އަންނަ އަހަރުގެ ހުރިހާ ދުވަހެއްގައި ކައިވެނިކޮށްދޭ ގޮތަށް ފެމިލީ ކޯޓުން ނިންމައިފި

އަންނަ އަހަރުގެ ހުރިހާ ދުވަހެއްގައި ވެސް ކައިވެނިކޮށް ދޭން ފެމިލީ ކޯޓުން ނިންމައިފިއެވެ.

ފެމިލީ ކޯޓުން ނެރުނު އިއުލާނުގައި ބުނެފައިވަނީ، އަންނަ އަހަރުގެ ހުރިހާ ދުވަހެއްގައި ކައިވެނިކޮށް ދޭން ނިންމާފައިވާ ކަމަށެވެ. ފެމިލީ ކޯޓުން ބުނެފައިވަނީ، ކޯޓާއި ކޯޓުން ބޭރުގައި ވެސް އަންނަ އަހަރުގެ ކޮންމެ ދުވަހަކު ކައިވެނިކޮށްދޭނެ ކަމަށެވެ.

ކޯޓުގައި ކައިވެނިކޮށް ދޭނީ ހެނދުނު 9:00 އިން ފެށިގެން މެންދުރު 11:30 އަށެވެ. އަދި މެންދުރު 1:00 އިން 2:00ށެވެ. ކޯޓުން ބޭރުގައި ކައިވެނި ކުރާނަމަ ހަވީރު 4:00 އިން ފެށިގެން ރޭގަނޑު 9:30 އާ ހަމައަށް ކައިވެނިކޮށް ދޭނެ ކަމަށް ފެމިލީ ކޯޓުން ބުނެއެވެ. ކޯޓުން ބުނެފައިވަނީ، ރަމަޟާން މަހު ކައިވެނިކޮށް ދޭނެ ގަޑިތައް ފަހުން އިއުލާން ކުރާނެ ކަމަށެވެ.

މީގެކުރިން ބައެއް ބަންދު ދުވަސްތަކުގައި ކައިވެނި ކޮށެއް ނުދެއެވެ. އަދި އަހަރުގެ ބައެއް ރީތި ތާރީޚުތަކުގައި ވެސް ކައިވެނިކޮށެއް ނުދެއެވެ. ހުރިހާ ދުވަހެއްގައި ވެސް ކައިވެނިކޮށްދޭ ގޮތަށް ހަމަޖެއްސީ މި އަހަރުން ފެށިގެންނެވެ.

ކޮވިޑް-19 އާ ގުޅިގެން 2020 ވަނަ އަހަރާއި 2021 ވަނަ އަހަރުގެ ކުރީކޮޅު ބައެއް ކައިވެނިތައް ކޮށް ދިނީ އޮންލައިންކޮށެވެ.