް ކޯޓަށް ސިޓީއެއް ވެސް ފޮނުއްވާފައެވެ.

އާޒިމާގެ ސިޓީ ކްރިމިނަލް ކޯޓަށް ހުށަހަޅުއްވާފައި ވަނިކޮށް، ބޭއްވި އަޑުއެހުމުގައި ގާޒީ ހަސަން ސައީދު ނިންމަވާފައި ވަނީ މި މައްސަލަ ކުރިން ބެއްލި ގާޒީ ނިންމެވި ހިސާބުން ކުރިއަށް ގެންދިއުމަށެވެ. ނަމަވެސް އެންމެފަހުން ބޭއްވި އަޑުއެހުމުގައި ގާޒީ ވަނީ، އާޒިމާގެ މައްޗަށް އުފުލާފައިވާ ދެ ދައުވާ ކުރިއަށް ގެންދެވޭނެތޯ ނުވަތަ ނޫންތޯ އަލުން ކަނޑައެޅުން ދެން އޮންނަ އަޑުއެހުމުގައި އޮންނާނެ ކަމަށް ވިދާޅުވެފައެވެ. މި މައްސަލާގައި އެންމެފަހުން އަޑުއެހުމެއް ބާއްވާފައިވަނީ، 2020 ވަނަ އަހަރުގެ އޮކްޓޯބަރު މަހުގެ 20 ވަނަ ދުވަހުއެވެ.

އެ އަޑުއެހުމުގައި އޭރު މައްސަލަ ބެއްލެވި ގާޒީ ހަސަން ސައީދު ވިދާޅުވީ، އާޒިމާގެ މައްޗަށް އުފުލާފައިވާ އެ ދެ ދައުވާ ކުރިއަށް ގެންދެވޭނެތޯ ނުވަތަ ނޫންތޯ އަލުން ގޮތެއް ކަނޑައެޅުއްވުމަށް ނޮވެމްބަރު މަހުގެ 9 ވަނަ ދުވަހު އަޑުއެހުމުގައި އޮންނާނެ ކަމަށެވެ. އާޒިމާގެ މައްޗަށް ދައުލަތުން އުފުލާފައި ވަނީ ރަސްމީ އިދާރާތަކަށް ދޮގު މައުލޫމާތު ދިނުމުގެ ކުށުގެ ދައުވާ އާއި މަނީ ލޯންޑަރިންއަށް މަގު ފަހިކޮށްދިނުމުގެ ކުށުގެ ދައުވާއެވެ. އެ ދެ ދައުވާގެ އިބްތިދާއީ އަޑުއެހުމެއް 2020 ވަނަ އަހަރުގެ ފަހުކޮޅުވެސް ތާވަލުކުރިއެވެ. ނަމަވެސް، އެ މައްސަލަތައް ބެލުމަށް ގާޒީ ފަހުން ތަނާޒުލްވެވަޑައިގެންފައިވާތީ، އެ އަޑުއެހުން ވަަނީ ކެންސަލްކޮށްފައެވެ.