އައު އަހަރު ފެށިއިރު ޗައިނާގެ ގިނަ ސިޓީތައް ކޮވިޑް އެލަރޓްގައި

އައު އަހަރާ ކުރިމަތިލިއިރު ޗައިނާގެ އެކި ސިޓީތަކުގައި ކޮވިޑް-19ގެ ހާލަތު ގޯސްވެފައިވާތީ އައު އަހަރު ފާހަގަކުރުމުގެ ގިނަ ކަންތައްތަކެއް ކެންސަލްކޮށް ދަތުރުކުރުމުގައި ސަމާލުވުމަށް އިލްތިމާސްކޮށްފިއެވެ.

ޗައިނާގައި ބުރާސްފަތި ދުވަހު ވަނީ 166 މީހުންނަށް ކޮވިޑް ޖެހިގެން ރިކޯޑް ކޮށްފައެވެ. އޭގެތެރެއިން 161 ކޭސް ރިޕޯޓްކޮށްފައިވަނީ މިހާރު އެންމެ ހާލަތު ގޯސް ޝިއާން ސިޓީންނެވެ. އެސިޓީއަކީ 2021 ވަނަ އަހަރު އެންމެ ހާލަތު ގޯސް ސިޓީއެވެ. ޝިއާން ސިޓީން ފެންނަ ކޮވިޑް ކޭސްތައް ވަނީ 1200 ފަހަނައަޅާ ގޮސްފައެވެ.

ޗައިނާގެ ނޭޝަނަލް ހެލްތު ކޮމިޝަންގެ އޮފިޝަލަކު ވިދާޅުވީ އައު އަހަރާ ލޫނަރ ނިއު އިޔަރ އާ ދިމާކޮށް ޗައިނާއިން ބޭރުގައި ތިބި އެގައުމުގެ ގިނަ އަދަދެއްގެ ރައްޔިތުން އަނބުރާ ގައުމަށް އަންނަމުންދާކަމަށެވެ. މިއާއެކު ޗައިނާގެ އެތެރޭގައި މީހުން އެއްތަނުން އަނެއްތަނަށް ދަތުކުރާ މިންވަރު އިތުރުވެގެންދާނެކަމަށެވެ. އަދި އޮމިކްރޯން ވޭރިއަންޓާއެކު ޗައިނާގެ އެތެރޭގައި ވައިރަސް ފެތުރޭ މިންވަރު އިތުރުވެގެންދާނެކަމަށް އޮފިޝަލް ވަނީ ވިދާޅުވެފައެވެ.

ބެއިޖިންގ ގެ މަޝްހޫރު ހެޕީ ވެލީ އެމިޔުސްމެންޓް ޕާކުގައި އައު އަހަރު ފާހަގަކުރުމަށް އިންތިޒާމު ކުރި ހަރަކާތްތައް ވަނީ ކެންސަލްކޮށްފައެވެ. ޗައިނާގެ ފައިނޭންޝަލް ހަބްކަމަށް ބެލެވޭ ޝެންހާއީގައި ހުންނަ ގްރޭޓް ވޯރލްޑް އެމިޔުސްމެންޓް ޕާކުގައިވެސް އައު އަހަރާ ދިމާކޮށް އެއްވެސް ހަރަކާތެއް އިންތިޒާމުނުކުރާ ކަމަށް އެތަން ހިންގާ ފަރާތްތަކުން ވަނީ ބުނެފައެވެ.

ކޮވިޑް-19 އެންމެ ފުރަތަމަ ފެނުނު ވުހާންގައިވެސް އައު އަހަރު ފާހަގަކުރުމަށް އެއްވެސް ކަމެއް ނުކުރެއެވެ. ގިނަ މީހުން އެއްވެގެން ބާއްވާ އެއްވެސް ކަމެއް ނުބޭއްވުމަށް ވަނީ ނިންމާފައެވެ.

ޑިސެމްބަރ މަހުގެ 30 ވަނަ ދުވަހާ ހަމައަށް އައިއިރު ޗައިނާއިން ވަނީ 102،083 ކޭސް ފެނިފައެވެ. 4،636 މީހުން ވަނީ މަރުވެފައެވެ.